1 TESALONIKE 5

1A-ita, tongana ayeke tënë ti ngoi wala lango so ye ni ayeke si ande na ni, so ayeke mbeni ye titene zo akiri asu mbeti na ala ndali ni pepe. 2Ala wani, ala hinga tënë ni nzoni mingi: lango ti gango ti Kota Gbia ayeke duti tongana gango ti zo ti nzi na bi. 3Na ndembe so azo ayeke tene ande, atene: “E yeke na siriri, mbeni ye ti sarango e ayeke daa pepe!”, gi na ndembe so laa kota kpale ayeke ti na ndö ti ala fafade tongana songo ya ti mama ti ngo so aga nduru ti du. Fade ala yeke wara lege ti sigigi na ya ni pepe. 4Me ti ala, a-ita, ala yeke na ya ti vukongo ndo pepe titene lango ni so awara ala tongana zo ti nzi. 5Biani, ala kue ayeke azo ti lumiere, ala yeke azo ti kota lâ. E yeke azo ti bi pepe wala azo ti vukongo ndo pepe. 6Tongaso, alingbi e lango tongana tanga ti azo pepe, me le ti e akpengba, e sara ye ahon ndoni pepe, me na legeni. 7Azo so ayeke lango, ala yeke lango na bi; azo so ayeke nyon samba si ahon ndö ti ala, ala yeke nyon ni na bi. 8Me e so e yeke azo ti kota lâ, alingbi e sara ye ahon ndoni pepe, me na legeni. Alingbi mabe na ndoye aga tongana kazaka ti wen so e yeke yu na kate ti e, ye so e zia be ti e ti ku ti soo kuâ aga tongana kpoto ti wen na li ti e. 9Nzapa asoro e titene ngonzo ti lo ati na ndö ti e pepe, me lo soro e titene e soo kuâ na lege ti Kota Gbia ti e Jésus Christ 10so akui ndali ti e, tongaso si, ataa e ngba na fini wala e kui, e duti na fini oko na lo 11Tongaso, ala mu ngangu na be ti ala na popo ti ala, ala sara si amba ti ala akpengba tongana ti so ala yeke sara ni so. 12A-ita, e hunda na ala ti ne azo so ayeke mu tere ti ala kue ti sara kua na popo ti ala: azo so laa ayeke fa lege na ala na iri ti Kota Gbia si ayeke mu wango na ala. 13Ala ne azo ni mingi, ala ye nga ala ndali ti kua so ala yeke sara. A-ita, ala duti na siriri na popo ti ala. 14A-ita, e hunda na ala ti suku na azo so ayeke sara ye ti kirikiri; azo so be ti ala awoko, ala sara si be ti ala akiri awara ngangu, ala mu maboko na azo so ayeke na ngangu pepe, ala kanga be ti ala na azo kue. 15Ala sara hange si mbeni zo akiri peko ti sioni na mba ti lo pepe, me ala gi lakue ti sara nzoni na popo ti ala nga na azo kue. 16Ala duti lakue na ngia, 17ala ngba ti sambela lakue, 18ala mu singila na Nzapa na ya ti aye kue. Ye so Nzapa aye titene ala so aga oko na Jésus Christ asara laa. 19Ala kanga lege na Yingo-Vuru pepe ti sara kua ti lo, 20ala baa atënë ti awayanga-Nzapa tongana abuba tënë pepe. 21Me ala gi ya ti atënë ni kue mbirimbiri si ye so ayeke nzoni, ala bata ni; 22ala kpe ye so kue ayeke ye ti sioni. 23Ayeke nzoni Nzapa wani so ayeke mu siriri na zo asara si ala ga nde si ala ga nzoni kue. Ayeke nzoni lo bata yingo ti ala, be ti ala nga na tere ti ala nzoni kue si mbeni tënë oko ayeke na li ti ala pepe na lango ti gango ti Kota Gbia ti e Jésus Christ. 24Nzapa so airi ala, lo yeke sara ye alingbi na tënë ti yanga ti lo: fade lo yeke sara ye so kue. 25A-ita, ala sambela Nzapa nga ndali ti e. 26Ala bara a-ita kue na sungo ngbangba so ayeke nzoni na le ti Nzapa. 27Mbi hunda na ala na ngangu na iri ti Kota Gbia titene ala diko mbeti so na a-ita, azo ti Christ kue. 28Ayeke nzoni Kota Gbia ti e Jésus Christ asara nzoni be na ala!

will be added

X\