Debleskro tsiro 16

1Un me shunom, har jek dran o Debleskro kheer bari gole das un ap kol efta bolepangre penas: "Djan wi un tchorenn kol efta tchare, kai pherdo Debleskri choli hi, pral i phub win!" 2Un o glanstuno bolepaskro djas un tchoras peskro tcharo wi pral i phub. Koi was i djungelo un tchilatcho nasslepen ap kol menshende, kai lan o ficheskro lab ap pende, un mangan o fiches an, hoi i menshendar kerdo was. 3Un o duito bolepaskro tchoras peskro tcharo wi pral o baro pani. Un o pani was rat, har i mulestar. Un lauter meras, hoi an o baro pani djiwas. 4Un o triinto bolepaskro tchoras peskro tcharo wi pral kol bare un tikne panja, hoi wenna dran i phub wi. Un kolla wan rat. 5Un me shunom, har penas ko bolepaskro, koles i soor pral i panja hi: "Tu, o baro Dewel, djiweh kanna, har djiwal an o phuro tsiro. O tchatchepaskro Dewel hal tu. Kowa, hoi tu rakreh, hi mishto un tchatcho. 6Jon maran tire menshen, ninna tire rakepangren, un mukan lengro rat te nashell. Un kanna hunte pijenn le o rat. Kowa hi lengri phagi." 7Un me shunom, har jek pash o Debleskri jag penas: "Awa, rai, maro sorelo Dewel, mishto kral, kai tu dal len sawi phagi." 8Un o starto bolepaskro tchoras peskro tcharo wi pral o kham. Un o kham las i soor, te nai chatchrell lo i menshen. 9Un i menshe wan soreles chatchedo. Un jon praassan o Debles, kai das len koi phagi. Un jon mukan gar pengro tchilatcho drom, un sharan o Debles gar. 10Un o pantchto bolepaskro tchoras peskro tcharo wi pral o ficho un leskro them, kai job o rai hi. Un i rati was ap lende. Un leskre menshe dandran ap pengri tchip i dukatar. 11Lengre duka dran o djungelo nasslepen his jaake baro, kai praassan le o Debles an o bolepen. Un jon mukan gar pengro tchilatcho koowa, hoi jon kran. 12Un o shobto bolepaskro tchoras peskro tcharo win pral o baro pani, hoi kharella Eufrat. Un ko pani djas pale. Jaake was i drom kerdo kol rajenge, kai wenna dran o them, kai o kham pre djal. 13Un me dikom triin benga, hoi dikan win har djambe. Kolla wan wi, jek dran o baro sapeskro mui, jek dran o ficheskro mui, un jek dran ko rakepaskro mui, kai job i chocheno hi, un krell pes, har te wals lo i Debleskro rakepaskro. 14Kolla triin benga krenn baro un sorelo koowa, un djan pash i rajende pral i tsele themma, te anenn jon pengre lurden khetne, te djan le an o kurepen ap o Debleskro baro diwes. 15- 16Un i triin benga anan len khetne an i them, hoi kharella ap hebretikes: Harmagedon. Kanna shunenn, hoi o Jesus Kristo penella! Job penella: "Me wau har i tchorepaskro. Bachtelo hi kowa, kai jak della, un gar sowella, un leskre koola ap leste hi, jaake te hi lo gar nango un ladjella." 17Un o eftato bolepaskro tchoras peskro tcharo wi an o ducho, hoi djal pral i phub. Un dran o Debleskro kheer was i rakepen kote win, kai o rajeskro beshepaskro hi, un penas soreles: "Kanna hi lauter kerdo." 18Koi das i jag dran o bolepen karje pre te tele, un was i bari gole wi, har koi gole, hoi o bolepen krella, te dell baro brishin un te djal jag tele ap i phub. Un i phub trissas jaake soreles, har dikan le kowa gar jaake raha, har menshe ap i phub hi. 19Un o baro foro phagas an triin kotja. Un i forja an i wawar themma peran khetne. O Dewel bistras ko baro foro Babilon gar, un mukas i menshen kote peskri choli te pijell har mool. 20Un hako them, hoi an o baro pani tchiddo hi, djas tele. Un i berge his buder gar koi. 21Un das brishin har bare barra. Kolla his jaake pharo har i mensho, un peran tele dran o bolepen ap i menshende. Har i menshe sawi bari phagi lan, praassan le o Debles.

will be added

X\