1 TESALONIKE 1

1Mbi Paul, mbi na Silas na Timothée laa e tokua mbeti so na azo ti Eglize so ayeke na gbata ti Tesalonike. Ala yeke azo ti Nzapa Babâ na ti Kota Gbia Jésus Christ. Ayeke nzoni Nzapa asara nzoni be na ala si lo mu na ala siriri! 2E yeke mu singila lakue na Nzapa ndali ti ala kue si e yeke zia ala lakue na ya ti asambela ti e. 3Na le ti Nzapa Babâ ti e, e yeke dabe ti e lakue na kua so ala yeke sara na lege ti mabe; e yeke dabe ti e na ndoye so ayeke sara titene ala sara kua ngangu nga na be ti ala so ala zia ti ku Kota Gbia ti e Jésus Christ. 4A-ita, e hinga so Nzapa aye ala mingi si lo soro ala. 5Biani, ala hinga atene, Nzoni Tënë so e fa na ala, e fa ni gi na yanga pepe, me e fa ni na ngangu nga na lege ti kua ti Yingo-Vuru. E hinga biani na be ti e, e tene, Nzoni Tënë so e fa ayeke taa-tënë. Ala kue ahinga lege ti dutingo ti e na popo ti ala laa, e sara ye so kue ndali ti nzoni ti ala. 6Ti ala, ala sara ye tongana ti e nga tongana ti Kota Gbia; ataa so ala wara tënë ti Nzapa na ya ti pasi mingi, Yingo-Vuru azia ngia na be ti ala. 7Tongaso, ala ga tapande ndali ti azo ti Masedoane na ti Akayi so ama na be. 8Biani, tënë ti Kota Gbia alondo na ndo ti ala si ague asi na sese ti Masedoane na ti Akayi kue. Gi so oko pepe, so ala ma na be na Nzapa, sango ni angba gi na ando use so pepe, me amu ndo kue. Tongaso, e yeke kiri ti tene tënë na ndö ni pepe. 9Azo kue ayeke tene tënë ti yambango so ala yamba lani na e na ndembe so e si na ndo ti ala. Azo atene nga tënë ti ziango so ala zia lege ti anzapa nde ti kiri na mbage ti Nzapa titene ala sara kua na lo, lo so lo yeke na fini si lo yeke taa Nzapa. 10Fadeso ala yeke ku Jésus, Molenge ti lo so ayeke londo na yayu ti ga. Nzapa azingo Molenge ti lo ni na kuâ, lo so lo yeke zi e na gbe ti ngonzo ti Nzapa so ayeke ga.

will be added

X\