Debleskro tsiro 13

1Un me dikom dran o baro pani i fiches pre te well. Koles his deesh shinga un efta shere. Un ap haki shing hidjas lo i shereskro sonakai. Un ap leskre shere his sawe laba tchindlo, hoi praassenn o Debles. 2Un ko ficho, hoi me dikom, his har i bari diwji margodja. Leskre herja his baro un sorelo. Un an leskro mui his bare danda. Un ko baro lolo sap das les peskri soor un peskro beshepaskro, te was ko ficho i baro rai, koles bud penepaske hi. 3Un jek leskre sherendar his, har te wals lo maredo. Un les hi i baro tchinepen. Un ko tchinepen was sasto. Un i tsele menshe ap i phub kran bare jaka un djan ko ficheske palla. 4I menshe djinan, kowa his o baro lolo sap, hoi das o ficheste peskri soor. Doleske sharan le o lolo sapes. Un jon sharan ninna o fiches, un penan: "Kek hi sorleder har o ficho! Kek nai kurell pes leha un well sorleder!" 5Un o ficho rakras un phurdas pes pre un praassas o Debles. Star-deesh-te-dui (42) tchonna nai kras o ficho kowa. 6Un job praassas o Debles, un rakras djungeles pral leskro lab un leskro kheer. Ninna kolen, kai an o bolepen djiwenna, praassas lo. 7Un o Dewel mukas o fiches te kurell lo pes o Debleskre menshentsa, un mukas, te well lo sorleder har jon. Un kol fiches was i soor pral i menshende dran hake themma, haki nationa, haki harmenationa un hako rakepen. 8Lauter, hoi ap i phub djiwenna, sharenn ko fiches, - lauter kolla, kolengre laba gar tchindlo hi an o djipaskro liil. Kolla, kai lengre laba dre tchindlo hi an kau liil, hi jaake raha dre tchindlo, har i phub koi hi. Kau liil hi o tarno bakres, hoi maredo was. 9Tumer lauter, shunenn mishto, hoi tumenge penau! 10Koon stildo hunte well, kowa well stildo. Koon o chareha maredo hunte well, kowa well o chareha maredo. Doleske hunte wenn o Debleskre menshe soreles tardo an o patsepen, te denn le gar pre. 11Un me dikom i wawar fiches dran i phub pre te well. Un les his dui shinga har i tarno bakro. Un job rakras har o baro lolo sap. 12Les hi i tseli soor, hoi ninna ko fiches hi, hoi dran o baro pani was. Un ko duito ficho kras, te sharenn i tsele menshe ap i phub ko fiches, hoi dran o baro pani was, koles ko baro tchinepen his, un pale sasto was. Un ko ficho, hoi dran o baro pani was, kowa dikas lauter, hoi ko duito ficho kras, 13- 14un das koles i soor, te krell job baro koowa, jaake baro, te mukas lo ninna i jag dran o bolepen glan i menshende tele te perell. Un kowa kras lo, te anell lo i menshen ap i phub ap o bengeskro drom. Job penas lenge, te krenn le penge i fiches, hoi wi-dikella har ko ficho, kai les his o tchinepen o charestar, un dran kowa meras, un pale djido was. 15Un ko duito ficho las i soor, te krell lo ko fiches djido, hoi i menshe penge kran, jaake te nai rakrell kowa ninna, un te nai krell job, te wenn lauter maredo, kai les gar an-mangenna. 16Un i tsele menshe hi an o wast ko fichestar: I bare har i tikne, i brawele har i tchorwele, i raja un i budepangre. Kolla lauter hunte krenn i sikepen ap pende. Hi sawe, kai hunte tchinenn les ap pengro tchatcho wast. Wawar hunte tchinenn les glan ap pengro shero. 17Ko sikepen nai well o ficheskro lab, ninna leskri numra. Koles, kai ko lab gar ap peste hi, witar gar leskri numra, kowa nashte ginell tchi, un nashte bikrell tchi. 18Kate hunte well men goswepen. Koon gosewo hi, kowa nai hatsell ko lab win. Ko lab hi i mensheskro lab. Leskri numra hi triin shoba (666).

will be added

X\