1 KORENTE 14

1Ala gi lege ngangu ti ye amba ti ala. Ala sara nga nzara ti wara amatabisi ti Yingo, me matabisi so ala lingbi ti gi lege ni mingi ayeke tenengo peko ti tënë ti yanga ti Nzapa. 2Zo so ayeke tene tënë na mbeni yanga nde, lo yeke tënë ni na azo pepe, me na Nzapa. Zo oko ayeke ma ya ti tënë so lo yeke tene so pepe. Na lege ti Yingo-Vuru, lo yeke tene ambeni tënë so angba na hondengo ni. 3Me zo so ayeke tene peko ti tënë ti yanga ti Nzapa, lo yeke tënë ni na azo; lo yeke sara titene azo akpengba, lo yeke mu wango na ala si lo yeke sara titene be ti ala ade. 4Zo so ayeke tene tënë na mbeni yanga nde, lo yeke sara titene lo wani lo kpengba; me zo so ayeke tene peko ti tënë ti yanga ti Nzapa, lo yeke sara titene Eglize akpengba. 5Mbi ye titene ala kue atene tënë na ayanga nde nde, me mbi ye mingi titene ala tene peko ti tënë ti yanga ti Nzapa. Zo so ayeke tene peko ti tënë ti yanga ti Nzapa asara nzoni na azo ahon zo so ayeke tene tënë na ambeni yanga nde. Zo ti tenengo tënë na ambeni yanga nde ayeke sara nzoni na azo gi tongana mbeni zo na ya ti bongbi ni ayeke kiri peko ti tënë ni na azo na yanga ti kodro ti ala, ti sara titene Eglize ni akpengba. 6A-ita, tongana mbi si na popo ti ala si mbi tene tënë na ala na ambeni yanga nde, fade nzoni ye ti nyen laa ala yeke wara na mbage ti mbi? Mbi yeke sara nzoni na ala gi tongana mbi fa na ala mbeni ye so Nzapa afa na mbi, wala mbi fa na ala mbeni ye so ala hinga pepe, wala mbi tene na ala peko ti tënë ti yanga ti Nzapa, wala mbi fa na ala mbeni ye! 7E mu tapande ti aye ti mozoko tongana ngoli na kundi: tongana ala toto nzoni pepe, fade zo ahinga go ti bia so ngoli wala kundi ayeke sigigi na ni so tongana nyen? 8Tongana zo ahuru tatalita si azo ama ya ti tënë ni nzoni pepe, zo wa laa alingbi ti leke tere ti lo ti gue na bira? 9Ala nga, tongana ala tene tënë so le ni avuru pepe, fade azo ayeke ma ya ti tënë ni tongana nyen? Ala yeke tene tënë ni gi na ya ti pupu! 10Ayanga ti kodro ayeke mingi na ndö ti dunia so si yanga oko oko ayeke fa nda ti mbeni ye. 11Me tongana mbi ma yanga ti kodro ti mbeni zo pepe, zo ni ayeke baa mbi tongana wande si mbi nga, mbi yeke baa lo tongana wande. 12So ala yeke na nzara mingi ti wara amatabisi ti Yingo, ayeke nzoni ala gi ti wara amatabisi so ayeke sara titene Eglize akpengba. 13Ndani laa, zo so ayeke tene tënë na ambeni yanga nde, alingbi lo sambela titene Nzapa amu na lo matabisi ti kiri peko ti tënë ni si azo ama. 14Tongana mbi yeke sambela na ambeni yanga nde, yingo ti mbi ayeke sambela, me hingango ndo ti mbi ayeke sara kua oko pepe. 15Fade mbi yeke sara nyen? Mbi yeke sambela na lege ti yingo, me mbi yeke sambela nga na lege so azo alingbi ti ma ya ni; mbi yeke he bia na lege ti yingo, me mbi yeke he nga bia na lege so azo alingbi ti ma ya ni. 16Tongana mo yeke sambela ti mu singila na Nzapa gi na lege ti yingo ti mo, fade senge zo ti ya ti bongbi ni ayeke wara lege ti tene “Amen” na peko ti sambela ti mo ni tongana nyen, so lo ma ya ti tënë ti mo ni pepe so? 17Ataa sambela ti mo ayeke nzoni mingi, fade sambela ni ayeke kpengba mba ti mo pepe. 18Mbi mu singila na Nzapa, ngbanga ti so mbi yeke tene tënë na ambeni yanga nde, mbi hon ala kue. 19Me tongana mbi yeke na ya ti Eglize, mbi ye ti tene atënë oku so azo alingbi ti ma ya ni ahon titene mbi tene atënë saki baleoko na ambeni yanga nde. Tongaso mbi yeke fa nga ye na atanga ti azo. 20A-ita, ayeke nzoni gbungo li ti ala ayeke tongana ti amolenge pepe. Tongana ayeke tënë ti sarango sioni, ala ga tongana akete molenge so ahinga ti sara sioni pepe; me ayeke nzoni gbungo li ti ala ayeke tongana ti akota zo. 21Na ya ti mbeti ti Ndia, “Kota Gbia atene: “Fade mbi yeke mu azo so ayeke tene tënë na mbeni yanga nde titene ala tene peko ti tënë ti mbi na azo so; mbi yeke tene tënë na ala na lege ti yanga ti awande. Ataa so kue, ala yeke ma tënë ti mbi pepe.” 22Tongaso, ti tenengo tënë na ambeni yanga nde so Yingo ayeke mu na zo, ye ni ayeke tongaso: ti azo so ama na be, ayeke fa ye ti Nzapa na ala pepe, me ti azo so ama na be pepe, ayeke fa ye ti Nzapa na ala. Me ti tenengo peko ti tënë ti yanga ti Nzapa, ye ni ayeke tongaso: ti azo so ama na be pepe, tënë ni ayeke ndali ti ala pepe, me ti azo so ama na be, tënë ni ayeke ndali ti ala. 23Tongana azo ti Eglize kue abongbi si azo kue ayeke tene tënë na ambeni yanga nde, tongana ambeni senge zo wala azo so ama na be pepe ali na popo ti ala, fade azo ni ayeke tene, mbeni ye asara li ti ala sarango pepe? 24Me tongana ala kue ayeke tene peko ti tënë ti yanga ti Nzapa si mbeni senge zo wala zo so ama na be pepe ali na popo ti ala, fade atënë so kue lo ma so ayeke fâ ngbanga na li ti lo si ayeke sara titene lo hinga sioni ti lo; 25atënë ti be ti lo asigigi polele si lo yeke kuku na sese ti voro Nzapa; lo yeke tene na yanga ti lo, lo tene: “Nzapa ayeke na popo ti ala biani.” 26Tongaso a-ita, fade e yeke sara tongana nyen? Tongana ala bongbi, mbeni zo na popo ti ala alingbi ti he mbeni bia, mbeni afa ye wala lo tene tënë ti mbeni ye so Nzapa afa na lo, mbeni atene tënë na ambeni yanga nde, mbeni akiri peko ti tënë ni na yanga ti kodro titene azo ama ya ni. Aye so kue ala yeke sara, alingbi ala sara ni titene azo ti Eglize akpengba. 27Tongana ala yeke tene tënë na ambeni yanga nde, alingbi azo use wala ota laa atene tënë, so alingbi. Mbeni atene ti lo ahunzi awe si mbeni atene ti lo, me alingbi mbeni zo akiri peko ti tënë ni na yanga ti kodro so ala yeke ma ya ni. 28Tongana zo ti kiringo peko ni na yanga ti kodro ayeke daa pepe, alingbi ita ni akai na ya ti bongbi ni: lo tene tënë ni na ya ti be ti lo ndali ti lo wani, nga ndali ti Nzapa. 29Ti azo so ayeke tene peko ti tënë ti yanga ti Nzapa, alingbi azo use wala ota laa atene tënë, atanga ni ama ni si ala gi ya ni. 30Tongana Nzapa afa mbeni ye na mbeni zo ti ya ti bongbi ni, alingbi zo so ayeke tene tënë akai. 31Ala kue alingbi ti tene peko ti tënë ti yanga ti Nzapa, me ayeke nzoni mbeni zo atene ti lo tënë ni ahunzi awe si mbeni atene ti lo. Tongaso si azo kue amanda ye si ala kpengba. 32Zo so ayeke tene peko ti tënë ti yanga ti Nzapa, lo yeke na ngangu na ndö ti matabisi so Yingo amu na lo. 33Biani, Nzapa ayeke Nzapa ti wusuwusu pepe, me lo yeke Nzapa ti siriri. Tongana ti so azo ayeke sara na ya ti a-Eglize ti Nzapa kue, 34alingbi awali akai na ya ti bongbi: a mu lege na ala ti tene tënë pepe; ala ma yanga tongana ti so Ndia afa. 35Tongana ala ye ti hinga nda ti mbeni ye, ala hunda akoli ti ala na yanga-da. So ayeke na legeni pepe titene wali atene tënë na ya ti abongbi. 36Tënë ti Nzapa alondo na ala si aga? Gi ala oko laa tënë ni asi na ala? 37Tongana mbeni zo abaa atene, ni yeke wayanga-Nzapa wala zo so Yingo ti Nzapa ayeke na ya ti lo, alingbi lo hinga lo tene, tënë so mbi yeke su na mbeti ti tokua na ala so, ayeke tënë ti yanga ti Kota Gbia. 38Tongana mbeni zo ahinga ye so pepe, Nzapa ahinga nga lo pepe. 39Tongaso a-ita, ala gi lege ti tenengo peko ti tënë ti yanga ti Nzapa, me tongana azo atene tënë na ambeni yanga nde, ala kanga lege na ala pepe. 40Ala sara ye kue na legeni, me na ya ti wusuwusu pepe.

will be added

X\