1 TESALONIKE 2

1A-ita, ala wani ahinga atene, guengo ti e lani na ndo ti ala ayeke senge pepe. 2Ala hinga nga atene, kozoni na gbata ti Filipe, azo azonga e si e baa pasi. Me na ya ti aye ti ngangu mingi, Nzapa amu ngangu na be ti e ti fa Nzoni Tënë ti lo na ala, azo ti Tesalonike. 3Tënë so e yeke fa na azo aluti na ndö ti tënë ti mvene pepe, aluti nga na ndö ti sioni tënë ti be ti zo wala tënë ti handango zo pepe. 4Me e yeke fa tënë ni tongana ti so be ti Nzapa aye, ngbanga ti so lo tara e awe si lo mu na e kua ti fango Nzoni Tënë. E yeke gi lege ti zia ngia na be ti azo pepe, me ti zia ngia na be ti Nzapa, lo so lo yeke tara be ti e. 5Ala hinga kue: laoko e tene mbeni tënë ti handango na zo pepe; laoko e honde nzara ti warango aye na peko ti fango tënë ti e pepe, Nzapa ahinga ni! 6E gi lege pepe titene azo agonda e, ataa na popo ti ala, ataa na popo ti ambeni zo nde. 7Taa na legeni, e lingbi fade ti ga kungba na ndö ti ala, ngbanga ti so e yeke awatokua ti Christ. Me na ndembe so lani e yeke na popo ti ala, e sara ngangu na ala pepe, e duti tongana mbeni mama so ayeke gbu amolenge ti lo na kate ti lo ti mu me na ala. 8Ndali ti yengo so e ye ala, e ye lani ti fa na ala gi Nzoni Tënë pepe, me e ye nga ti ka tere ti e na kuâ ndali ti ala, ngbanga ti so tënë ti ala agbu be ti e mingi! 9A-ita, ala dabe ti ala na akua so lani e sara nga na ngangu so ahunzi na e. Na ndembe so e fa Nzoni Tënë na ala, e sara kua bi na lâ titene e ga kungba na ndö ti mbeni zo na popo ti ala pepe. 10Ye so e sara, ala hinga ni awe, Nzapa nga ahinga ni awe: dutingo ti e na popo ti ala so ama na be ayeke nzoni kue, ayeke mbirimbiri, tënë oko ayeke na li ti e pepe. 11Ala hinga nga atene, e sara na zo oko oko tongana ti so babâ ayeke sara na amolenge ti lo. 12E mu na ala wango, e sara titene be ti ala akpengba, e hunda na ala mingi titene lege ti dutingo ti ala alingbi na ti so be ti Nzapa aye, lo so lo iri ala ti li na ya ti Kodro-gbia ti lo nga na ya ti gonda ti lo. 13Ndani laa, e nga, e yeke mu singila na Nzapa lakue ndali ti ye so: na ndembe so e fa lani na ala tënë ti Nzapa, ala ma ni si ala yamba ni tongana tënë ti zo pepe, me tongana tënë ti Nzapa biani: tënë ni ayeke tënë ti Nzapa so ayeke sara kua na be ti ala so ama na be. 14Biani, a-ita, azo ti Tesalonike, ala sara ye awe gi tongana ti azo ti Eglize ti Nzapa so ayeke na sese ti Judée, ala so aga oko na Jésus Christ so. Ala baa pasi na maboko ti azo ti kodro ti ala wani tongana ti so azo ti Eglize ti Judée abaa pasi na maboko ti azuife. 15Azuife laa afâ Kota Gbia Jésus na awayanga-Nzapa, ala sara nga ngangu na e. Ala yeke sara ye so azia ngia na be ti Nzapa pepe, ala yeke awato ti azo kue! 16Ala yeke kanga lege na e ti fa tënë ti Nzapa na azo ti amara nde, tënë so alingbi ti soo ala na kuâ. Tongaso, azuife ayeke sara si siokpari ti ala akiri ahon ndoni. Me na ndani, Nzapa asara ngonzo na tere ti ala. 17A-ita, e na ala, e kangbi gi na ya ti mbeni kete ngoi: ataa so e yeke na tere ti ala kâ pepe, be ti e ayeke na ndö ti ala! E yeke na nzara mingi ti kiri ti baa ala, nilaa e sara kue ti kiri ti si na ala kâ. 18Ndani laa, e ye ti gue na ndo ti ala kâ; mbi Paul, mbi gi lege fani mingi ti gue kâ, me Satan akanga lege na e. 19Biani, na lango ti gango ti Kota Gbia Jésus, nyen laa e yeke zia be ti e ti ku, nyen laa ayeke ngia ti e, nyen laa ayeke fa atene, e so benda awe? Gi ala pepe? 20Taa-tënë, ala laa asara si e yeke na gonda si e yeke duti na ngia!

will be added

X\