Debleskro tsiro 5

1Un me dikom i liil an o tchatcho wast kolestar, kai ap o rajeskro beshepaskro beshdo hi. Ap ko liil his dren un win tchomone tchindlo. Un ko liil his khetne pandlo efta dorjentsa. 2Un me dikom i sorelo bolepaskres, kowa das soreles gole: "Koon hi moldo, te nai krell lo ko liil pre, te dikell lo dre?" 3Un an o bolepen, un ap i phub, un tel i phub his kek koi, kai hi moldo, te krell lo ko liil pre, te dikell lo dre. 4Un har dikom, te his kek moldo, te krell lo ko liil pre, te dikell lo dre, koi rowom soreles. 5Un jek kol tchatchepangre phurendar penas ap mande: "Ma rob! Dik, jek las i soor o Deblestar pral o tchilatchepen un o merepen, un hi moldo, te krell lo ko liil pre, te dikell lo dre. Job hi kowa, kai kharenn le lewo, kai well dran o them Juda. Job hi o Davideskro tchawo." 6Un me dikom i tarno bakres pash o rajeskro beshepaskro, hoi wi-dikas, har wals lo maredo. Kowa hi tardo mashkral kol star sorele bolepangre un kol tchatchepangre phurende. Les hi efta shinga un efta jaka. Kol efta jaka hi o Debleskro Ducho, hoi pral i tseli phub win bitchedo was. 7Un o tarno bakro was pash koleste, hoi ap o rajeskro beshepaskro beshdo his, un las ko liil dran leskro tchatcho wast. 8Un har job las o liil, peran kol star sorele bolepangre un kol biish-te-star tchatchepangre phure glan o tarno bakro tele. Un hakenes lendar his i bashepaskri. Un jon bashran i shukar bashepen. Len his ninna sonakangre tchare pherdo gudlo kasht, hoi o Debleske chatchedo wella, un mishto sungella. Un kowa his o mangepen, hoi o Debleskre menshe pengro Deblestar mangan. 9Un jon giwenn i newi gili, un penenn: Tu hal moldo, te less ko liil, un te kress ko liil pre. Tu wal maredo, un plaissral tiro rateha, te giness menshen tiro Debleske. Kolla wenna dran hako them, haki nationa, haki harmenationa un hako rakepen. 10Un tu kreh lendar raja un rashaja maro Debleske. Un jon wenn raja pral i tseli phub. 11Un me dikom un shunom bud bolepangren tardo trul o rajeskro beshepaskro, un trul kol star sorele bolepangre, un trul kol tchatchepangre phurende. Jon his jaake bud har deesh serja (10.000) kope deesh serja un jek sero kope jek sero. 12Un jon giwenn soreles: O tarno bakro, hoi was maredo, kowa hi moldo, te well les i bari soor, ninna o brawlepen, un o goswepen, un o sharepen, un o railepen, un i gilja, hoi les hadenna, un bares krenna. 13Un me shunom i gili, hoi lauter giwan, kai an o bolepen hi, un ap i phub, un tel i phub, un an o baro pani. Un jon giwenn: "Koleske, kai ap o rajeskro beshepaskro beshdo hi un ko tarno bakreske, kolenge hi i gilja, un o sharepen, un o railepen, un i soor pral lauter, kanna un hako tsireske." 14Un kol star sorele bolepangre penan: Amen! Un kol tchatchepangre phure witsran pen glan o Debleste un glan o bakro tele, un sharan len.

will be added

X\