Debleskro tsiro 21

1Un me dikom i newo bolepen un i newi phub. O phuro bolepen un i phuri phub his buder gar koi. Un o baro pani his buder gar koi. 2Un me dikom o Debleskro foro, o newo Jerusalem, har was ko foro tele o Deblestar dran o bolepen. O foro his shukar kerdo har i tarni tchai, kai romedinerell un shukar kerdo was peskro romeske. 3Un me shunom i sorelo rakepen. Kowa was kotar, kai o Debleskro beshepaskro tardo hi, un kowa penas: "Dikenn, o Debleskro kheer hi pash i menshende! Job djiwell pash lende. Un jon hi leskre menshe. Un o Dewel hi lengro Dewel kokres, un hi pash lende." 4Un job khossella hake swar ap lengre jaka tele. Un o merepen dell gar buder, witar kek bibacht, kek ropen un kek duka. Kowa hoi his, dell gar buder. 5Un kowa, kai ap o Debleskro beshepaskro beshdo hi, penas: "Dikenn, me krau lauter newes." Un ap mande penas lo: "Tchin kal laba an i liil! Kal laba hi tchatcho. Un jaake well lauter." 6Un job penas pale: "Halauter was jaake, har penom. Mandar was halauter. Un lauter wella pale glan mande. Me hom o glanstuno un o palstuno. Kones trush hi, kowa lell mandar o djido pani tchitcheske. 7Kowa, kai hi sorleder har o tchilatchepen, kowa lell kau shukar koowa mandar. Me wau leskro Dewel. Un job well miro tchawo. 8Kol wawar djan an i bari jag, hoi soreles chatchella un khandella. Kote merenn le o duito kopo. Jon hi kolla, kai i darjatar gar mantsa djan, kolla, kai phukran ap pengro patsepen, kolla, kai djungelo koowa kran, kolla, kai maran wawaren, kolla, kai luberan pen trujal, kolla, kai bengeskro koowa kran, kolla, kai mangan wawar koowa an har o Debles, un i tsele chochene." 9Un pash mande was jek kol efta bolepangrendar, kai tchoran kol efta tchare wi, te was efta kope i bari phagi pral i phub. Pal kowa was kek wawar phagi pral i phub. Ko bolepaskro was pash mande, un rakras mantsa, un penas: "Ab kai! Me sikrau tute koi tchat, kai rodas peske o tarno bakro wi, te romedinerell lo lat." 10Un o Debleskro Ducho was ap mande. Un o bolepaskro anas man ap i bari, bari berga, un sikras mande o Debleskro foro Jerusalem, har ko foro tele was o Deblestar dran o bolepen. 11Ko fores hi o Debleskro railepen, un hi jaake shukar, har ko kutch bar, hoi Jaspis kharella, jaake djudjo har djudji wali. 12Trul o foro hi i bari barengri baar. An koi barengri baar hi deesh-te-dui bare wudja, ap kolende denn deesh-te-dui bolepangre jak. Un ap kol bare wudja hi i laba tchindlo kol deesh-te-dui Israeleskre tchawendar. 13An i barengri baar hi ap haki rig triin bare wudja: Kote, kai o kham pre djala hi triin wudja, un kote, kai hi o kham shila, hi triin wudja, un kote, kai hi o kham tato hi, triin wudja, un kote, kai o kham tele djala, triin wudja. 14Un koi barengri baar hi tardo ap deesh-te-dui sorele barra. Ap kolende hi i laba tchindlo kol deesh-te-dujendar, kai his o tarno bakreskre bitchepangre. 15Un ko bolepaskro, kai mantsa rakras, koles his i sonakaskro kasht an leskro wast. Kol kashteha ginas lo tele, har baro o foro hi, un har baro lengre wudja hi, un har baro koi barengri baar hi, hoi djal trul o foro. 16O fores hi star riga. Jek rig hi jaake baro har i wawar. Un o bolepaskro dikas pal har baro ko foro hi ko sonakaskro kashteha: Haki rig hi dui-serja-te-dui-sheel (2,200) kilometarja baro. O lengstepen, o buchlepen un o pralstunepen hi lauter jek barepen. 17Un job tchiwas peskro kasht ap i barengri baar, hoi djal trul o foro, te dikell lo, har dur koja pral djala. Koja djal jek-sheel-te-star-deesh-te-star (144) mussja pral. Jek mussi baro pash leste hi emligo har jek mussi baro pash i menshende. 18Un i barra an koi barengri baar, hoi djal trul o foro, hi kutch barra, hoi kharenna Jaspis. Un o foro hi dran o latcho sonakai, djudjo har i wali. 19Un kol deesh-te-dui telstune sorele barra an koi barengri baar hi shukar un kutch barra. O glanstuno bar hi i Jaspis, un o duito bar hi i Safir, o triinto hi i Kalzedon, un o starto hi i Smaragdo. 20Un o pantchto hi i Sardonix, un o shobto hi i Karneol, un o eftato hi i Krisolit, un o ochtato hi i Berill, un o enjato hi i Topas, un o deshto hi i Krisopras, un o deesh-te-jekto hi i Hiazint, un o deesh-te-duito hi i Ametist. 21Un kol deesh-te-dui bare wudja hi deesh-te-dui mirklia hako baro wudar hi jek mirkli. Un kol dromma an ko foro his dran o latcho sonakai, djudjo har wali. 22Un me dikom kek Debleskro kheer an ko foro, kai mangenn le o Debles an. O baro Dewel kokres, kai hi o rai pral halauter, hi mashkral lende, job un o tarno bakro. 23Pral o foro hi buder kek kham un kek tchon. O Debleskro railepen hi har o kham, un o tarno bakro hi i momeli o foreske. 24Un i menshe an wawar themma dikenn koi momeli un wenna pash leste. Un i bare raja ap i phub anenn pengro brawlepen an ko foro. 25Un o foreskre bare wudja atchenn hako tsiro pre, un wenn buder gar pandlo. Della kek rati buder. 26Un i menshe dran i wawar themma anenn pengro kutch un shukar koowa un pengro brawlepen an ko foro. 27Un tchi well kote dre, hoi an o Debleskre jaka pale-tchiddo hi, witar kek mensho, kai djungelo koowa krella un chochella. Kolla wenna an ko foro dre, kolengre laba an o tarno bakreskro liil dre tchindlo hi. Kote hi kolla dre tchindlo, kai lenna o djipen, hoi gar pre-herella.

will be added

X\