1 KORENTE 8

1Âdu tënë ti anyama so a yeke ya na sandaga na anzapa nde, taa-tënë, tongana ti so ala yeke tene: “E kue e yeke azo ti hingango ye.” Hingango ye so ayeke sara si baba ahon ndö ti zo, me ndoye ayeke sara si zo ti Christ amai. 2Tongana mbeni zo abaa atene ni hinga ye, andaa lo de ti hinga ye alingbi na taa hingango ye pepe. 3Me tongana zo aye Nzapa, Nzapa ahinga lo awe. 4Tongaso, e lingbi ti te kasa ti anyama so azo aya na sandaga na anzapa nde so? E hinga so mbeni nzapa nde ayeke na dunia so pepe, Nzapa ayeke gi oko. 5Taa-tënë, ambeni ye ayeke na yayu wala na sese so azo abaa atene ayeke anzapa – anzapa na akota gbia ayeke mingi. 6Ti e, Nzapa ayeke gi oko, lo yeke Babâ so ye kue alondo na lo si e yeke na fini ndali ti lo. E yeke nga gi na Kota Gbia oko, Jésus Christ so na lege ti lo, ye kue abaa gigi si e yeke na fini na lege ti lo. 7Me azo kue laa ahinga ye so pepe. Ambeni zo ayeke gue ando na peko ti anzapa nde ngbii asi fadeso. Nilaa ala ngba ti te akasa ti nyama so a ya na sandaga, ala baa ti ala atene a mu anyama so na anzapa nde. Ndali ti so tënë ti be ti ala ade ti kpengba pepe, ala baa ti ala atene, ala ga sioni awe ndali ti nyama so ala te so. 8Kobe laa ayeke sara titene e ga nduru na Nzapa pepe. Ataa e te ni pepe, e yeke girisa ye oko daa pepe, ataa e te ni, e yeke wara ye oko daa pepe. 9A mu lege na ala ti sara ye kue, me ala sara hange si ndali ti sarango ye ti ala ni, mbeni zo so mabe ti lo akpengba pepe so ati pepe. 10Biani, mo so mo tene, mo yeke zo ti hingango ye, tongana mbeni zo so tënë ti be ti lo akpengba pepe abaa mo na tengo kobe na ya ti da ti anzapa nde, fade sarango ye ti mo ayeke pusu lo ti te nyama so a ya na sandaga na anzapa nde pepe? 11Ndali ti hingango ye ti mo, ita ti mo so akpengba pepe, lo so Christ akui ndali ti lo so, ayeke girisa lege. 12So ala yeke sara siokpari tongaso na tere ti a-ita ti ala si ala yeke buba tënë ti be ti a-ita ti ala so akpengba pepe so, andaa ala sara siokpari ti ke Christ. 13Ndani laa, tongana tengo mbeni kobe laa asara si ita ti mbi ati, fade mbi yeke zia lege ti tengo nyama biani biani, tongaso si ita ti mbi ati pepe.

will be added

X\