KORINTO RYA KABIRI 4

1Ni co gituma tutihebura, kuko dufise ubwo busuku, nk'uko twagiriwe ikigongwe. 2Twanse ibiteye isoni bikorerwa mu mpisho, ntitugenda mu bugunge, ntidufudika ijambo ry'Imana, ariko kwerekana ukuri ni kwo twishimagirisha mu maso y'Imana ku mutima w'umuntu wese. 3Ariko namba ubutumwa bwiza twahawe butwikirwa, butwikirirwa abahona, 4ni bo batizera, bamwe ikigirwamana c'iki gihe cahumye imitima, ngo umuco w'ubutumwa bw'ubwiza bwa Kristo ntubakire, ni we shusho y'Imana. 5Kuko tutigisha abantu ivyacu, ariko tubigisha ivya Kristo Yesu ko ari we Mwami, natwe yuko turi abashumba banyu ku bwa Yesu. 6Imana, imwe yavuze ngo umuco wake, uvuye mu mwiza, ni yo yakiye mu mitima yacu, kwerekana umuco, ni wo kumenya ubwiza bw'Imana buri mu maso ha Yesu Kristo. 7Ariko dufise ubwo butunzi mu nzavya z'ibumba, ngo ubushobozi buhebuje bube ubwo Imana, butavuye kuri twebwe. 8Dusugerezwa impande zose, ariko ntidushika mu mpatane; turazazanirwa, ariko ntituranduka umutima; 9turahamwa, ariko ntiduhebwa; dukubitwa hasi, ariko ntitugwaho. 10Imisi yose tugendana mu mubiri urupfu rwa Yesu, ngo ubugingo bwa Yesu na bwo buserukire mu mubiri wacu. 11Kuko twebwe abariho, na ntaryo dutangwa ngo dupfe baduhora Yesu, ngo ubugingo bwa Yesu na bwo buserukire mu mubiri wacu uzopfa. 12Nuko rero urupfu rudukoreramwo, ariko ubugingo bubakoreramwo. 13Ariko ko dufise uwo mutima wizera, uboneka mu vyanditswe, ngo nizeye, ni co catumye mvuga; natwe nyene turizera, ni co gituma tuvuga. 14Kuko tuzi yuko iyazuye Umwami Yesu, natwe izotuzurana na Yesu, kandi izomudushira, twe namwe. 15Kuko ivyo vyose biba ku bwanyu, kugira ngo ubuntu bw'Imana bwongeranishwe n'ukugwira kw' abantu, bugwize ishimwe, ngo ritere Imana icubahiro. 16Ni co gituma tutihebura; ariko, naho umuntu wacu wo ku rukoba ariko arabora, umuntu wacu w'imbere yama ahinduka musha uko bukeye. 17Kuko amarushwa yacu ahwahutse y' akanya ka none yiyongeranije cane kudushikiriza ubwiza buremereye bw'ibihe bidashira. 18Natwe ntituraba ku biboneka, ariko turaba ku bitaboneka; kuko ibiboneka ari ivyo igihe gito, ariko ibitaboneka bikaba ivyo ibihe bidashira.

will be added

X\