1 KORENTE 6

1Na popo ti ala, tongana mbeni zo ayeke na tënë na mba ti lo, ngbanga ti nyen laa lo yeke gue na tënë ni ngbii na gbe ti azo so ahinga Nzapa pepe so? Lo lingbi fade ti gue na ni na gbe ti azo ti Nzapa pepe? 2Ala hinga pepe atene, azo ti Nzapa laa ayeke fâ ande ngbanga ti azo ti dunia so? So ala laa ayeke fâ ande ngbanga ti azo ti dunia so, ala lingbi ti fâ ngbanga ti akete kete tënë pepe? 3Ala hinga pepe atene, e laa e yeke fâ ande ngbanga ti a-ange? Tongana ye ni ayeke tongaso, atënë so ayeke londo na popo ti ala so, ala lingbi ti fâ ngbanga ni pepe? 4Tongana amara ti tënë tongaso ayeke londo na popo ti ala, ngbanga ti nyen si ala yeke gue na tënë ni na gbe ti azo so Eglize ayeke baa ala tongana asenge zo so? 5Mbi tene tënë so ti bi kamene na le ti ala. Na popo ti ala, mbeni zo ti ndara ti fâ ngbanga ti atënë na popo ti a-ita ti lo, azo ti Christ, ayeke daa pepe? 6Mbeni zo ti Christ ague na mba ti lo na ngbanga, lo gue na lo na gbe ti azo ti so ama na be pepe! 7So atënë ti guengo na azo na ngbanga ayeke na popo ti ala so, so afa atene, ala ti biani awe. Tongana azo aye ti sara sioni na ala wala ti nzi aye ti ala, ngbanga ti nyen laa ala ye ti kanga be ti ala daa pepe? 8Me ala laa ayeke sara sioni na amba ti ala si ala yeke nzi aye ti azo! Andaa azo ni so ayeke a-ita ti ala, azo ti Christ! 9Ala hinga pepe? Azo ti sarango sioni, fade Kodro-gbia ti Nzapa ayeke ga ti ala pepe. Ala handa tere ti ala pepe: azo ti gingo wali wala gingo koli kirikiri, azo ti vorongo anzapa nde, azo ti gingo wali wala koli ti amba ti ala, akoli so ayeke lango na amba ti ala akoli, 10azo ti nzi, azo so kota nzara ti warango ye ayeke na be ti ala, azo so ayeke ngbaa ti samba, azo ti dungo mvene na li ti amba ti ala, azo ti gbungo ye ti azo na ngangu, fade Kodro-gbia ti Nzapa ayeke ga ti ala pepe. 11Ambeni zo na popo ti ala ayeke ando tongaso. Me Nzapa asukula asioni ti ala awe, lo sara si ala ga nzoni kue si lo zia ala nde; lo sara si ala ga mbirimbiri na le ti lo na iri ti Kota Gbia Jésus Christ nga na lege ti Yingo ti Nzapa ti e. 12Ambeni zo ayeke tene: “A mu na mbi lege ti sara ye kue.” Taa-tënë, me ye kue laa ayeke sara nzoni na zo pepe. “A mu na mbi lege ti sara ye kue”, me mbi ye ti ga ngbaa ti mbeni ye oko pepe. 13Ambeni zo ayeke tene nga: “Kobe ayeke ndali ti ya si ya ayeke ndali ti kobe.” Taa-tënë, me Nzapa ayeke buba ande ya na kobe kue. Andaa tere ti zo ayeke titene lo sara na aye ti kirikiri pepe: tere ti zo ayeke ndali ti Kota Gbia si Kota Gbia ayeke ndali ti tere ti zo. 14Nzapa so azingo Kota Gbia na kuâ, fade lo yeke zingo nga e na kuâ na lege ti ngangu ti lo. 15Ala hinga pepe atene, tere ti ala ayeke mbage ti tere ti Christ? Fade mbi yeke mu mbage ti tere ti Christ ti sara si aga mbage ti tere ti wali-ndumba? Oko pepe! 16Ala hinga pepe atene, zo so aduti na wali-ndumba, lo na wali ni aga tere oko? Mbeti ti Nzapa atene: “Fade ala use kue ayeke ga gi tere oko.” 17Me zo so abongbi oko na Kota Gbia, lo na Kota Gbia aga oko na lege ti yingo. 18Ala kpe lege ti gingo wali wala gingo koli kirikiri! Atanga ti siokpari so kue zo ayeke sara ayeke ndu tere ti lo wani pepe; me zo so agi wali wala koli kirikiri, andaa lo sara sioni na tere ti lo wani. 19Ala hinga pepe atene, tere ti ala ayeke da so Yingo-Vuru ayeke duti daa? Yingo-Vuru so alondo na Nzapa si ayeke na ya ti ala. Ala yeke duti gi ndali ti ala wani pepe. 20Nzapa avo ala na kota ngere. Tongaso ala mu tere ti ala ti gonda na Nzapa.

will be added

X\