Mateo 5

1Un har job kol tsele menshe dikas, djas lo ap i berga pre, un beshas pes tele. Un leskre mala wan pash leste, te shunenn les le. 2Un job penas ap lende: 3Bachtele hi kolla, kai djinenna, kai hi le tchorwelo glan o Debleste. Jon djiwenna o Debleha khetne an o bolepen un lenn leskro brawlepen. 4Bachtele hi kolla, kai kanna rowenna. O Dewel lell lengri duk dran lengro dji. 5Bachtele hi kolla, kai kek tchingepen krenna. O Dewel dell len i tseli phub. 6Bachtele hi kolla, kai kanna pal o tchatchepen bokenna un trushenna. O Dewel krell len tchalo. 7Bachtele hi kolla, kai hi len i baro dji i wawar menshenge. O Debles hi i baro dji lenge. 8Bachtele hi kolla, kai hi len i djudjo dji. Jon dikenn o Debles pengre jakentsa. 9Bachtele hi kolla, kai krenna, te well kek tchingepen mank i menshende. O Dewel kharell len peskre tchawe. 10Kolla, kai krenn, hoi o Dewel kamella, un doleske lenn len i menshe palla, kolla hi bachtelo! Jon djiwenna o Debleha khetne an o bolepen. 11Tumer patsenn ap mande. Doleske praassenn le tumen, lenn tumen palla, un rakrenn chochene tchilatche laba pral tumende. Te krenn le kowa, awenn bachtele! 12Giwenn un denn gole i bachtjatar ap ko diwes! O Dewel dell tumen i baro brawlepen an o bolepen. Jaake har jon tumen palla lenna, jaake lan le o Debleskre rakepangren an o phuro tsiro ninna palla. 13Tumer han o loon ap kai phub. Te nashras o loon peskri soor, hi lo buder gar mishto. Un tu nai kreh buder tchi, te well lo pale londo. Ko loon molell tchi buder. Tu nai witsreh les tutar. Un i menshe stakrenn les khetne. 14Tumer han i momeli ap kai phub. Un i foro, hoi pral ap i berga hi, nai atchell gar khatedo. 15Kek chatchell i momeli an un tchiwell lat tel i piri. Na-a, job tchiwell lat ap i momelengri, te well koi momeli diklo hakenestar, kai an o kheer hi. 16Jaake hunte wenn tumer har i momeli, hoi chatchell glan i menshende, te dikenn le, hawo latcho koowa tumer lauter krenna, un te sharenn le o Debles, kai hi tumaro dad an o bolepen. 17Haiwenn man mishto: Me wom gar, te tchiwap kol laba ap i rig, hoi o Mose un o Debleskre rakepangre penan. Na-a! Ko krau me gar. Me wom, te krap kowa, hoi jon penan. 18Tchatchepaha, me penau tumenge: Jaake raha har o bolepen un i phub atchenna, jaake raha well tchi krik lino kol labendar, hoi o Mose un kol Debleskre rakepangre penan. Witar gar o tikneder lab well krik lino jaake raha, bis te well lauter tchatcho, hoi glan i raha tsiro penlo was. 19Koon jek kol tikneder labendar ap i rig tchiwella, un i menshenge kowa jaake penella, kowa hi o tikneder mashkral kolende, kai djiwenn khetne o Debleha an o bolepen. Koon krella, hoi o Dewel penas, un sikrell kowa i menshende, kowa wella bares mashkral kolende, kai djiwenn khetne o Debleha an o bolepen. 20Un me penau tumenge: Tumer nai djiwenn gar o Debleha khetne an o bolepen, te krenn tumer gar, hoi o Dewel kamella. Un tumer hunte krenn kowa feteder, har i biboldengre tchatchepangre un i Farisarja kowa krenna. 21Tumer djinenna, te was ap i phurende penlo: Ma mare kekes! Koon jekes marella, kowa hunte well glan o tchatchepaskro anlo, un lell peskri phagi. 22Me penau tumenge: Koon ap peskro phraleste chojedo hi, kowa hunte well glan o tchatchepaskro anlo. Un koon peskro phrales praassella, kowa hunte well glan i pralstune tchatchepangre anlo. Un koon penella: Dja tuke pash o bengeste! kowa wella an o bengeskri jag witsedo. 23Te djah tu an o Debleskro baro kheer, te dess o Debles tchomone, un kote djal tuke an o shero trujal, te hi tiro phraal chojedo ap tute, 24palle muk kowa tchiddo, hoi tu kamal o Debles te dell! Dja pash tiro phraleste, un dik, te wenn tumer pale mishto khetne! Un palle de kowa, hoi tu anal, o Debleste! 25Te hi tut sijaan pash jekeste, un hal leha ap o drom pash o tchatchepaskro, palle plaisse tiri sijaan jaake raha, har hal tu leha ap o drom, te nai dell job tut gar an o tchatchepaskro wast! Un kowa dell tut an o klisteskro wast. Un kowa witsrell tut an o stilepen! 26Tchatchepaha, me penau tuke: Tu weh gar dran o stilepen win jaake raha, har tu plaissral gar tiri tseli sijaan. 27"Tumer djinenna, kai was glan i raha tsiro ap i phurende penlo: Romeha, ma choche tiri romjat i wawar djuwjaha! Romnija, ma choche tiro romes i wawar mursheha! 28Me penau tumenge: Koon ap i wawareskri romjate dikella, te sowell lo laha, kowa chochas lat an peskro dji. 29Te kamell tiro jak tchomone te dikell, hoi anell tut ap i tchilatcho drom, palle tchin lat win, un witse lat tutar! Hi tuke feteder, te nashress jek jak, har te wess an o bengeskri jag witsedo. 30Un te kamell tiro tchatcho wast, te kress i tchilatcho koowa, palle de les tele, un witse les tutar! Hi tuke feteder, te nashress tu jek wast, har te djas an o bengeskri jag. 31Glan i raha tsiro was ap i phurende penlo: Kowa, kai peskri romjat mukella, kowa dell lat i liil, te nai djal li peske. 32Me penau tumenge: Kones hi i romni, kai chochas les gar i wawar mursheha, un job mukell lat, kowa krell, te lell li i wawares. Un jaake anell li doosh ap peste. Un kowa, kai romedinerell i mukli djuwjat, kowa anell doosh ap peste, te las lo i wawareskri romjat. 33Tumer djinenn ninna, kai was glan i raha tsiro ap i phurende penlo: De kek chocheni sowel tele! Un kowa, hoi tu o Debleske sowel dal, te kress ninna! 34Me penau tumenge: Ma denn tumen sowel! Ma denn gole ap o bolepen, te shunell lo tumari sowel! O Dewel hi kote o rai. 35Ma denn gole ap i phub, te shunell li tumari sowel! O Dewel hi ninna kote o rai. Ma denn gole ap o foro Jerusalem, te shunell lo tumari sowel! Kowa hi o Debleskro foro. 36Ma denn witar kek sowel ap tumaro shero! Tumer nai krenn kek bal ap tumaro shero kalo un kek bal parno. 37Te penenn tumer: Awa! jaake hunte well kowa ninna: Awa! Un te penenn tumer: Na-a! jaake hunte well kowa ninna: Na-a! Hako lab, hoi koi pral wergal hi, well o bengestar. 38Tumer djinenna, kai was glan i raha tsiro ap i phurende penlo: Koon dukrell i wawares, koleske kress, har job kras un gar budeder: Te dukras lo i wawareskro jak, palle duke leske jek jak kokres. Te dukras lo i wawareskro dand, palle duke leske jek dand kokres. 39Me penau tumenge: Ma hadenn tumaro wast ap koleste, kai kras tumen tchilatcho koowa! Te das tuke jek ap i tchatchi tcham, koleske rike ninna i serwi koi, te dell lo tut! 40Un kowa, kai anell tut glan i tchatchepangre, te lell lo tiro gad, koles de ninna tiri plashka! 41Un te kamell jek tutar, te djas tu jek kotar drom leha, jaake dja leha dui kope jaake dur ap o drom! 42Te mangell jek tutar tchomone, palle de les kowa! Ma bitche koles tutar, kai kamell tutar lowe te patsell! 43Tumer djinenna, kai glan i raha tsiro i phurenge penlo was: Ab latches ap koleste, kai pash tute hi! Ma ab latches ap koleste, kai kras tchilatcho koowa ap tute. 44Me penau tumenge: Awenn latches kolenge, kai kran tchilatcho koowa ap tumende! Mangenn o Debles kolenge, kai lenn tumen palla! 45Jaake han tumer tchatchepaha tchawe o baro Deblestar, kai hi tumaro dad an o bolepen. Job mukella o kham pre te djal kol tchilatchenge un kol latchenge. Un job dell brishin ap kolende, kai pal o tchatchepen djiwenna, ninna ap kolende, kai tchilatcho koowa krenna. 46Tumer te wenn latches kolenge, kai kran latcho koowa ap tumende, patsenn tumer, kai o Dewel sharell tumen? Na-a! Ninna i chochene hi latches kolenge, kai ap lende latches hi. 47Tumer te han latches ap tumare phralende kokres, palle krenn tumer, hoi lauter krenna. Ninna kolla, kai prindjrenn o Debles gar, krenn kowa, hoi tumer krenna. 48Tumer hunte wenn jaake latches ap i menshende, har tumaro dad an o bolepen hi latches ap i menshende.

will be added

X\