1 TIMOTHÉE 1

1Mbi Paul, mbi yeke watokua ti Jésus Christ na peko ti yanga ti Nzapa, Wasongo e, lo na Jésus Christ so e zia be ti e kue na ndö ti lo. 2Mbi tokua mbeti so na mo Timothée so mo yeke taa molenge ti mbi na lege ti mabe. Ayeke nzoni Nzapa Babâ na Kota Gbia ti e Jésus Christ asara nzoni be na mo, abaa mawa ti mo si amu na mo siriri! 3Tongana ti so mbi mu lani yanga na mo na guengo ti mbi na sese ti Masedoane, ayeke nzoni mo ngba na gbata ti Efeze. Kâ, ambeni zo ayeke fa ye so alingbi na tënë ti Nzapa pepe. Alingbi mo ke na ala na kuru go ti fa aye ni so. 4Mo ke nga na ala titene ala zia be ti ala na ndö ti ambai ti mvene wala na dikongo a-iri ti akotara gbani gbani. Aye so ayeke ga na bingbingo tënë na popo ti azo, me nzoni lege so Nzapa aleke ndali ti zo, ala lingbi ti hinga ni na lege ti aye so pepe. Zo ayeke hinga nzoni lege ni gi na lege ti mabe. 5Nda ti yanga so mbi mu ayeke titene mo sara si ndoye akono, ndoye so aga na lege ti vurungo be, be so sioni ye oko ayeke daa pepe nga na taa mabe. 6Ambeni zo azia nzoni lege so awe, ala girisa lege na dikongo abuba tënë. 7Ala tene, ala yeke awafango-ndia, me atënë so ala yeke tene wala aye so ala yeke fa si yanga ti ala akpengba na ndö ni so, ala ma nga ya ni oko pepe. 8E hinga e tene, ndia ayeke nzoni ye tongana e sara ye na ni na legeni. 9Alingbi e hinga ye so: azo so ayeke sara ye mbirimbiri, ndia ayeke ndali ti ala pepe; me ndia ayeke ndali ti azo so ake ti ma yanga, azo ti ngangu li, azo so ake tënë ti Nzapa, azo ti sarango siokpari, azo so akpe ye ti Nzapa wala ye ti yingo pepe, azo so ayeke fâ ababâ na amama ti ala, azo ti fango zo, 10azo ti gingo wali wala gingo koli kirikiri, akoli so ayeke lango na amba ti ala akoli, azo so ayeke ka amba ti ala na ngbaa, azo ti mvene, azo so ayeke deba na tënë ti mvene, ala na azo so ayeke sara ye so ayeke nde na fango ye so ayeke mbirimbiri. 11Tënë so alingbi na Nzoni Tënë so Nzapa azia na maboko ti mbi; tënë ni ayeke tënë ti Nzapa, lo so alingbi na gonda si azo ayeke tene nzoni tënë ti lo. 12Mbi mu singila mingi na Jésus Christ, Kota Gbia ti e, ndali ti so lo mu na mbi ngangu, lo baa mbi tongana zo so lo lingbi ti zia be ti lo na ndö ti lo, nilaa lo mu mbi na kua ti lo. 13Mbi yeke kozoni zo ti zongango lo, zo ti sarango ngangu na lo, zo ti tiringo na lo. Me Nzapa abaa mawa ti mbi, ngbanga ti so ye so mbi yeke sara lani so, mbi hinga ni pepe si mbi de nga ti ma na be pepe. 14Kota Gbia ti e Christ Jésus asara nzoni be na mbi ahon ndoni: lo mu na mbi mabe na ndoye so aga na lege so mbi ga oko na Jésus Christ. 15Tënë so ayeke taa-tënë, ayeke nzoni azo kue ayeda na ni na be ti ala kue: Jésus Christ aga na dunia so ti soo azo ti siokpari na kuâ. Na popo ti azo ti siokpari ni, mbi laa mbi yeke kozo zo ni, 16me Nzapa abaa mawa ti mbi. Tongaso, Jésus Christ akanga be ti lo mingi ti ku mbi, mbi so mbi yeke kozo zo ti sarango siokpari. Mbi ga tapande ndali ti azo so ayeke ma na be ande na lo ti wara fini so angba lakue lakue. 17Ayeke nzoni azo ane Kota Gbia, ala gonda lo lakue lakue, lo yeke oko Nzapa, zo abaa lo pepe, lo yeke na fini lakue lakue, lo yeke Kota Gbia kpu na kpu! Amen. 18Timothée, molenge ti mbi, aye so mbi fa, mbi zia na maboko ti mo, alingbi na atënë ti peko ti yanga ti Nzapa so azo atene na ndö ti mo. Ayeke nzoni mo luti na ndö ti atënë ni ti tiri nzoni bira na legeni; 19mo bata mabe nzoni, mo duti na be so sioni ye oko ayeke daa pepe. Ambeni zo ake ti bata be ti ala nzoni, nilaa mabe ti ala ati. 20Himene na Alexandre ayeke na popo ti azo ni so. Mbi zia ala na maboko ti Satan titene ala manda ti kiri ti zonga Nzapa pepe.

will be added

X\