1 KORENTE 5

1Na ndo kue, azo ayeke ma atene, gingo wali wala gingo koli kirikiri ahon ndoni na popo ti ala. Ataa na popo ti azo so ahinga Nzapa pepe, mbeni zo ti sarango mara ti ye tongaso ayeke daa pepe! Azo atene, mbeni zo na popo ti ala ayeke duti na wali ti babâ ti lo! 2Na ndö ni kue, ala yeke pika kate ti ala daa! Ala lingbi fade ti duti na vundu ndali ti ye so pepe? Alingbi fade titene ala zi zo so asara mara ti ye tongaso na popo ti ala! 3Ti mbi, ataa so mbi yeke na popo ti ala pepe, na lege ti yingo, mbi yeke na popo ti ala. Tongaso mbi fâ ngbanga na li ti zo so asara mara ti ye ti sioni so awe, mbi sara ni tongana zo so ayeke na popo ti ala. 4Tongana ala yeke bongbi ande tere ti ala, mbi yeke na popo ti ala na lege ti yingo. Na iri ti Kota Gbia Jésus nga na ngangu ti lo, 5mbi hunda na ala ti zia mara ti zo tongaso na maboko ti Satan si Satan abuba tere ti lo, tongaso si yingo ti zo ni alingbi ti soo kuâ na lango ti gango ti Kota Gbia. 6Ye so ala yeke pika kate ti ala daa so, anzere oko pepe! Ala hinga pepe atene, gi kete mama ti mapa laa ayeke sara titene mapa ni kue alondo? 7Ala zi angbene mama ti mapa titene ala ga nzoni! Tongaso, fade ala yeke ga tongana fini farini so a gbu ya ni si a zia mama ti mapa daa pepe. Biani, ala ga tongana fini farini so a gbu ya ni awe, ngbanga ti so Christ ayeke taba ti Pake ti e so a mu lo na sandaga awe. 8Tongaso, e sara matanga ti Pake ni na ngbene mama ti mapa pepe, so ti tene na asiokpari na aye ti sioni; me e sara matanga ni na mapa so asara na mama ni pepe, so ti tene na vurungo be nga na tenengo taa-tënë. 9Na ya ti mbeti so mbi tokua na ala kozoni, mbi tene: “Azo so ayeke gi wali wala koli kirikiri so, ala sara songo na ala pepe.” 10Tënë so mbi tene lani so abaa pepe azo ti dunia so, so ti tene azo ti gingo awali wala akoli kirikiri, azo so kota nzara ti warango ye ayeke na be ti ala, azo ti nzi, wala azo ti vorongo anzapa nde. Tongaso pepe, alingbi fade titene ala sigigi na popo ti azo ti dunia so! 11Me mbi su mbeti so lani na ala si zo so atene, ni yeke ita ti ala, zo ti Christ si lo yeke gi wali wala koli kirikiri, kota nzara ti warango ye ayeke na be ti lo, lo yeke voro anzapa nde, lo yeke du mvene na li ti amba ti lo, lo yeke ngbaa ti samba, wala lo yeke zo ti nzi, alingbi ala sara songo na lo pepe, ala te nga kobe na mara ti zo tongaso pepe! 12Mbi laa mbi lingbi ti fâ ngbanga ti azo ti gigi? Alingbi ala fâ ngbanga ti azo ti ya ni! 13Ti azo ti gigi, Nzapa laa ayeke fâ ande ngbanga ti ala. Mbeti ti Nzapa atene: “Ala zi zo ti sioni so ayeke na popo ti ala.”

will be added

X\