Mateo 25

1Un o Jesus penas: Ap ko tsiro, kai wella o Menshengro Tchawo pale, djal kowa jaake har kol deesh tarne tchentsa, kai djan ap i bijab. Jon lan pengre momlia an o wast; un djan ap o drom, kai o bijabeskro hunte wella. 2Pantch lendar hi dinelo, un pantch lendar hi gosewo. 3Kolla pantch dinele lan kek djet peha. 4I gosewe tchen his djet an pengre khore. 5Un ko bijabeskro was gar jaake sik. Doleske wan lauter khino un sowan dre. 6His deesh-te-dujenge an i rat; koi das jek bari gole: O bijabeskro wella! Djan win pash leste! 7Koi stan i tsele tarne tcha pre, un kran i jag an pengre momlia bareder. 8Un kol dinele tcha penan ap kolla gosewe tchende: Denn men djet! Mare momlia djan win. 9Penan i gosewe: Na-a! Maro djet hi gar doha menge un tumenge. Djan pash i bikepangre, un ginenn tumenge djet! 10Har jon kote djan, te ginenn le penge djet, koi was o bijabeskro. Un kolen, kai len djet his, djan leha an o kheer, kai i bijab hi. Un o wudar was pal lende pandlo. 11Un pal i tikno tsiro wan ninna kolla wawar tarne tcha glan o wudar, un penan: Rai, rai, kre menge o wudar pre! 12Penas lo ap lende: Tchatchepaha, me prindjrau tumen gar. 13Doleske penau me tumenge: Rikrenn tumare jaka pre! Tumer djinenn gar ko diwes, kai o rai pale wella! 14Kowa hi jaake har pash ko mursheste, kai kamas an i wawar them te djal. Dran kowa das lo peskre budepangren gole, un das len peskro tselo brawlepen an i wast. 15Hakeneste das lo jaake bud lowe, har kowa haiwas, te ginell un te bikrell kol lowentsa. Ko jekeste das lo pantch gone pherdo rup, un ko wawareste das lo dui gone, un pale i wawareste jek gono. Un palle djas lo an o wawar them. 16Un ko mursh, kai kol pantch gone pherdo rup las, kowa djas sik pash i bikepangre, ginas un bikras bud koowa, un anas pantch wawar gone pherdo rup khetne pashal. 17Un ninna kowa, kai kol dui gone peskro rajestar las, kowa las dui wawar gone pashal. 18Ko mursh, kai jek gono peskro rajestar las, djas ap i kotar phub un khatras ko rup an i phub. 19Un pal i raha tsiro was lengro rai pale un mukas peskre budepangren glan leste te anell, te lell lo lendar kol lowe, hoi jon leske khetne anan. 20Un ko budepaskro, kai las lestar pantch gone pherdo rup, djas pash leste, un penas: Mo rai, pantch gone dal man. Un dik, me lom pantch wawar gone pashal. 21Penas o rai ap leste: Kowa kral tu mishto. Tu hal i latcho budepaskro. Me dom tut i tikni budi, un tu kral kai budi mishto. Doleske dau me kanna bud koowa an tire wasta. Ab an miro kheer dre, te wess tu mantsa bachteles! 22Un ko budepaskro, kai las lestar dui gone pherdo rup, kowa djas ninna pash leste, un penas: Mo rai, dui gone dal man. Un dik, me lom dui wawar gone pashal. 23Penas o rai ap leste: Kowa kral tu mishto. Tu hal i latcho budepaskro. Me dom tut i tikni budi, un tu kral lat mishto. Doleske dau me kanna bud koowa an tire wasta. Ab an miro kheer dre, te wess tu mantsa bachteles! 24Un ko budepaskro, kai jek gono pherdo rup las, kowa djas pash leste, un penas: Mo rai, me djinom, tut hi i dji dran bar. Tu leh tuke o djob, hoi i wawar an i phub tchiwas, te was kowa baro. Tu leh kote tuke khetne, kai budral gar. 25Doleske darom tutar, djom win, un khatrom tiro gono pherdo rup an i phub. Un dik, kate hi lo. 26Penas peskro rai ap leste: I tchilatcho budepaskro hal tu. Tu kral tiri budi gar mishto. Tu djinal, te lap mange o djob, hoi me gar an i phub tchiwom, un lap mange kote khetne, kai budrom gar. 27Tu hunte dals mire lowe kolende, kai patsenn i lowe win. Un te woms pale, palle loms budeder lowe pale, har tu len dal. 28Un palle penas o rai ap i wawarende, kai koi tardo hi: Lenn ko jek gono lestar, un denn les koleste, kai hi les kol wawar deesh gone! 29Hakeno, kai hi les bud, kowa lell budeder. Jaake well les bud brawlepen. Un kowa, kai hi les gar bud, kolestar well ninna kowa krik lino, hoi les hi. 30Ko budepaskro, kai tchi moldo hi, witsrenn les an i kali rat win! Kote rowenn le, un dandrenn i danda i dukatar khetne. 31Un o Jesus penas: Ap ko diwes, kai well o Menshengro Tchawo an peskro tselo railepen, un leha wenna i tsele bolepangre, palle hi lo o rai pral halauter, un rakrell o tchatchepen win pral i tsele menshende ap i phub. 32Un glan leste wenna i tsele menshe dran hake themma khetne. Un job tchiwell len ap dui riga, jaake har i bakrengro rai tchiwell i bakre ap jek rig un i busnia ap i wawar rig. 33I latche menshe tchiwell lo ap peskri tchatchi rig, un i wawar ap peskri serwi rig. 34Un palle penell o baro rai ap kolende, kai ap leskri tchatchi rig tardo hi: Ap tumende well i bacht miro dadestar an o bolepen. Awenn un djiwenn mantsa khetne an miri harmenationa. Kowa kamas o Dewel jaake raha har o bolepen un i phub koi hi. 35Man his bok. Un tumer dan man te chal. Man his trush. Un tumer dan man te pijell. Me homs kek tumendar. Un tumer lan man an tumare khera. 36Man his kek ripen ap mande. Un tumer dan man i ripen. Me homs nasselo. Un tumer wan pash mande. Me homs an o stilepen. Un tumer wan ninna pash mande. 37Palle putchenn lestar i latche menshe, kai ap peskri tchatchi rig tardo hi: Rai, kaana his tut bok, un mer dam tut te chal? Un kaana his tut trush, un mer dam tut te pijell? 38Un kaana hals tu kek mendar, un mer lam tut an mare khera? Un kaana his tut kek ripen, un mer dam tut jek? 39Un kaana hals tu nasselo un stildo, un mer wam pash tute? 40Un o baro rai penell lenge: Tchatchepaha, me penau tumenge: Ko latchepen, hoi tumer jekeske mire tchorwele phralendar kran, ko latchepen kran tumer mange. 41Un palle penell job kolenge, kai ap leskri serwi rig tardo hi: Tumer han tel o Debleskro praassepen tardo! Djan tumenge! Djan an koi jag, hoi chatchella hako tsiro, un hoi hi o bengeske un leskre kurepangre kerdo! 42Man his bok. Tumer dan man tchi te chal. Man his trush. Tumer dan man tchi te pijell. 43Me homs kek tumendar. Un tumer lan man gar an tumare khera dre. Man his kek ripen, un tumer dan man kek. Me homs nasselo un stildo, un tumer wan gar pash mande. 44Un palle penenn jon ap leste: Rai, kaana his tut bok un trush? Kaana hals tu kek mendar? Kaana his tut kek ripen? Kaana hals tu nasselo un stildo, un mer hams gar tuke koi? 45Palle penell lo ap lende: Tchatchepaha, me penau tumenge: Ko latchepen, hoi tumer gar jekeske mire tchorwele phralendar kran, ko latchepen kran tumer mange ninna gar. 46Un kol tchilatche len i phagi hako tsireske. I latche len o djipen, hoi gar pre-herella.

will be added

X\