1 JEAN 1

1Ye so ayeke ando daa ngbene ye na tongo nda ni, ye so e ma tënë ni na mê ti e, ye so e baa ni na le ti e, ye so e baa ni mbirimbiri si e ndu na maboko ti e, ye ni ayeke Tënë so ayeke mu fini na zo. 2Biani, fini so asigigi polele si e baa lo; e yeke tene tënë ti ye so e hinga na ndö ti lo, e yeke fa na ala tënë ti fini so angba lakue lakue, fini so ayeke ando na tere ti Babâ si asi na popo ti e. 3Ye so e baa si e ma tënë ni, e yeke tene tënë ni na ala titene ala nga ala yeke na beoko na e. Beoko so e yeke na ni na Babâ nga na Molenge ti lo Jésus Christ laa. 4E su tënë so na mbeti na ala si ngia ti e alingbi kue. 5Tënë so e ma na yanga ti lo si e yeke fa peko ni na ala ayeke so: Nzapa ayeke lumiere, vukongo ndo ayeke na ya ti lo oko pepe. 6Tongana e tene: e yeke na beoko na lo si e yeke tambula na ya ti vukongo ndo, andaa e yeke tene mvene, e yeke sara ye na lege ti taa-tënë pepe. 7Me tongana e yeke tambula na ya ti lumiere tongana ti so Nzapa wani ayeke na ya ti lumiere, andaa e yeke na beoko na amba ti e si mene ti Jésus, Molenge ti lo, ayeke sukula asiokpari ti e kue. 8Tongana e tene, e yeke na siokpari pepe, andaa e yeke handa tere ti e wani, taa-tënë ayeke na be ti e pepe. 9Tongana e fa siokpari ti e na Nzapa, lo so lo yeke bata tënë ti yanga ti lo si lo yeke nga mbirimbiri, fade lo yeke zi siokpari ti e si lo yeke sukula sioni ti e kue. 10Tongana e tene, e sara siokpari pepe, andaa e yeke sara si Nzapa aga zo ti mvene si tënë ti lo ayeke na be ti e pepe.

will be added

X\