2 KORENTE 10

1Mbi Paul, mbi wani mbi yeke hunda na ala mbeni ye na iri ti Christ, lo so lo yeke sara ye na nzoni be, me na ngangu pepe. Azo ayeke tene: tongana mbi yeke na popo ti ala, mbi yeke zo so ade mingi, me tongana mbi yeke yongoro na ala, mbi yeke so na ndö ti ala mingi. 2Mbi voro ala, mbi tene: ala pusu mbi pepe titene mbi so na ndö ti ala tongana mbi si na popo ti ala kâ! Ambeni zo abaa ti ala atene, mbi yeke sara ye gi tongana ti azo ti dunia so. Biani, mbi leke na be ti mbi ti so ngangu na ndö ti azo ni. 3Taa-tënë, e yeke azo ti sese so, me e yeke tiri bira tongana ti azo ti sese so pepe. 4Aye ti bira ti e alondo na zo ti sese so pepe, me ngangu ti aye ti bira ti e alondo na Nzapa si ayeke buba angangu gbagba ti bira. Atënë ti gbungo li ti azo so ayeke na legeni pepe, e yeke buba ni. 5E yeke buba nga aye so kue azo ti baba ayeke mu ti kanga lege na amba ti ala ti hinga Nzapa. E yeke kanga lege na atënë ti be ti azo kue ti sara si atënë ti be ti ala aga ngbaa si ala ma yanga ti Christ. 6Tongana ala, azo ti Korente, ala ma yanga ti Christ nzoni, fade e yeke duti nduru ti fâ ngbanga na li ti azo so kue ake ti ma yanga. 7Ala yeke baa aye na le ti ala gi tongana ti so zo ayeke baa na ye. Tongana mbeni zo abaa atene, ni yeke zo ti Christ, ayeke nzoni lo hinga tënë so laso biani: tongana lo yeke zo ti Christ, e nga e, e yeke azo ti Christ. 8Ataa so mbi pika kate ti mbi ndali ti ngangu so Kota Gbia amu na e, kamene asara mbi pepe. Nda ti ngangu ni ayeke ti sara si Eglize ti ala akpengba, me ayeke ti sara si Eglize ni ati pepe. 9Mbi ye titene ala baa mbi tongana zo so ayeke zia mbeto na be ti ala na lege ti ambeti ti lo pepe. 10Biani, ambeni zo atene: “Atënë ti ya ti ambeti ti Paul ane mingi si ayeke nga ngangu mingi; me tongana Paul ayeke na popo ti e, lo yeke na ngangu pepe si tënë ti yanga ti lo ayeke ye oko pepe.” 11Zo so atene mara ti tënë so, ayeke nzoni lo hinga lo tene: lani so e ngba yongoro si e tokua mbeti na ala, tënë ti yanga ti e aso; sarango ye ti e ayeke so ande nga gi tongaso, tongana e yeke si na ala kâ. 12Biani, ambeni zo abaa tere ti ala tongana akota zo, e kpa ti haka tere ti e na ala pepe, e lingbi na ala pepe. Na le ti ala wani, ala baa tere ti ala tongana azo so alingbi awe si ala mu lege ti dutingo ti ala ti haka na azo kue. Andaa, li ti ala ayeke daa pepe! 13Ti e, e yeke gonda tere ti e ahon ndoni pepe; e yeke gonda tere ti e asi na ndo so Nzapa afa na e ti sara kua ti lo daa, e yeke sara nga kua ni ngbii e si na ni na ndo ti ala. 14E yeke sara kua ni ti hon ndo so a fa na e so pepe. Tongana e si fade na popo ti ala pepe, ka e sara ye ahon so e lingbi ti sara so. Taa-tënë, e laa e gue na Nzoni Tënë ti Christ kozoni na ala. 15Kua so ambeni zo nde asara, e yeke gonda tere ti e ahon ndoni ndali ni pepe. Me ye so e zia be ti e daa ti ku ayeke so: tongana mabe ti ala akono, e yeke sara ande kota kua mingi na popo ti ala; me e yeke sara kua ni angba gi na ndo so Nzapa afa na e. 16Na pekoni, e yeke gue na Nzoni Tënë na ya ti ambeni kodro so ayeke na peko ti ala kâ. Tongaso si ndo so ambeni zo asara kua daa kozoni awe, e ye ti kiri ti sara kua na ndo so pepe; kua so ambeni zo asara ni, e ye nga ti gonda tere ti e ndali ni pepe. 17Mbeti ti Nzapa atene: “Zo so aye ti gonda tere ti lo, ayeke nzoni lo gonda tere ti lo ndali ti ye so Kota Gbia asara.” 18Taa nzoni zo ti kua ayeke zo so ayeke tene nzoni tënë na ndö ti lo wani pepe, me zo so Kota Gbia laa ayeke tene nzoni tënë na ndö ti lo.

will be added

X\