Mateo 6

1Denn jak, har krenn tumer latcho koowa! Ma krenn les jaake, te dikenn i menshe kowa un sharenn tumen! Koon tumendar kowa krella, koles dell tumaro dad an o bolepen kek latchepen pale. 2Tu te deh i tchorweles lowe, palle ma pen kowa hakeneske! Ma kre har kolla, kai hi len dui djia, un penenn an i biboldengre kangria un ap o drom, hawo latchepen jon kran, te wenn le i menshendar sharedo. Tchatchepaha, me penau tumenge: Kolla lenna buder tchi o Deblestar. Jon anan pengro latchepen kokres dre. 3- 4Tu te deh i tchorweles lowe, palle kre les tchorchanes, te djinell les kek! Muk tiro serwo wast gar te djinell, hoi tiro tchatcho wast kras! O Dewel, kai hi tiro dad an o bolepen, dikell ninna kowa, hoi tu tchorchanes kral. Un job dell tut ko latchepen pale, hoi tu kral. 5Tu te rakreh o Debleha, palle ma kre kowa har kolla, kai hi len dui djia. Jon kamenn, te dikenn len i menshe, har jon an i biboldengre kangria un ap o drom tardo hi, un o Debleha rakrenna. Tchatchepaha, me penau tumenge: Kolla lenna tchi o Deblestar. Jon anan pengro latchepen kokres dre. 6Tu te rakreh o Debleha, palle dja an tiri isema, klide o wudar pal tute, un kote rake o Debleha! Un o baro Dewel, kai hi tiro dad an o bolepen, dikell tut kote. Un job dell ko latchepen pale, hoi tu kral. 7Tumer te rakrenn o Debleha, palle penenn leske gar bud laba, jaake har kolla krenna, kai prindjrenn o tchatcho Debles gar. Jon patsenna, te rakrenn le bud, palle shunell len lengro dewel. 8Ma krenn kowa jaake har jon! Un o baro Dewel, kai hi tumaro dad an o bolepen, djinella, hoi hunte well tumen djipaske. Job djinella kowa glan ko tsiro, kai tumer les mangenna. 9Tumer te rakrenn o Debleha, penenn: Maro dad an o bolepen. Tiro lab well sharedo! 10Te well ko tsiro sik, kai tu o rai hal pral i tseli phub! Te krenn i menshe ap i phub kowa, hoi tu kameh, jaake har ninna kolla an o bolepen krenn, hoi tu kameh! 11De men maro hako diwes! 12Un biste mari doosh, hoi mer ap mende anam! Un ninna mer bistrah o tchilatchepen, hoi i wawar ap mende kran. 13Ma muk men tiro dromestar tele te djal! Le men dran o bengeskro wast win! 14Tumer te bistrenn o tchilatcho koowa, hoi i wawar ap tumende kran, palle bistrell tumaro dad an o bolepen ninna o tchilatchepen, hoi tumer kran. 15Tumer te bistrenn gar o tchilatcho koowa, hoi i wawar ap tumende kran, palle bistrell tumaro dad an o bolepen, witar gar o tchilatchepen, hoi tumer kran. 16Te chan tumer i tikno tsiro tchi, te mangenn o Debles an, palle krenn kowa gar jaake, te dikenn i menshe kowa! Ma krenn har kolla, kai hi len dui djia! Jon sikrenn ap pengro mui, te bokenn le pengro Debleske. Tchatchepaha, me penau tumenge: Kolla lenna tchi o Deblestar. Jon anan pengro latchepen kokres dre. 17Tu te chah tchi an ko tsiro, kai tu o Debleha rakreh, palle thob tiro mui, mak tire balla har hako diwes, 18te dikenn i menshe gar, kai tu bokeh o Debleske. Un o baro Dewel, kai hi tiro dad an o bolepen, djinella, hoi tu leske kreh. Job dikell tut, un dell tut o latchepen pale, hoi tu leske kral. 19Anenn tumenge kek brawlepen ap i phub khetne! Kote hi i kerme, hoi i ripja chana. Koi krell o pani o saster paash. Kote hi i tchorepangre, kai tchorenn tumaro brawlepen. 20Anenn tumenge brawlepen an o bolepen khetne, kai kek tchorepaskro tumaro koowa hatsella! Un kek kerme, witar kek pani krell les paash. 21Kote, kai tiro brawlepen hi, kote hi ninna tiro dji. 22O mensheskro jak hi har i momeli an i kheer. Te dikeh kokres ap o Debleste, hi kowa jaake, har te chatchell koi momeli mishto. 23Te dikeh ap wawar koowa, un gar ap o Debleste, hi kowa jaake, har te chatchell kek momeli an kau kheer. Te chatchell tiri momeli buder gar, djiweh tu har an i kali rat. 24Kek budrell nai dui rajenge. Te wals kowa jaake, budrals lo ko jekeske mishto, un ko wawareske gar mishto. Ko jekes kamals job gar, kol wawares kamals job o djijestar. Tu nai budreh gar o Debleske un rodeh tiro brawlepen. 25Doleske penau me tumenge: Ma darenn tumaro djipaske! Ma darenn, te well tumen tchi te chal un tchi te pijell, witar gar, te well tumen tchi an-ripaske! O djipen hi budeder moldo har o chapen. Un o mensho hi budeder moldo har o ripen. 26Dikenn ap i tchirkle! Jon witsrenn kek djob an i phub, te well lo baro. Witar gar anenn le o baro djob dre, te tchiwenn le les an o djobeskro kheer. Tumaro dad an o bolepen dell len te chal. Un tumer han budeder moldo har jon. 27Kek tumendar nai tchiwell jek diwes budeder pash peskro djipen pashal! 28Hoske trashenn tumen, te well tumen tchi an-ripaske? Dikenn, har ap o senlepen shukar blume baro wenna! Jon budrenna gar un krenn penge kek ripja. 29O baro rai Salomo an peskro tselo railepen his gar jaake shukar an-rido har jek lendar. 30O Dewel kras o senlepen jaake shukar, hoi kau diwes win tardo hi, un o wawar diwes an o bob witsedo wella. Kitse kope budeder nai dell lo tumen an-ripaske! Hoske hi tumaro patsepen jaake tikno? 31Ma darenn un ma penenn: Hoi chas? Hoi pijas? Hoi riwas? 32Kowa krenn kol menshe, kai prindjrenn o Debles gar. Tumaro dad an o bolepen djinella, hoi tumen hunte well djipaske. 33Mukenn o Debles o rai pral tumende te well, un krenn lauter, hoi job kamella! Un o Dewel dell tumen lauter, hoi tumen hunte well djipaske. 34Doleske penau tumenge: Ma darenn kowa, hoi taissar wella! Mukenn o wawar diwes ap tumende te well, un palle dikenna, hoi te krenn! Hako diwes hi tumen doha hidjepaske.

will be added

X\