Debleskro tsiro 8

1Un har o tarno bakro i eftati dori pre pandas, hoi ko liil khetne rikras, rakras kek buder an o bolepen. I tikno tsiro rakran le tchi buder. 2Un me dikom kol efta bolepangren, kai glan o Debleskro beshepaskro tardo hi. Kolla lan efta bashepangren, te phurdenn le dre. 3Un i wawar bolepaskro was, un djas pash o Debleskri jag. Les his i sonakaskro tcharo an o wast, an koleste gudlo kasht chatchedo wella, hoi mishto sungella. Un ko bolepaskro las bud gudlo kasht, te chatchrell lo les ap o Debleskro sonakaskro bob, hoi glan o Debleskro beshepaskro tardo hi, te well o latcho sungepen khetne o mangepaha, hoi o Debleskre tchawe o Deblestar mangan. 4Un ko latcho sungepen hadas pes pre dran leskro wast, un djas glan o Debleste khetne o mangepaha kol Debleskre menshendar. 5Un ko bolepaskro las ko tcharo, an koleste ko gudlo kasht chatchedo wella, un kras les pherdi jag, hoi job dran o Debleskri jag las, un tchoras o tcharo wi ap i phub. Koi das jag karje pral un tele, un das bari soreli gole, har koi gole, hoi o bolepen krella, te dell baro brishin, un te djal jag tele ap i phub. Un i phub trissas soreles. 6Un kol efta bolepangre, kai his len kol efta bashepangre, lan len an i wasta, te phurdenn le dre. 7Un o glanstuno phurdas an peskri bashepaskri. Koi das brishin, hoi his har barra, un jag o rateha mashkral ap i phub. Un o triinto kotar i tseli phubjatar chatchras, un o triinto kotar i tsele rukendar chatchras, ninna o tselo senlepen. 8Un o duito bolepaskro phurdas an peskri bashepaskri. Koi was i bari kotar bar, hoi chatchella, an o baro pani witsedo. Un o triinto kotar o tselo baro panjestar was har o rat. 9Koi meras o triinto kotar lauterestar, hoi an o baro pani djiwas. Ninna hako triinto panjeskro ulepaskro djas paash. 10Un ko triinto bolepaskro phurdas an peskri bashepaskri: Un i bolepaskri momeli chatchas har jag, un peras tele ap i phub. Un koja peras ap o triinto kotar hako lengsto panjestar, ninna ap ko pani, hoi wella dran i phub wi. 11Un koi bolepaskri momeli kharell shut. Un o triinto kotar kol panjestar was shutlo. Un bud kol menshendar, kai pijan ko pani, meran lestar. 12Un o starto bolepaskro phurdas an peskri bashepaskri. Un o kham las i dab, un o triinto kotar lestar was kalo. Ninna o tchon un i wawar bolepangre momlia lan i dab. Un o triinto kotar lendar was kalo. Jaake chatchas o kham gar ap o triinto kotar ap o diwes, witar gar chatchan o tchon un i bolepangre momlia ap o triinto kotar an i rati. 13Un me dikom dur pral ap o bolepen i baro tchirkles, un shunom, har job gole das: Bibacht, bibacht, bibacht! Te phurdenn i wawar triin bolepangre an pengre bashepangren, palle wella i bari bibacht ap kolende, kai ap i phub djiwenna.

will be added

X\