Debleskro tsiro 17

1Un jek kol efta bolepangrendar, kai hi len kol efta tchare an i wasta, kowa was pash mande, un penas: "Ab kai! Me kamau tut i phagi te sikrell, hoi ko foro lella, hoi pash bud panja tchiddo hi. Ko foro hi har i djuwel, kai kras wi-ladjedo koowa. 2I bare raja ap kai phub tchiwan pen laha khetne. Ko wi-ladjedo koowa, hoi koi djuwel kras, hi har i mool, hoi pijan kolla, kai ap i phub djiwenna, un latar mato wan." 3Un o Debleskro Ducho was pral mande. Un o bolepaskro anas man an o mulo them. Un me dikom i djuwel ap i lolo ficho beshdo, hoi les efta shere un deesh shinga his. Un ap koleste his sawe laba tchindlo, hoi praassenn o Debles. 4Un koi djuwel his rido an i kutch lolo ripen. Un ap late hi sonakai un kutch barra un mirklia. Un lat his i sonakaskro khoro an lakro wast, pherdo djungelo koowa un sawo koowa, hoi hi pale-tchiddo glan o Debleste. Kau koowa was dran lakro wi-ladjedo djipen. 5Un ap lakro shero his i lab tchindlo, hoi i menshe gar haiwan: "Koi bari Babilon, kolatar wella hako djunglepen un wi-ladjedo koowa ap i phub." 6Un me dikom, kai koi djuwel mato his o ratestar, hoi nashas, har o Debleskre menshe maredo wan, kolla, kai patsan ap o Jesuseste un dan pengro patsepen gar pre. Un me nashte patsom gar, hoi dikom. 7Un ko bolepaskro penas ap mande: "Hoske patseh tu gar, hoi dikeh? Me kamau tuke te penell, koon koi djuwel hi, un koon ko ficho hi, hoi lat hidjella, un koles kol efta shere un kol deesh shinga hi. 8Ko ficho his djido, un djiwell kanna buder gar, un well dran o telstunepen pale pre. Un palle djal lo hako tsireske nashedo. I tsele menshe krenn bare jaka, te dikenn le, te well ko ficho pale, hoi djido his, un kanna buder gar djiwella. Jon hi kolla, kolengre laba gar dre tchindlo wan an o djipaskro liil, har i phub gomme gar koi his. 9Kanna hunte well men goswepen, te haiwas kowa: I efta shere ko fichestar hi efta berge, ap kolende koi djuwel beshdo hi. Kal shere hi ninna efta bare raja: 10Pantch kolendar meran, ko jek hi koi, un ko wawar was gomme gar. Un te well lo, hunte atchell lo i tikno tsiro. 11Ko ficho, hoi djido his, un kanna buder gar djiwella, job hi o ochtato. Ninna hi lo jek kol eftendar, un djal hako tsireske nashedo. 12Un kol deesh shinga, hoi dikal, hi deesh bare raja. Kolen hi kanna gomme kek penepaske pral i menshende. Well i diwes, kai well len i soor, te wenn le bare raja pral i menshende khetne o ficheha i tikno tsireske. 13Kolla rikrenn khetne, te denn le pengri soor ko fiches, te well koles bud penepaske. 14Un jon kurenn pen ko tarno bakreha. Un o tarno bakro hi sorleder har jon. Job hi o rai pral i tsele rajende, un o pralstuno pral i tsele pralstunende. Un pash leste hi kolla, kolen job gole das un wi rodas, kolla, kai ap leste patsenna." 15Un o bolepaskro penas ap mande: "Tu dikal, kai beshell koi djuwel, hoi wi-ladjedo koowa krell, pash bud panja. Kol panja hi menshe dran haki harmenationa, dran hako them, haki nationa, un hako rakepen. 16Un kol deesh shinga, hoi dikal, khetne o ficheha wenn le chojedo ap koi djuwel, un lenn lake lauter krik, hoi lat hi, jaake te hi li nango. Un jon chan lakro mass un chatchrenn lat pre. 17Kowa das len o Dewel an lengre djia, te krenn jon, hoi job kamella. Doleske rikrenn le lauter khetne, un denn pengri soor ko ficheste. Kowa djala lauter jaake raha, bis te was lauter jaake, har o Dewel penas. 18Un koi djuwel, hoi tu dikal, kaja hi ko baro foro, hoi hi les penepaske pral i bare rajende ap kai phub."

will be added

X\