Remarja 3

1Kanna putchau tumendar: Hi kowa i biboldenge bud moldo, te hi le win rodedo mank i wawar menshende un tchindlo ap pengro mass? 2Awa, kowa hi lenge bud moldo. Jon lan o Debleskre laba an lengre wasta. 3Ninna te djan le gar lauter ap o Debleskro drom, rikras o Dewel peskro lab, un tchiwas len gar ap i rig. 4Na-a, kowa kras lo gar. O Dewel hi tchatcho. Hako mensho hi i chocheno. An i Debleskri gili hi tchindlo: Tu, mo Dewel, lauter, hoi rakreh, hi tchatcho. Kek nai well te penell, kai tire laba gar tchatcho hi. 5Kanna putchau tumendar: Hi i menshen gar tchatcho, te penenn le: "Hi maro tchilatchepen baro, well o Debleskro latchepen bareder. Doleske hi o Debles gar tchatcho, te dell lo men i phagi." 6Na-a, len hi gar tchatcho! O Dewel djal pal o tchatchepen. Te djals o Dewel gar pal o tchatchepen, nai rakrals lo gar o tchatchepen win pral i tsele menshende. 7I menshe nai penans ninna: "Mer te chochah, palle well diklo, har baro o Debleskro tchatchepen hi. Un job well sharedo. Hoske dell lo men i phagi? 8Kras tchilatcho koowa, te well latcho koowa dran koleste!" Hi menshe koi, kai rakrenn djungeles pral mende un penenn, mer penams i menshenge: "Kras tchilatcho koowa, te well latcho koowa dran koleste!" Kowa penah mer gar! Tchatchepaha, kolla, kai penenn kowa, lenn pengri phagi. 9Hoi hi kanna? Hi i bibolde feteder glan o Debleste tardo har kolla, kai kek bibolde hi? Na-a, jaake har penom: I bibolde, har kolla, kai kek bibolde hi, halauter kran tchilatcho koowa. 10An o Debleskro lab hi tchindlo: Kek mensho hi tchatcho glan o Debleste, kek. 11Kek mensho hi gosewo. Kek rodell o Debles. 12Halauter mukan o tchatcho drom un molenn tchi. Kek krell, hoi mishto un latcho hi, kek. 13Dran lengro mui well merepen. Ap lengri tchip hi chochepen. Lengro rakepen anell o merepen har i sapa, hoi dandrenna. 14Jon hi pherdo koshepen un praassepen. 15Jon hi sik, te marenn le. 16Kote, kai jon djana, mukenn le bibacht un ropen pal pende. 17Ko drom, kai i menshe pen gar tchingrenna, prindjrenn le gar. 18O Deblestar darenn le gar. Lestar kamenn le tchi te djinell. 19Mer djinah: Kowa, hoi an o Moseskre laba penlo hi, hi kolenge penlo, kai lan kol laba. Kolla hi i bibolde. Jaake nai penell kek mensho, witar kek biboldo: Man hi kek doosh. Kek mensho krell o tchatchepen. Doleske hi kek mensho tchatcho glan o Debleste. 20Te kamell lo te krell, hoi o Dewel an o Moseskre laba penell, haiwell lo ninna, te nai krell lo kowa gar. Kol laba sikrenn les, te hi lo tchilatcho glan o Debleste. 21- 22Un kanna, ap kau tsiro, sikras men o Dewel, har krell lo i menshen tchatcho glan peste. Jon wenn gar tchatcho, te rikrenn le pen ap o Moseskre laba, kai penenna, har te djiwenn le. Na-a, o Dewel krell hakenes tchatcho glan peste, kai patsell ap o Jesus Kristeste. Jaake hi kowa an o Moseskre lila tchindlo. Ninna o Debleskre rakepangre penan kowa i menshenge glan i raha tsiro. Doleske hi i bibolde gar feteder har kolla, kai kek bibolde hi. 23Lauter kran o tchilatchepen un wan pale-tchiddo glan o Debleste. 24Un o Dewel krell len tchitcheske tchatcho un erligo dran leskro baro latchepen. O Jesus Kristo plaissras lenge peskro rateha. 25O Dewel bitchras les, te merell lo ap o trushel kolenge, kai ap leste patsenna. Leskro rateha, hoi job ap o trushel ratas, thowas o Dewel mari doosh mendar krik. Jaake dikah, o Dewel hi latcho un tchatcho un lell i menshendar lengri doosh krik. 26I raha tsiro rikras o Dewel peskri choli pale, un das len kek phagi. Kanna, ap kau tsiro meras o Jesus lenge, un las lengri phagi ap peste. Jaake sikrell o Dewel peskro tchatchepen. Job hi tchatcho. Ninna krell lo koles tchatcho, kai ap o Jesus Kristeste patsella. 27Koon nai sharell pes kanna? Kowa, kai rikras pes ap kol laba, hoi penenna, har te djiwas? Na-a, les hi tchi, te sharell lo pes. Kowa hi tchatcho glan o Debleste, kai ap o Jesus Kristeste patsella. 28Jaake djinah, o mensho well tchatcho glan o Debleste, te patsell lo ap o Jesus Kristeste, un gar, te djiwell lo pal kol laba, hoi penenn, har te djiwas. 29O Dewel hi gar kokres i biboldengro Dewel. Na-a, job hi ninna o Dewel kolenge, kai kek bibolde hi. 30Job hi ko jek Dewel. Kowa krell kolen tchatcho, kai ap o Jesus Kristeste patsenna: i bibolden har kolen, kai kek bibolde hi. 31Witsrah mer kanna kol laba ap i rig, kai o Dewel penella, har te djiwas? Na-a, kanna, kai patsah, nai krah tchatchepaha, hoi o Dewel kamella.

will be added

X\