Debleskro tsiro 3

1"Tchin kau liil ap o Debleskro budepaskro, kai dell jak ap i patslende an o foro Sardes: Kawa penell kowa, koleske o Debleskro Ducho koi hi, un koles i efta bolepangre momlia an o wast hi. Me djinau lauter, hoi tumer kran. Tumer han mulo, ninna te penenn le pral tumende, te han djido. 2Stenn pre o sopastar! Mashkral tumende hi gomme menshe, kai patsenn ap mande. Kolla hi gar bud. Un lengro patsepen hi tikno. Krenn lengro patsepen pale soreles! Glan miro Debleste hi kowa gar mishto doha, hoi tumer mange krenn. 3Ma bistrenn, hoi tumenge penlo was un hoi shunan! Un rikrenn ap kal laba! Un awenn pale ap o tchatcho drom! Te krenn kowa gar, un stenn gar pre o sopastar, palle wau pral tumende har i tchorepaskro. Un tumer djinenn gar, hawo tsireske pale wau. 4Ninna te hi gar bud patsle an o foro Sardes, kai djan ap miro drom, hi sawe patsle mank tumende, kai kran pengre koola gar tchiklo. Kolla hi moldo, te wenn le rido an parne koola, un djiwenn mantsa an o bolepen. 5Koon sorleder hi har o tchilatchepen, kowa lella parne ripja. Un leskro lab lau me gar win dran o liil, kai i djide dre tchindlo hi. Ninna penau glan miro dadeste un glan leskre bolepangre, kai jon hi mire. 6Shunenn halauter mishto, hoi o Debleskro Ducho penella ap i patslende!" 7"Tchin kau liil ap o Debleskro budepaskro, kai dell jak ap i patslende an o foro Filadelfia: Kawa penell o Debleskro tchatchepaskro. Koles hi o Davideskro klidepaskro an o wast. Job te krell o wudar pre, palle nai krell les kek pale pandlo. Job te krell o wudar pandlo, palle nai krell les kek pre. 8Me prindjrau lauter, hoi tumer mange kran. Dikenn, me krom i wudar glan tumende pre, hoi kek nai pandell. Tumen hi i tikni soor, un rikran miro lab an tumare djia, un dan man gar buchoste. 9Shunenn, hoi me kol bengeskre menshentsa krau, kai chochenn un penenn pendar, te hi le o Debleskre menshe, un jon hi kek Debleskre menshe. Me krau, te wenn lendar pash tumende, te witsrenn le pen glan tumende ap i phub, un te haiwenn le, te kamau tumen o tselo djijestar. 10Tumer rikran ko lab, hoi tumenge penom, un wan gar khino an o patsepen ap mande. Doleske rikrau mire wasta pral tumende an ko pharo tsiro, kai i bibacht wella pral i tsele menshende ap kai phub, te well diklo, hoi an lengre djia hi. 11Me wau an i tikno tsiro pale. Rikrenn tumaro patsepen soreles, te lell kek wawar ko shukar koowa tumendar, hoi tumenge an o bolepen hi, un hoi kolla lenna, kai dan pengro patsepen gar pre. 12Kowa, kai rikras peskro patsepen bis ap o merepen, dran koleste krau me jekes, kai hi har i baro bar, kai rikrell miro Debleskro kheer. Un kowa atchell koi tardo hako tsireske. Un me tchinau o lab miro Deblestar ap leste, un o lab o Debleskro forestar. Kowa hi o newo Jerusalem, hoi dran o bolepen tele wella. Un miro newo lab tchinau ninna ap leste. 13Shunenn halauter mishto, hoi o Debleskro Ducho penella ap i patslende!" 14"Tchin kau liil ap o Debleskro budepaskro, kai dell jak ap i patslende an o foro Laodicea: Kawa penell kowa, kai kharell Amen, un penell hako tsiro o tchatchepen, un sikrell i menshende o tchatcho drom pash o Debleste. Job his koi pashal, har o Dewel lauter kras. 15Me djinau halauter, hoi tumer kran. Tumer han har i pipen, hoi hi gar shila, witar gar tato. Kamaus, te wenn tumer jek kolendar. 16Tumer han paash tato. Doleske tchungrau tumen wi dran miro mui. 17Tumer penenna: Mer ham brawelo, un men hi halauter; tchi hunte well men buder. Me penau tumenge: Tumer djinenn gar, te han an i bibacht, jaake te khaitenn tumer man. Tumer han tchorwelo, un nango, un korelo. 18Doleske penau tumenge: Ginenn mandar sonakai, sawo sonakai, hoi an i jag thodo was, jaake te wenn tumer tchatchepaha brawelo. Ginenn mandar ninna parne ripja un riwenn kolla ap tumende, te han buder gar nango, un hunte ladjenn tumen buder gar. Un ginenn kutch djet, un makenn tumare jaka, te nai dikenn pale! 19Lauteren, kai kamau o djijestar, kolende sikrau lengri doosh, un penau lenge dawentsa, te shunenn le ap mande. Mukenn kanna tumaro tchilatcho drom, un awenn pale ap miro drom! 20Dikenn, me hom glan o wudar tardo, un dau ap ko wudar. Koon shunella, hoi me penau, un krell mange o wudar pre, pash koleste djau me dre, un chau leha, un job mantsa. 21Kowa, kai hi sorleder har o tchilatchepen, kowa nai beshell pes mantsa ap miro rajeskro beshepaskro, jaake har me ninna homs sorleder har o tchilatchepen, un me beshom man miro dadeha ap leskro rajeskro beshepaskro. 22Shunenn halauter mishto, hoi o Debleskro Ducho penella ap i patslende!"

will be added

X\