1 KORENTE 7

1Fadeso mbi yeke kiri tënë na ndö ti atënë so ala hunda na mbi na ya ti mbeti so ala tokua so. Ayeke nzoni titene koli amu wali pepe. 2Me ti sara si azo agi wali wala koli kirikiri pepe, ayeke nzoni koli oko oko ayeke na wali ti lo si wali oko oko ayeke na koli ti lo. 3Ayeke nzoni koli asara aye so kue alingbi lo sara na wali ti lo si wali asara nga aye so kue alingbi lo sara na koli ti lo. 4Wali ayeke na komandema na ndö ti tere ti lo wani pepe, me koli ti lo; koli nga ayeke na komandema na ndö ti tere ti lo wani pepe, me wali ti lo. 5Ala gbanzi tere ti ala na ndö ti gbogbo pepe, gi tongana ala ma tere na ya ti mbeni kete ngoi ti sambela. Na pekoni, ala kiri ti duti tongana ti kozo; tongaso pepe, fade ala yeke na ngangu ti kangango nzara ti tere pepe si Satan awara lege ti handango ala. 6Tënë so mbi yeke tene na ala so, mbi yeke mu yanga na ala pepe, me mbi yeke mu na ala lege ti sarango ni. 7Ti be ti mbi, mbi ye si azo kue aduti tongana mbi; me zo oko oko ayeke na matabisi so Nzapa amu na lo: mbeni amu wali wala koli si mbeni amu wali wala koli laoko pepe. 8Ala so ade ti mu wali wala koli pepe, na awali-mua, ayeke nzoni ala duti tongana mbi. 9Me tongana ala yeke na ngangu ti kangango nzara ti tere pepe, ayeke nzoni ala mu wali wala koli, ngbanga ti so mungo wali wala koli ayeke nzoni ahon titene nzara ti tere ahon ndö ti ala. 10Ti azo so amu wali wala koli awe, mbi yeke mu yanga so na ala (mbi laa mbi mu yanga ni pepe, me Kota Gbia laa amu yanga ni): alingbi wali akangbi na koli ti lo pepe. 11Tongana wali akangbi na koli ti lo, ayeke nzoni lo kiri lo mu mbeni koli pepe, wala lo kiri lo leke songo na koli ti lo. Ayeke nzoni koli atumba wali ti lo pepe. 12Ti atanga ti azo ni, mbi yeke tene tënë so na ala (tënë ni alondo na Kota Gbia pepe, me na mbi wani): tongana mbeni ita ayeke na wali so ama na be pepe si wali ni aye ti ngba ti duti na lo, alingbi lo tumba lo pepe. 13Tongana mbeni wali ayeke na koli so ama na be pepe si koli ni aye ti ngba ti duti na lo, alingbi lo tumba lo pepe. 14Biani, koli so ama na be pepe aga nduru na Nzapa na lege ti wali ti lo si wali so ama na be pepe aga nduru na Nzapa na lege ti koli ti lo. Tongana ye ni ayeke tongaso pepe, ka amolenge ti ala ayeke yongoro na Nzapa; andaa amolenge ni ayeke nduru na lo. 15Me tongana zo so ama na be pepe aye ti kangbi na wali ti lo wala na koli ti lo, lo lingbi ti sara ni senge. Zo so ama na be so, mbeni ye ti kanga lo na koli ni wala na wali ni ayeke daa pepe, ngbanga ti so Nzapa airi e ti duti na siriri. 16Mo wali so mo ma na be, mo hinga biani so mo yeke soo ande koli ti mo? Mo koli so mo ma na be, mo hinga biani so mo yeke soo ande wali ti mo? 17Ti tanga ti azo ni, alingbi zo oko oko angba na lege ti dutingo ti lo so Kota Gbia amu na lo, alingbi lo ngba na lege ti dutingo ti lo ni na ndembe so Nzapa airi lo. Ye so mbi yeke mu yanga daa na a-Eglize kue laa. 18Mbeni zo afâ ganza awe si Nzapa airi lo? Alingbi lo honde tënë ti ganza ti lo ni pepe. Mbeni zo ade ti fâ ganza pepe si Nzapa airi lo? Alingbi a fâ lo na ganza pepe. 19Fango ganza ayeke ye pepe, fango ganza pepe ayeke nga ye pepe. Kota ye ni ayeke titene zo asara ye alingbi na atënë ti yanga ti Nzapa. 20Alingbi zo oko oko angba na lege ti dutingo ti lo tongana ti so lo yeke na ni na ndembe so Nzapa airi lo. 21Mo yeke ando ngbaa si Nzapa airi mo? Mo gi be ti mo daa pepe. Me tongana lege ti sigigi na gbe ti ngbaa ni ayeke daa, ayeke nzoni mo sigigi. 22Biani, zo so ayeke ngbaa si Kota Gbia airi lo, andaa Kota Gbia azi lo na gbe ti ngbaa ni awe. Zo so ayeke ngbaa pepe si Kota Gbia airi lo, lo ga ngbaa ti Christ awe. 23Nzapa avo ala na kota ngere; ala kiri aga ngbaa ti azo pepe. 24A-ita, alingbi zo oko oko angba na lege ti dutingo ti lo na le ti Nzapa tongana ti so lo yeke na ni na ndembe so Nzapa airi lo. 25Ti ala so ade ti mu koli wala wali pepe, Kota Gbia amu na mbi yanga na ndö ti ala pepe; me mbi yeke fa tënë ti be ti mbi tongana ti zo so ala lingbi ti zia be ti ala na ndö ti tënë lo, ngbanga ti so Kota Gbia asara nzoni be na mbi. 26Ti be ti mbi, mbi tene: tongana zo aduti gi lo oko, so ayeke nzoni ndali ti so gigi ni aga ngangu fadeso awe. Taa-tënë, mbi baa ti mbi, mbi tene, ayeke nzoni zo aduti gi lo oko. 27Mo mu wali awe? Mo gi ti kangbi na lo pepe. Mo de ti mu wali pepe? Mo gi ti mu wali pepe. 28Me tongana mo mu wali, so ayeke siokpari pepe. Tongana mbeni maseka-wali amu koli, so ayeke siokpari pepe. Me azo so amu koli wala wali, ala yeke na nengo kungba na ndö ti go ti ala; mbi ye si ala yo kungba ni pepe. 29A-ita, tënë so mbi ye ti tene ayeke so: ngoi angba mingi pepe. Ti fadeso, akoli so ayeke na wali, alingbi ala duti tongana ti so ala yeke fade na wali pepe. 30Azo so ayeke toto, alingbi ala duti tongana ti so ala yeke toto fade pepe. Azo so be ti ala ayeke na ngia, alingbi ala duti tongana ti so be ti ala ayeke fade na ngia pepe. Azo so ayeke vo ye, alingbi ala duti tongana ti so ala yeke fade na ye pepe. 31Azo so ayeke wara anzoni ye ti dunia so, alingbi ala duti tongana ti so ala wara fade ni pepe. Biani, dunia ti fadeso, tongana ti so e yeke baa so ayeke hon hongo. 32Mbi ye titene ala gi be ti ala pepe. Koli so amu wali pepe, be ti lo ayeke gi na ndö ti aye ti Kota Gbia, lo yeke gi titene be ti Kota Gbia anzere na lo. 33Me koli so amu wali awe, be ti lo ayeke gi na ndö ti aye ti dunia so, lo yeke gi titene be ti wali ti lo anzere na lo; 34tongaso be ti lo ayeke na ndö ti aye use. Wali so amu koli pepe, na maseka-wali nga, be ti ala ayeke gi na ndö ti aye ti Kota Gbia titene ala bata tere ti ala na yingo ti ala nde ndali ti Nzapa. Me wali so amu koli awe, be ti lo ayeke gi na ndö ti aye ti dunia so, lo yeke gi titene be ti koli ti lo anzere na lo. 35Mbi yeke tene tënë so ndali ti nzoni ti ala wani, me mbi ye ti zia kuku na dawa ti ala pepe; mbi ye titene ala sara ye so ayeke na legeni mbirimbiri si ala mu be ti ala kue na Kota Gbia, gi na lo oko. 36Fadeso, tongana mbeni maseka-koli na mbeni maseka-wali so aleke tënë ti mungo tere, lo baa so lo lingbi ti sara sioni na maseka-wali ni, tongana nzara ti maseka-wali ni ahon ndö ti lo si lo leke na be ti lo ti mu lo ti ga wali ti lo, alingbi lo sara tongana ti so be ti lo aye; lo sara siokpari pepe. Ala use kue alingbi ti mu tere senge. 37Me koli ni alingbi ti leke na be ti lo ti zia lege ti mungo wali ni, ti duti na lo koli na wali pepe, lo sara nzoni. Tongana lo leke na be ti lo biani tongaso, so ti tene mbeni zo agbu lo na ngangu pepe si lo yeke na ngangu ti kanga nzara ti tere ti lo, ayeke nzoni lo na wali ni amu tere pepe. 38Tongaso, koli so amu tere na maseka-wali so lo ye ti mu lo, lo sara nzoni; me koli so amu tere pepe na maseka-wali ni, lo sara nzoni mingi. 39Wali so amu koli ayeke ngba na koli ti lo na ngoi so kue koli ni ayeke na fini. Tongana koli ni akui awe, lo lingbi ti mu mbeni koli nde senge tongana ti so be ti lo aye; gi ye oko, ayeke nzoni koli ni ayeke zo ti Christ. 40Me ti be ti mbi, tongana wali ni aduti gi lo oko, fade lo yeke duti na ngia mingi. Mbi nga, mbi hinga mbi tene, mbi yeke na Yingo ti Nzapa.

will be added

X\