Debleskro tsiro 20

1Un me dikom i bolepaskres dran o bolepen tele te well. Un koles hi i klidepaskro an o wast, te pandell lo o telstunepen pre. Ninna i sasterno shello hi an leskro wast. 2- 3Un job tapras ko baro lolo sap, kowa hi ko phuro sap, hoi kharella ninna Beng un Satan, un pandas les, un witsras les an o telstunepen, te atchell lo kote jek sero (1.000) bersh pandlo. Un o bolepaskro pandas i wudar tele, hoi anell an o telstunepen, jaake te krell kek o telstunepen pale pre. Un an ko sero bersh nai anell o beng i menshen buder gar o Debleskro dromestar tele. Pal ko tsiro hunte well lo i tikno tsiro win muklo. 4Un me dikom kolen, kolenge o shero tele dino was doleske, kai rikran le soreles ap o Debleskro lab un sikran i menshende o Jesuseskro drom. Jon mangan gar ko fiches an, witar gar ko fiches, hoi i menshendar kerdo was. Un jon lan o ficheskro lab gar ap pengre shere, witar gar ap pengre wasta. Kalla lauter wan kanna djido. Jon hi beshdo ap i rajengre beshepangre, un lenn i soor, te rakrenn le o tchatchepen wi pral i menshende. Khetne o Jesus Kristeha hi le raja jek sero bersh. 5Jon hi kolla, kai glanstunes i mulendar pre stan. Un kol wawar mule wenn gar djido, jaake raha har ko sero bersh gar trujal djan. 6Bachtele hi kolla, kai hi mank kolende, kai wenn glanstunes i mulendar djido. Jon hi o Debleskre menshe, un merenn gar o duito kopo. Jon hi i rashaja o baro Deblestar un o Jesus Kristestar. Un khetne leha hi le raja pral lauter jek sero bersh. 7Pal kol sero bersh well o beng dran peskro stilepen wi muklo. 8Un job djal wi, te tsardell lo i menshen ap i tseli phub ap peskro drom. Kolla menshe kharenna Gog un Magog. Un jon hi jaake bud, te penell nai kek, kitse jon hi. O beng anell len khetne, te djan le an o kurepen o Debleskre menshentsa. 9Un jon djan pral i tseli phub, un atchenn trul ko foro tardo, kai o Debleskre menshe djiwenna. Kowa hi ko foro, koles o Dewel kamella o tselo djijestar. Un palle well i jag dran o bolepen un chatchrell kol tsele kurepangren pre. 10Un o beng, kai anas len ap peskro drom, well an i bari jag witsedo, hoi soreles chatchella un khandella. Kote hi ninna o ficho, un ko chocheno rakepaskro. Kote well len hako tsiro bare duka. 11Un me dikom i baro parno beshepaskro un koles, kai pre beshdo hi. I darjatar nashas i phub un o bolepen glan leste krik. Un kek dikas len buder pale. 12Un me dikom i mulen: i bare har i tikne. Jon his tardo glan o Debleskro beshepaskro. Un lila wan pre kerdo, kai tchindlo hi, hoi i menshe kran. Pale was ko djipaskro liil pre kerdo, kai kolla dre tchindlo hi, kai djiwenna hako tsiro. Un o tchatchepen was wi-rakedo pral kol tsele mulende jaake, har an i lila dre tchindlo hi. 13Un o baro pani das peskre mulen win, kai an leste hi. Un o merepen un o mulengro them dan pengre mulen win, kai an lende hi. Un pral lende was o tchatchepen wi-rakedo jaake, har hakeno djiwas ap i phub. 14- 15Un o merepen un o mulengro them wan an i bari jag witsedo, ninna hakenes, koneskro lab gar an o djipaskro liil dre tchindlo hi. Koon an i bari jag witsedo wella, merell o duito kopo.

will be added

X\