1 KORENTE 10

1A-ita, mbi ye ti dabe ti ala na ye so asi ando na akotara ti e: ala kue atambula na gbe ti mbinda, ala kue ahon na ya ti kota ngu-ingo na gere. 2Akotara ti e ni kue awara bateme na ya ti mbinda nga na ya ti kota ngu-ingo, ngbanga ti so ala ga oko na Moïse. 3Ala kue ate gi oko kobe ti yingo, 4ala kue anyon nga gi oko ngu ti yingo, ngbanga ti so ala yeke nyon ando ngu so alondo na ya ti kota têne ti yingo so ayeke tambula na peko ti ala, kota têne ni ayeke Christ. 5Me ambeni mingi na popo ti ala ayeke nzoni na le ti Nzapa pepe, ndani laa, ala kui kirikiri na ya ti benyama. 6Aye so asi na ala titene e manda ye na lege ni si nzara ti aye ti sioni so asara ala ando so asara e pepe. 7Ala azo ti Christ, ala voro anzapa nde pepe tongana ti so ambeni zo na popo ti akotara ti ala avoro ala ando. Mbeti ti Nzapa atene: “Azo ni aduti ti te, ti nyon si na pekoni, ala londo ti sara ngia.” 8E mu tere ti e pepe ti gi na wali wala koli kirikiri tongana ti so ambeni zo na popo ti akotara asara ando si azo saki baleuse na ota akui na ya ti lango oko so. 9E tara be ti Christ pepe tongana ti so ambeni na popo ti akotara asara ando si angbo ate ala, ala kui so. 10Ti hunzi na ni, ala diko tënë na gbe ti go ti ala pepe tongana ti so ambeni na popo ti akotara asara ando si ange ti kuâ afâ ala so. 11Aye so asi ando na akotara ti e titene e manda ye na lege ni. A su ni na mbeti ti gboto mê ti e, ngbanga ti so e yeke na ngoi so nda ti aye kue aga nduru ti si awe. 12Tongaso, zo so abaa atene, lo yeke luti na nduzu, lo sara hange si lo ti pepe. 13Aye ti tarango be so kue asi na ala ayeke aye so ayeke si na azo kue. Nzapa ayeke sara ye alingbi na tënë ti yanga ti lo: lo lingbi ti zia ala titene aye ti tarango be ahon ngangu ti ala pepe. Me tongana ye ti tarango be asi, fade Nzapa ayeke mu na ala ngangu titene ala kanga be ti ala daa, lo yeke mu nga na ala lege ti sigingo na ya ni. 14Ndani laa, a-ita ti mbi so mbi ye ala mingi, ala kpe lege ti vorongo anzapa nde! 15Mbi yeke tene tënë so na ala tongana azo ti hingango ndo. Ala wani agbu li ti ala na ndö ti tënë so mbi tene so. 16Kopo so e yeke mu singila na Nzapa ndali ni si e yeke nyon ni so, ni laa ayeke sara titene e duti na beoko na mene ti Christ pepe? Mapa so e yeke fâ ya ni, ni laa ayeke sara titene e duti na beoko na tere ti Christ pepe? 17So mapa ni ayeke gi oko, e kue e bongbi, e ga tere oko, ngbanga ti so e kue e yeke te gi mapa oko so. 18Ala baa azo ti Israel: ala so ayeke te anyama so a ya na sandaga na Nzapa na ndö ti gbalaka, ala yeke na beoko na Nzapa. 19Tënë ti nyen laa mbi ye ti tene? Nyama so a ya na sandaga na anzapa nde ayeke mbeni ye? Wala mbeni nzapa nde ayeke mbeni ye? 20Oko pepe! Me asandaga so azo ayeke mu, ala yeke mu ni na asioni yingo, me na Nzapa pepe. Andaa mbi ye pepe titene ala sara beoko na asioni yingo. 21Ala lingbi ti nyon ye na ya ti kopo ti Kota Gbia nga na ya ti kopo ti asioni yingo legeoko pepe; ala lingbi ti te kobe ti Kota Gbia na kobe ti asioni yingo legeoko pepe. 22Wala e ye ti sara ye tongaso titene Nzapa asara mbanda? Ala baa ti ala atene, e yeke na ngangu e hon lo? 23Ambeni zo ayeke tene: “A mu na zo lege ti sara ye kue”. Taa-tënë, me ye kue laa ayeke sara nzoni na zo pepe. “A mu na zo lege ti sara ye kue”, me ye kue laa asara si Eglize amai pepe. 24Alingbi zo oko oko agi gi nzoni ti lo wani pepe, me lo gi nzoni ti amba ti lo. 25Ala lingbi ti te aye so kue a yeke ka na gara, me ala hunda nda ni pepe, ataa so ala yeke gi be ti ala. 26Biani, sese na aye so kue ayeke na ndö ni ayeke ti Kota Gbia. 27Tongana mbeni zo so ahinga Nzapa pepe airi ala ti te kobe si ala yeda ti gue, ayeke nzoni ala te ye so kue lo yeke mu na ala; me ala hunda nda ni pepe, ataa so ala yeke gi be ti ala. 28Me tongana mbeni zo atene na ala: “Kasa ti nyama ni ayeke ti nyama so azo aya na sandaga na anzapa nde”, ala te ni pepe, ndali ti zo so atene tënë ni na ala so, tongaso si be ti zo ni agi ti lo pepe. 29Mbi yeke tene tënë ti be ti ala pepe, me mbi yeke tene tënë ti be ti zo so atene tënë ni na ala so. Ye so mbeni zo abaa na be ti lo tongana nzoni ye wala sioni ye, ngbanga ti nyen si alingbi ti kanga lege na mbi ti sara ye so be ti mbi aye? 30Tongana mbi mu singila na Nzapa ndali ti kobe so mbi yeke te, ngbanga ti nyen azo ayeke kasa mbi ndali ti kobe so mbi mu singila ndali ni? 31Tongaso, ataa ala yeke te, ataa ala yeke nyon, ataa ye so kue ala yeke sara, ala sara ni kue ndali ti gonda ti Nzapa. 32Na lege ti sarango ye ti ala, ala sara si mbeni zuife, wala mbeni zo ti mbeni mara nde, wala mbeni zo ti Eglize ti Nzapa ati pepe. 33Ala sara ye tongana mbi: mbi yeke gi lege ti sara kue titene mbi ga nzoni na le ti azo kue. Mbi yeke gi gi nzoni ti mbi wani pepe, me mbi yeke gi nzoni ti azo mingi si ala soo kuâ.

will be added

X\