Debleskro tsiro 2

1"Tchin kau liil ap o Debleskro budepaskro, kai dell jak ap i patslende an o foro Efesus: Kawa penell kowa, kai rikrell kol efta bolepangre momlia an peskro tchatcho wast, un kai djal mashkral kol efta sonakangre momlia trujal. 2Me prindjrau lauter, hoi tumer mange kran, tumari tseli phari budi. Tumer dan tumaro patsepen gar pre. Un tumer mukenn gar tchilatche menshe mashkral tumende te well. Un tumer lan kolen an o jak, hoi penan, te hi le o Jesuseskre bitchepangre, un jon hi kowa gar. Un tumer haiwan, te chochan le. 3Tumer dan tumaro patsepen gar pre, un lan i pharo djipen mange ap tumende, un tumer wan gar khino an tumari budi mange. 4Jek koowa hi pash tumende, hoi hi gar mishto: Tumer kamenn man buder gar o tselo djijestar, jaake har kowa his ap ko tsiro, har tumer patslo wan. Tumaro dji mukas man. 5Mukenn tumenge kowa an o shero te djal, har dur tumer mandar tele peran. Awenn pale o tselo djijeha pash mande! Djiwenn ko djipen, hoi djiwan, har tumaro patsepen ap mande tarno his. Te krenn kowa gar, palle wau, un lau tumari momeli krik, un tchiwrau lat ap i rig. 6Kate hi tchomone, hoi tumer krenn latches. Tumer kamenn gar, hoi kol Nikolarja krenna, jaake har me kowa witar gar kamau. 7Shunenn halauter mishto, hoi o Debleskro Ducho penella ap i patslende! Kowa, kai hi sorleder har o tchilatchepen, koles dau te chal ko rukestar, hoi o djipen della, kowa, hoi tardo hi an o Debleskri shukar baar." 8"Tchin kau liil ap o Debleskro budepaskro, kai dell jak ap i patslende an o foro Smirna: Kawa penell kowa, hoi hi o glanstuno un o palstuno, hoi mulo his, un djido was. 9Me djinau, te lenn le tumen palla. Ninna djinau, har tchorwelo han. Tchatchepaha han tumer brawelo! Me djinau ninna, te rakrenn kolla djungeles pral tumende, kai penenn pendar, te hi le Debleskre menshe. Jon hi kek Debleskre menshe. Na-a, jon hi bengeskre menshe. 10Ma darenn kol duka, hoi ap tumende wenna! O beng mukell menshen tumendar an o stilepen te witsrell, te well diklo, har sorelo tumaro patsepen ap mande hi. Un tumer wenn deesh diwessa palla lino. Atchenn soreles an tumaro patsepen ap mande, ninna te marenn le tumen! Palle dau tumen ko shukar koowa, hoi kolla lenna, kai hi i sorleder an o kurepen. Un kowa hi o djipen, hoi atchella. 11Shunenn halauter mishto, hoi o Debleskro Ducho penella ap i patslende! Kolla, kai soreles an o patsepen atchan, un gar pre dan, kolla merenn gar o duito kopo." 12"Tchin kau liil ap o Debleskro budepaskro, kai dell jak ap i patslende an o foro Pergamon: Kawa penell kowa, koles o charo hi, hoi ap dui riga tchinella. 13Me djinau, tumer djiwenn kote, kai o beng o rai pral i menshende hi. Tumer rikrenn soreles ap mande, un mukan o patsepen gar, ninna an kol diwessa, har was o Antipas maredo, har job i menshenge mandar rakras an tumaro foro, kai o beng djiwella. 14I tikno koowa pash tumende hi gar mishto. Mashkral tumende hi sawe menshe, kai djan ap ko drom, koles o Bileam glan i raha tsiro i menshende sikras. Job sikras o baro rajeste pral o them Moab, - leskro lab his Balak, - har te anell lo nai i Israelitarja ap i tchilatcho drom. Jaake chan i Israelitarja ko mass kol fichendar, hoi kol wawar menshe glan lengro debleste anan. Ninna djan le pash wawar djuwjende. 15Jaake hi ninna mashkral tumende sawe menshe, kai ap kowa patsenna, hoi kol Nikolarja penenn. 16Krenn kanna ko tchilatcho koowa buder gar! Te mukenn tumer kowa gar, jaake wau an i tikno tsiro, un tchingrau ap kolende, kai shunan gar ap mande. Un miro rakepen tchinella har i charo. 17Shunenn halauter mishto, hoi o Debleskro Ducho penella ap i patslende! Kowa, kai hi sorleder har o tchilatchepen, koles dau ko maro dran o bolepen te chal, hoi kharella Manna. Ninna dau les i parno bar. Ap koleste hi o newo lab tchindlo, koles kek prindjrell, har kowa, kai les lella." 18"Tchin kau liil ap o Debleskro budepaskro, kai dell jak ap i patslende an o foro Tiatira: Kawa penell o Debleskro tchawo, koles hi jaka har i jag, un herja har sonakai. 19Me prindjrau lauter, hoi tumer mange krenn. Tumer kamenn man o djijestar, un rikrenn soreles ap mande. Me prindjrau lauter, hoi tumer tumare phralenge krenna. Un tumer wan gar khino an tumaro patsepen. Kowa, hoi tumer kanna krenna, hi ninna budeder har kowa, hoi kran, har patslo wan. 20Jek koowa hi gar mishto pash tumende. Tumer mukenn koi djuwel Isebel te rakrell, hoi joi kamella, koja, hoi penell, te hi li o Debleskri rakepaskretsa. Joi tsardell mire budepangren o Debleskro dromestar tele un penell lenge, te nai djan i mursha pash wawar djuwjende, un i djuwja pash wawar murshende. Ninna penell li lenge, te nai chan le ko mass, hoi wawar menshe glan lengro debleste anan. 21Me dom lat tsiro, te nai mukell li peskro tchilatcho drom. Un joi kamell gar peskro djungelo koowa te mukell. 22Doleske witsrau lat ap o nasslengro tchiben. Un kolla, kai laha sowan, jon te mukenn kowa gar, palle anau bare duka ap lende. 23Un kolakre tchawen dau mulo. Palle haiwenn i tsele patsle, te hom me kowa, kai lauter prindjrella, hoi i menshen an o shero un an o dji hi. Un hakeno, kai tchilatcho koowa kras, kowa lell mandar koi phagi pal kowa, hoi job kras. 24Tumer wawar patsle an o foro Tiatira, kai gar pal kol chochene laba djiwan, un ko bengeskro drom gar prindjrenna, ap tumende penau me: Me penau tumenge tchi wawar koowa, hoi tumer hunte krenna, 25har kowa, te rikrenn mire laba soreles an tumare djia, jaake raha bis te wau pale. 26Kowa, kai hi sorleder har o tchilatchepen, un krell lauter, hoi me kamau, jaake raha har djiwell lo, koleste dau i soor, te well lo rai pral i menshende an i wawar themma. 27Job anell len i sasterno wasteha un dell lauteren paash, kai gar ap leste shunenna, jaake har tchare paash dino wenna. 28Jaake har das man miro dad peskri soor, jaake dau me koles miri soor. Ninna dau les ko bolepaskri momeli, hoi djal pre taissarlake ap o bolepen. 29Shunenn halauter mishto, hoi o Debleskro Ducho penella ap i patslende!"

will be added

X\