1 PIERRE 1

1Mbi Pierre, watokua ti Jésus Christ, mbi tokua mbeti so na azo so Nzapa asoro ala, ala so akpe kodro ti ala, ague aduti na ya ti akodro nde nde na sese ti Pon, ti Galasii, ti Kapadose, ti Azii na ti Bitinii. 2Nzapa Babâ asoro ala tongana ti so lo leke na be ti lo kozoni; lo sara si ala ga azo so ayeke nde si ayeke nzoni kue na lege ti Yingo ti lo, tongaso si ala ma yanga ti Jésus Christ, tongaso nga si lo sukula asioni ti ala na mene ti lo. Ayeke nzoni Nzapa asara nzoni be mingi na ala si lo mu na ala siriri ahon ndoni! 3E gonda Nzapa, Babâ ti Kota Gbia ti e Jésus Christ! Lo baa mawa ti e mingi si lo sara titene a kiri a du e mbeni na lege ti zingongo so lo zingo Jésus Christ na kuâ. Tongaso, e zia be ti e ti ku ye so ayeke sara titene zo aduti na fini. 4E yeke ku nga ti wara aye so Nzapa ayeke mu na azo ti lo titene aga ti ala. Aye ni alingbi ti buba pepe, ye ti sioni alingbi ti si na tere ni pepe si pendere ni alingbi ti hon nga pepe. Nzapa ayeke bata aye ni ti ku na ala na yayu. 5Aye ni so ayeke ndali ti ala, ala so ayeke na mabe. Lo yeke bata ala na lege ti ngangu ti lo titene lo soo ala si na ngoi ti ndani, azo kue ayeke baa ni. 6Ndani laa ala yeke duti na ngia, ataa so alingbi ala ngba ti baa amara ti pasi nde nde na ya ti kete ngoi so. 7Pasi ni asi na ala ti tara mabe ti ala. Lôro ayeke ye so ayeke buba bubango, me azo ayeke tara ni na wâ. Mabe ayeke kota ye ahon lôro. Ndani laa a yeke tara ni ti baa wala akpengba, tongaso si fade Nzapa ayeke tene nzoni tënë ti ala, lo yeke gonda ala si lo yeke ne ala na ndembe so Jésus Christ ayeke si. 8Ataa so ala baa lo pepe, ala ye lo; ataa so ala de ti baa lo pepe, ala ma na be na lo. Ndani laa ala yeke duti na kota ngia, ngia so ahon ndoni, zo alingbi ti tene tënë ni pepe. 9Ala yeke na ngia ni so, ngbanga ti so a soo ala awe. Ye so ala yeke wara ndali ti mabe ti ala laa. 10Awayanga-Nzapa agi ando mingi na alege nde nde nda ti tënë so atene, Nzapa ayeke soo azo so. Ala tene nga kozoni tënë ti nzoni be ti Nzapa so lo ye ti sara na ala, a-ita. 11Yingo ti Christ ayeke na ya ti awayanga-Nzapa si ayeke fa na ala kozoni tënë ti pasi so fade Christ ayeke baa, nga na tënë ti gondango so a yeke gonda lo na peko ti pasi ni. Nilaa, ala gi lege ngangu ti hinga ngoi ti singo ti aye so Yingo ti Christ afa tënë ni na ala; ala gi nga ti hinga aye ni ayeke si ande tongana nyen? 12Nzapa afa na ala atene, tënë ni ayeke ndali ti ala wani pepe, me ayeke ndali ti ala, a-ita. Tënë ni laa azo ti fango Nzoni Tënë ayeke fa ni na ala, na lege ti Yingo-Vuru so alondo na yayu si aga. Tënë ni, a-ange wani ayeke na nzara ti hinga ni. 13Ndani laa, ala leke be ti ala ti sara kua, le ti ala akpengba si ala zia be ti ala kue ti ku anzoni ye so ala yeke wara ande na ndembe so Jésus Christ ayeke si. 14Ala sara ye tongana amolenge so ayeke ma ndo. Ala sara ye pepe na lege ti anzara ti be ti ala so ala yeke na ni ando, na ngoi so ala de ti hinga ndo pepe so. 15Nzapa so airi ala, lo yeke nde si lo yeke nzoni kue. Tongaso, ala nga, ala ga azo so ayeke nde si ayeke nzoni kue na ya ti sarango aye ti ala kue. 16Biani, Mbeti ti Nzapa atene: “Ayeke nzoni ala duti nde si ala duti nzoni kue, ngbanga ti so mbi yeke nde si mbi yeke nzoni kue.” 17Nzapa ayeke fâ ngbanga na li ti zo alingbi na ye so lo sara, lo yeke mu mbage ti mbeni zo pepe. Tongaso, a-ita, tongana ala yeke sambela si ala iri Nzapa atene “Babâ”, ala duti na mbeto ti lo na ngoi so ala yeke na dunia so. 18Ala wara nzoni ye oko pepe na lege ti sarango ye so ala mu na peko ti akotara ti ala. Me ala hinga awe ye so azi ala na ya ti sarango ye ni so, ye ni alingbi ti buba tongana nginza wala lôro pepe; 19me ye so azi ala ayeke mene ti Christ so ayeke ye ti kota ngere. Christ ayeke tongana molenge ti taba so mbeni mbage ti tere ti lo oko abuba pepe si sioni ye oko ayeke na tere ti lo pepe. 20Nzapa asoro Christ kozoni si dunia abaa gigi. Na ngoi ti ndani, lo lo fa Christ na le ti azo kue ndali ti nzoni ti ala, a-ita. 21Na lege ti Christ, ala ma na be na Nzapa so azingo Christ na kuâ si amu na lo gonda. Tongaso, mabe ti ala na ye so ala zia be ti ala ti ku angba na ndö ti Nzapa. 22So ala yeda ti sara ye alingbi na taa-tënë, ala sukula be ti ala awe ti ye a-ita ti ala na be oko. Ala ye tere na popo ti ala na vurungo be, ala zia lege ni pepe. 23Biani, a kiri a du ala mbeni awe; zo so ayeke kui kuingo laa akiri adu ala pepe, me tënë ti Nzapa. Tënë ni ayeke na fini, ayeke kui pepe si ayeke ngba lakue lakue. 24Tongana ti so Mbeti ti Nzapa atene: “Azo ayeke tongana pere, pendere ti ala ayeke tongana kongo ti ngonda. Pere ni ayeke hole si kongo ni ayeke ti, 25me tënë ti Kota Gbia ayeke ngba kpu na kpu.” Tënë ni ayeke Nzoni Tënë so a fa ni na ala ando.

will be added

X\