1 JEAN 5

1Zo so kue ama na be so Jésus ayeke Christ, lo yeke molenge ti Nzapa; zo so kue aye Nzapa Babâ, lo ye nga amolenge ti lo. 2Lege so e hinga e tene, e ye amolenge ti Nzapa ayeke so: e ye ala tongana e ye Nzapa si e yeke sara ye alingbi na ndia ti lo. 3Lege ti yengo Nzapa ayeke titene e sara ye alingbi na andia ti lo. Andia ti lo ayeke ngangu pepe. 4Zo so kue ayeke molenge ti Nzapa ahon ndö ti dunia so na ngangu awe. Na lege ti mabe laa e yeke hon ndö ti dunia so na ngangu. 5Zo wa laa ahon ndö ti dunia so na ngangu? Gi zo so ama na be so Jésus ayeke Molenge ti Nzapa. 6Jésus Christ laa aga na ngu na mene, ngu ti bateme so lo li na ya ni nga na mene ti lo so atuku. Lo ga gi na ngu pepe, me lo ga na ngu na mene kue. Yingo-Vuru si ayeke fa atene, ye ni ayeke taa-tënë, ngbanga ti so Yingo-Vuru ayeke taa-tënë. 7Ala yeke ota so ayeke fa atene, ye ni ayeke taa-tënë: 8Yingo-Vuru, ngu na mene; ala ota so, tënë ti yanga ti ala kue ayeke gue gi oko. 9Tongana azo atene na e tënë ti ye so ala baa, e yeke yeda na ni; me tongana Nzapa atene tënë na ndö ti mbeni ye, tënë ni ane ahon ti azo. Tënë so Nzapa atene ayeke so: lo tene tënë na ndö ti Molenge ti lo. 10Zo so ama na be na Molenge ti Nzapa, tënë so Nzapa atene so ayeke na be ti lo. Zo so ake ti yeda na tënë so Nzapa atene, lo mu Nzapa tongana zo ti mvene, ngbanga ti so lo ke ti yeda na tënë so Nzapa atene na ndö ti Molenge ti lo. 11Tënë so Nzapa atene ayeke so: Nzapa amu na e fini so angba lakue lakue, lo mu ni na e na lege ti Molenge ti lo. 12Zo so ayeke na Molenge ni, lo yeke na fini; zo so ayeke na Molenge ti Nzapa pepe, lo yeke na fini pepe. 13Ala so ama na be na Molenge ti Nzapa, mbi su tënë so na mbeti na ala titene ala hinga so, ala yeke na fini so angba lakue lakue. 14Ye so e hinga biani na be ti e na le ti Nzapa ayeke so: tongana e hunda lo na mbeni ye so alingbi na ye so be ti lo aye, lo yeke ma e. 15So e hinga e tene, lo yeke ma e, e hinga biani e tene, ye so e hunda na lo so, e wara ni awe. 16Tongana mbeni zo abaa ita ti lo na sarango siokpari, mbeni siokpari so ague na lo na kuâ pepe, alingbi lo sambela si fade Nzapa amu fini na ita lo so. Tënë so ayeke ndali ti azo so ayeke sara siokpari so ague na zo na kuâ pepe. Mbeni siokpari ayeke daa so ayeke gue na zo na kuâ, mara ti siokpari so laa mbi hunda na ala ti sambela ndali ni pepe. 17Sarango sioni ye kue ayeke siokpari, me siokpari kue laa ayeke gue na zo na kuâ pepe. 18E hinga so, azo so kue aga amolenge ti Nzapa, ala yeke ngba ti sara siokpari pepe. Biani, Molenge ti Nzapa ayeke bata ala si Sioni wato alingbi ti sara sioni na ala pepe. 19E hinga so, e yeke azo ti Nzapa, me dunia kue ayeke na gbe ti komandema ti Sioni wato. 20E hinga so, Molenge ti Nzapa aga awe, lo mu na e lege ti hingango ndo si e hinga taa Nzapa. E na taa Nzapa, e ga oko na lege ti Molenge ti lo Jésus Christ. Lo laa lo yeke taa Nzapa, lo yeke fini so angba lakue lakue. 21Amolenge ti mbi, ala sara hange! Ala mu peko ti ayanda pepe!

will be added

X\