1 TIMOTHÉE 5

1Mo suku ngangu na mbakoro-koli pepe, me mo mu wango na lo tongana ti so mo yeke mu wango na babâ ti mo, mo mu wango na amaseka-koli tongana a-ita ti mo ti koli; 2mo mu wango na ambakoro-wali tongana amama ti mo, mo mu nga wango na amaseka-wali tongana a-ita ti mo ti wali, mo mu wango ni na vuru be. 3Mo ne awali-mua, ala so ayeke taa awali-mua 4Tongana mbeni wali-mua ayeke na amolenge wala atara, alingbi ala hinga ti bata azo ti sewa ti ala kozoni, ti kiri na peko ti nzoni ye so ababâ na amama ti ala asara ando na ala. Ye so anzere na le ti Nzapa laa. 5Ti taa wali-mua so lo yeke duti gi lo oko, lo zia be ti lo ti ku Nzapa; lo sambela lakue bi na lâ titene Nzapa amu maboko na lo. 6Me wali-mua so be ti lo ayeke na ndö ti anzerengo ye ti dunia so, lo kui awe, ataa so lo ngba na fini. 7Tënë so laa mo lingbi nga ti mu yanga daa na awali-mua na asewa ti ala si ambeni zo awara mbeni tënë ti bi na li ti ala pepe. 8Tongana mbeni zo abata azo ti lo na legeni pepe si lo hinga ti bata taa azo ti sewa ti lo legeni pepe, lo zia lege ti mabe awe. Sioni ti lo ahon sioni ti azo so ake ti ma na be. 9Tongana mo ye ti zia iri ti mbeni wali na popo ti awali-mua, alingbi lo yeke zo so ngu ti lo asi baleomene si lo yeke wali so amu koli gi fani oko. 10Alingbi azo ahinga lo ndali ti nzoni sarango ye ti lo: lo bata amolenge ti lo nzoni, lo yamba azo so aga na da ti lo nzoni, lo sukula gere ti azo ti Nzapa, lo mu maboko na azo so ayeke na ya ti pasi si lo mu ngangu ti lo ti sara anzoni ye nde nde. 11Me awali-mua so angba maseka, mo zia iri ti ala na popo ti awali-mua pepe, ngbanga ti so tongana nzara ti be ti ala asara ala, fade ala yeke zia lege ti Christ si ala kiri ti mu koli. 12Na sarango ye tongaso, tënë ayeke ti na li ti ala ndali ti so ala buba peko ti kozo zendo ti ala awe. 13Gi so oko pepe: ala yeke duti gi senge senge tongaso si ala mu gi kua ti fonongo na ya ti ada oko oko; na ndö ni, ala kiri ayeke diko atënë mingi mingi si ala yeke yoro yanga ti ala na ya ti tënë ti azo, ala yeke tene atënë ti kirikiri mingi. 14Ndani laa, mbi ye si awali-mua so angba maseka akiri amu koli, ala du amolenge, ala fa lege na azo ti da ti ala. Ala sara tongaso si awato ti e awara lege ti tene sioni tënë na tere ti e pepe. 15Biani, ambeni wali-mua agirisa lege awe si ala mu peko ti Satan. 16Tongana mbeni wali ama na be si na ya ti sewa ti lo ambeni wali-mua ayeke daa, alingbi lo bata ala, lo zia kungba ti batango ala na ndö ti Eglize pepe. Tongaso si Eglize alingbi ti mu maboko na awali-mua so ayeke taa awali-mua. 17Akangba so ayeke bata Eglize na legeni, ayeke nzoni azo ane ala si afuta ala na legeni; mbirimbiri ala so amu tere ti ala kue na kua ti fango tënë ti Nzapa nga na fango ye na azo. 18Biani, Mbeti ti Nzapa atene: “Bagara so ayeke sara kua na ngoi ti fango ale ti kobe, mo gbanzi lo na tengo ale ti kobe ni pepe.” Mbeti ni akiri atene: “Zo ti kua alingbi na futa ti lo.” 19Tongana mbeni zo abi tënë na li ti mbeni kangba, mo ke tënë ni; me tongana mo kiri mo ma tënë ni na yanga ti azo use wala ota si mo yeda. 20Azo so asara siokpari, mo suku na ala na le ti azo kue, tongaso si mbeto agbu atanga ni. 21Na le ti Nzapa, na le ti Jésus Christ, na le ti a-ange so lo soro ala, mbi hunda na mo na ngangu ti sara aye so kue: mo mu mbage ti mbeni zo pepe, mo ye ambeni zo ahon ambeni pepe. 22Mo zia maboko ti mo hio na li ti mbeni zo pepe, mo sara beoko na siokpari ti mbeni zo pepe; me mo bata be ti mo na vurungo ni. 23Mo nyon gi ngu pepe, me mo nyon vin kete ndali ti ya ti mo, ngbanga ti so tere ti mo ayeke so ka mingi. 24Asiokpari ti ambeni zo ayeke sigigi na le ti azo kozoni si a fâ ngbanga ti ala. Ti ambeni zo ayeke sigigi gi na pekoni. 25Anzoni ye so zo asara, azo ayeke baa ni na le ti ala. Ataa anzoni ye so zo abaa ni hio pepe, alingbi ti ngba na hondengo ni pepe.

will be added

X\