Mateo 3

1An ko tsiro was i mursh an o mulo them an o them Judea. Leskro lab his Johanni. Job hi kowa, kai thowas i menshen an o pani o Debleske. 2Un job penas i menshenge: "Mukenn tumaro tchilatcho drom, un djan ap o Debleskro drom! O tsiro well sik, kai lell o Dewel i menshen dran o tchilatchepen win." 3O Johanni hi ko mursh, kolestar o Debleskro rakepaskro, o Jesaja, penas: Kote hi jek, kai an o mulo them gole della un penella: Krenn o drom o Debleske, te nai well lo pash i menshende! Lenn halauter krik, hoi o Debleske an o drom tchiddo hi. 4I plashka dran fichengre balla his ap leste. Un i ledertikri dori his trul leste. Un leskro chapen his gwin un tikne stepangre, kai stenn an o senlepen trujal. 5Un bud menshe djan pash leste. Kolla wan dran o foro Jerusalem un dran o tselo them Judea un dran o them pash o pani Jordan. 6Un jon penan glan i menshende hawo tchilatcho koowa jon kran, un mukan pen lestar an o pani Jordan te thowell, te sikrenn le, kai mukan le pengro tchilatcho drom. 7Ninna bud Farisarja un Saddukarja wan pash leste, te mukenn le pen lestar an o pani te thowell. Har job kolen dikas, penas lo ap lende: "Tumer tchilatche sapa! Tumer nai nashenn gar krik glan o Debleskri choli, hoi wella pral i menshende. 8Sikrenn i menshende, te djan tumer ap o Debleskro drom un buder gar ap o tchilatcho drom! 9Ma penenn: O Abraham hi maro dad! Me penau tumenge: O Dewel nai krell dran kal barra o Abrahameskre tchawen. 10Tumer han har ruka, kai wenna tele dino. I tower hi koi tchiddo, te well ko tselo ruk tele dino. Hako ruk, hoi hidjella kek latcho koowa, well tele dino, un an i jag witsedo. 11Me thowau tumen an o pani. Kowa sikrella, kai tumer mukan tumaro tchilatcho drom, un djan kanna ap o Debleskro drom. Pal mande well jek, kowa hi sorleder har me. Un me hom gar moldo, te hidjrap leskre tircha leske. Kowa tchiwell o Debleskro Ducho ap tumende. Kowa hi har i jag. 12Job hi har i hacho, kai rikrell i witsepaskri an peskro wast, te witsrell lo o djob pral, jaake te perell o phuss tele ap i phub. Peskro djob anell lo an peskro djobeskro kheer dre. Un i phuss chatchrell lo an i jag, hoi hako tsiro chatchella." 13Ap ko tsiro was o Jesus dran o them Galilea pash o pani Jordan, te mukell lo pes o Johannestar an o pani te thowell. 14Kowa kamas les gar an o pani te thowell. Job penas ap leste: "Tu hunte thowals man an o pani. Hoske wal tu pash mande, te thowap tut an o pani?" 15Koi penas o Jesus ap leste: "Muk kowa kanna jaake te well! Hi mishto menge, te kras kowa lauter, hoi o Dewel mendar kamella." Un o Johanni kras, hoi o Jesus leske penas, 16un thowas o Jesuses an o pani. Har o Jesus dran o pani pral djas, djas o bolepen pre. Un job dikas o Debleskro Ducho har i parno tchirklo ap peste tele te well. 17Un i rakepen dran o bolepen penas: "Kawa hi miro tchawo, kai me kamau. Pral leste hom me bachtelo."

will be added

X\