1 JEAN 4

1A-ita ti mbi so mbi ye ala mingi, tongana azo atene, ani yeke na Yingo ti Nzapa, ala yeda na ala kue pepe; me ayeke nzoni ala gi nda ti azo ni ti baa wala yingo so ala yeke na ni so alondo na Nzapa. Biani, awayanga-nzapa mingi ti mvene amu ndö ti dunia kue awe. 2Lege so ala lingbi ti hinga Yingo ti Nzapa ayeke so: zo so kue atene na yanga ti lo, Jésus Christ aga zo biani, lo yeke na Yingo so alondo na Nzapa. 3Me zo so kue abere tënë so, lo yeke na yingo so alondo na Nzapa pepe; yingo ni ayeke yingo ti Wato ti Christ. Ala ma atene, fade yingo ni ayeke ga; fadeso, lo yeke na dunia so awe. 4Ti ala amolenge ti mbi, ala yeke azo ti Nzapa. Ala hon ndö ti awayanga-nzapa ti mvene so awe, ngbanga ti so Yingo so ayeke na ya ti ala ayeke ngangu ahon lo so ayeke na dunia so. 5Azo ni ayeke azo ti dunia so. Ndani laa ala yeke tene tënë tongana azo ti dunia so si azo ti dunia ni ayeke ma ala. 6Me ti e, e yeke azo ti Nzapa. Zo so ahinga Nzapa ayeke ma tënë ti e; zo so ayeke zo ti Nzapa pepe, lo yeke ma tënë ti e pepe. Lege so laa e lingbi ti hinga popo ti Yingo ti taa-tënë na yingo so ayeke fa lege ti kirikiri. 7A-ita ti mbi so mbi ye ala mingi, ayeke nzoni e ye tere na popo ti e, ngbanga ti so ndoye alondo na Nzapa. Zo so kue aye mba ti lo, lo yeke molenge ti Nzapa si lo hinga Nzapa awe. 8Zo so aye mba ti lo pepe, lo hinga nga Nzapa pepe, ngbanga ti so Nzapa ayeke ndoye. 9Lege so Nzapa afa yengo so lo ye na e ayeke so: lo tokua oko Molenge ti lo na dunia so titene e duti na fini na lege ti lo. 10Nda ti tënë ti ndoye ayeke so: e laa e ye Nzapa pepe, me Nzapa laa aye e si lo tokua Molenge ti lo ti mu tere ti lo na sandaga ti zi asiokpari ti e. 11A-ita ti mbi so mbi ye ala mingi, so Nzapa aye e mingi so, alingbi e nga, e ye tere na popo ti e. 12Zo oko ade ti baa Nzapa pepe. Tongana e ye tere na popo ti e, Nzapa ayeke na e; so afa nga atene, na be ti e ndoye ti lo alingbi kue. 13Lege so e hinga e tene, e na Nzapa e ngba ti duti oko laa: lo mu na e Yingo ti lo. 14E baa na le ti e si e yeke tene na azo tënë so: Babâ atokua Molenge ti lo titene lo ga Wasongo azo ti dunia so. 15Zo so atene na yanga ti lo atene, Jésus ayeke Molenge ti Nzapa, lo na Nzapa angba ti duti oko biani. 16Ti e, e hinga so Nzapa aye e, nilaa e zia be ti e daa. Nzapa ayeke ndoye. Zo so angba na lege ti ndoye, lo na Nzapa angba ti duti oko biani. 17Tongana ndoye so ayeke na be ti e alingbi kue, na lango ti kota ngbanga, be ti e ayeke do pepe, ngbanga ti so dutingo ti e na dunia so ayeke tongana ti Jésus Christ. 18Ndo so ndoye ayeke daa, mbeto ayeke daa pepe; ndoye so alingbi kue ayeke tumba mbeto. Zo ayeke na mbeto, ngbanga ti so lo hinga atene, ngbanga ayeke ku lo. Zo so ayeke na mbeto, ndoye so alingbi kue, lo de ti hinga ni pepe. 19Ti e, e yeke na ndoye, ngbanga ti so Nzapa aye e kozoni. 20Tongana mbeni zo atene: “Mbi ye Nzapa” si be ti lo ake mba ti lo, andaa lo yeke zo ti mvene. Biani, mba ti lo so lo yeke baa lo, lo ye lo pepe, fade lo yeke ye Nzapa tongana nyen, Nzapa so lo yeke baa lo pepe so? 21Ndia so Christ amu na e ayeke so: zo so aye Nzapa, alingbi lo ye nga ita ti lo.

will be added

X\