1 TIMOTHÉE 2

1Kozo ye so mbi ye ti mu wango daa ayeke so: ala hunda ye na Nzapa, ala sambela lo, ala voro tere ti ala na lo, ala mu singila na lo ndali ti azo kue. 2Ala sambela ndali ti agbia na azo so kue ayeke na kota ndo si e wara lege ti duti kpoo na ya ti siriri, na gbungo tënë ti Nzapa mingi nga na nengo tere. 3Baa, ye so ayeke nzoni si anzere na le ti Nzapa, Wasongo e laa. 4Lo ye titene azo kue asoo kuâ si ala hinga taa-tënë. 5Biani, Nzapa ayeke gi oko; walekengo-songo na popo ti azo na Nzapa ayeke gi oko: Jésus Christ, 6lo so lo ka tere ti lo ti soo azo kue, nilaa tongana ngoi ni alingbi awe, lo sara tongaso ti fa atene, Nzapa aye ti soo azo kue na kuâ. 7Ndali ti tënë so, Nzapa azia mbi zo ti fango tënë nga watokua ti lo. Mbi yeke nga zo ti fango nda ti tënë ti mabe na azo ti amara nde si mbi yeke fa nga nda ti taa-tënë. Mbi yeke tene taa-tënë, mbi yeke tene mvene pepe. 8Mbi ye si akoli asambela na ndo kue, na yorongo maboko ti ala na nduzu, maboko so ayeke nzoni, na ngonzo na be ti ala pepe, na tënë ti papa pepe. 9Mbi ye nga si awali ayu bongo so ayeke na legeni: bongo so afa nengo tere ti ala, bongo ti sarango na baba pepe; ala leke kua ti li ti ala na kode ahon ndoni pepe, ala yu aye ti lôro wala alenge pepe, ala yu abongo ti kota nginza pepe. 10Me alingbi ala fa so ala yeke pendere na lege ti sarango anzoni ye; ye so awali so akpe mbeto ti Nzapa alingbi ti sara laa. 11Na ndembe ti mandango tënë ti Nzapa, alingbi awali aduti kpoo ti ma tënë, ala ne zo so ayeke fa ye. 12Mbi ye titene wali afa ye na koli pepe wala lo hon ndö ti koli pepe; alingbi lo duti kpoo. 13Biani, Nzapa asara Adam kozoni, na pekoni si lo sara Eve. 14Adam laa Satan ahanda lo pepe, me wali laa Satan ahanda lo si lo ke yanga ti Nzapa. 15Me fade Nzapa ayeke soo lo na kuâ na lege ti dungo molenge. Ti awali, Nzapa ayeke soo ala na kuâ gi tongana ala ngba na lege ti mabe, ti ndoye, ti bata tere ti ala nde ndali ti Nzapa, ti sara ye na baba pepe.

will be added

X\