Debleskro tsiro 7

1Un pal kowa dikom me star bolepangren. Kolla his tardo ap kol star riga i phubjatar, un rikran ko sorelo ducho pale, hoi phurdell dran hake star riga pral i phub. Jon rikran les pale, te phurdell lo gar pral i phub, witar gar pral o baro pani, witar gar pral i tsele ruka. 2Un me dikom i wawar bolepaskres. Kowa was kol rigatar, kai o kham pre djala. Un job kras i sikepen ap kolende, kai o djido Debleske koi hi. Un job das soreles gole ap kol star bolepangre, kolen i soor dino was, te dukrenn le i phub un o baro pani. 3Un job penas ap lende: "Ma dukrenn i phub un o baro pani, witar gar i ruka, jaake raha har mer kram gar i sikepen glan ap i shere kolendar, kai maro Debleske budran." 4Un me shunom kitse menshe ko sikepen lan. Kolla his jek-sheel-te-star-deesh-te-star serja menshe (144.000), kai wan dran i tsele menshendar, kai wenna pal i deesh-te-dui Israeleskre tchawende. 5- 8Deesh-te-dui serja wenna dran o Juda. Deesh-te-dui serja wenna dran o Ruben. Deesh-te-dui serja wenna dran o Gad. Deesh-te-dui serja wenna dran o Asser. Deesh-te-dui serja wenna dran o Naftali. Deesh-te-dui serja wenna dran o Manasse. Deesh-te-dui serja wenna dran o Simeon. Deesh-te-dui serja wenna dran o Levi. Deesh-te-dui serja wenna dran o Issachar. Deesh-te-dui serja wenna dran o Sebulon. Deesh-te-dui serja wenna dran o Josef. Deesh-te-dui serja wenna dran o Benjamin. 9Pal kowa dikom me bud menshen, jaake bud, te nai penell kek, kitse jon hi. Kolla wenna dran hako them, haki nationa, haki harmenationa un hako rakepen. Un jon his khetne tardo glan o rajeskro beshepaskro un glan ko tarno bakro. Len his parne ripja ap lende un bare patria an lengre wasta. 10Un jon dan soreles gole: "Mer sharah maro Debles, kai ap o rajeskro beshepaskro beshdo hi un ko tarno bakres! Jon lan men win dran o tchilatchepen un o merepen." 11Un i tsele bolepangre his tardo trul o rajeskro beshepaskro un trul i tchatchepangre phurende un trul i star sorele bolepangre. Un jon witsran pen glan o rajeskro beshepaskro tele o mujeha ap i phub, un sharan o Debles. 12Un jon penan: "Hi mishto, te giwas mer gilja maro Debleske, hoi les hadenna, un hoi les bares krenna. Leskro railepen un goswepen hi baro. Hi mishto, te parkras men pash leste, un te sharas les. Les hi bari soor, kanna un hako tsireske. Amen!" 13Un jek kol tchatchepangre phurendar putchas mandar: "Koon hi kolla, kai hi len parne ripja ap lende? Kai wan le?" 14Un me penom ap leste: "Miro rai, tu djineh les." Un job penas ap mande: "Kolla wan soreles palla lino, un wan wi dran ko pharo tsiro. Un jon thowan pengre ripja, un kran len parno an o tarno bakreskro rat." 15Doleske hi le tardo glan o Debleskro beshepaskro un hi leskre rashaja an leskro kheer, un hi leske koi o tselo diwes un i tseli rat. Un kowa, kai ap o Debleskro beshepaskro beshdo hi, djiwell pash lende, un dell jak ap lende. 16Un jon hunte bokenn buder gar, witar gar trushenn le buder. Un o kham chatchrell len buder gar, witar kek wawar tatepen. 17O tarno bakro, hoi mashkral o Debleskro beshepaskro hi, kowa dell ap lende garda, har i bakrengro rai ap peskre bakre garda della, un anell len pash o pani, hoi o djipen della. Un o Dewel khossell hake swar ap lengre jaka tele.

will be added

X\