Mateo 2

1Ap ko tsiro, har was o Jesus an o foro Betlehem an o them Judea boldo, his o Herodes o baro rai pral o them. Koi wan gosewe mursha dran o them, kai o kham pre djala, un djan an o foro Jerusalem. Jon putchan i menshendar an o foro Jerusalem: 2"Kai hi o tarnepen, kai well o baro rai pral i biboldende? Mer dikam ko bolepaskri momeli ap o bolepen pre te djal, hoi mende sikras, kai job boldo was. Kanna wam kate, te mangas les an." 3Har o baro rai Herodes kowa shunas, trashas lo. Un ninna bud menshe an o foro Jerusalem trashan leha khetne. 4Un o Herodes mukas i tsele bare rashajen un i biboldengre tchatchepangren khetne te well, un putchas lendar, kai ko baro rai boldo wella, kolestar o Dewel penas, te well job. 5Un jon penan leske: "An o foro Betlehem an o them Judea. Jaake tchinas kowa o Debleskro rakepaskro: 6Tu, o foro Betlehem, hoi an o them Judea tchiddo hi, tut hi i baro lab mashkral i tsele forja an o them Judea. Dran tute wella ko baro rai, kai ap mire menshende, o Israel, garda della, jaake har i bakrengro rai garda della ap peskre bakre." 7Palle mukas o Herodes kol gosewe murshen tchorchanes pash peste te anell, te putchell lo lendar, kaana ko bolepaskri momeli diklo was. 8Un job penas lenge: Djan an o foro Betlehem un rodenn ko tarnepen! Un te hatsan les, penenn les mange, te nai wap me ninna, te mangap les an. 9Un har jon kowa lestar shunan, djan le dureder. Un glan lende djas ko bolepaskri momeli, hoi jon an pengro them dikan. Un kote, kai o tarnepen hi, atchas koi bolepaskri momeli pral wergal tardo. 10Un har jon koi bolepaskri momeli koi tardo dikan, wan le o tselo djijestar bachtelo. 11Un jon djan an ko kheer, un dikan kote o tarnepas un leskri dat, i Mariat. Un jon witsran pen glan leste tele, mangan les an, un tchiwan ko kutch brawlepen glan leste, hoi dan le leste. Un kowa his sonakai, kutch kasht, hoi sungella mishto, ninna wawar kutch kasht, hoi wella djet lestar kerdo. 12Un an i suni penas o Dewel lenge, te djan le gar pash o Herodeste pale. Jaake djan le penge, te wenn le ap i wawar drom an pengro them pale. 13Un har jon penge djan, was o Debleskro bolepaskro pash o Josefeste an i suni, un penas ap leste: "Ste pre! Le o tarnepas un leskri dat, un naash an o them Egiptia! O Herodes mukell o tarnepas te rodell, te marell lo les. Atch koi, bis te penau me les tuke, te wess pale!" 14Un job stas pre an koi rat, las o tarnepas un leskri dat, un djas lentsa an o them Egiptia. 15Un kote atchas lo, jaake raha har o Herodes djido his. Un jaake was kowa tchatcho, hoi o Dewel ap peskro rakepaskro penas: Dran o them Egiptia dom miro tchawes gole. 16I gosewe mursha djan ap i wawar drom an pengro them, un wan gar pash o Herodeste pale. Har job kowa haiwas, was i bari choli ap leste. Un job bitchras lurden an o foro Betlehem un an i gaba trujal, te marenn le kol tsele mursh tchawen, kai dui bersha un tarneder hi. Kol dui bersha his ko tsiro, kai i gosewe mursha leske penan, te was o tchawo boldo bis ko diwes. 17Koi was kowa tchatcho, hoi o Debleskro rakepaskro, o Jeremia, penas: 18Bari gole un bud ropen shunan le an o gab Rama. I Rahel rowella pral peskre tchawende, un kamell kekestar latche laba te shunell. Lakre tchawe hi buder gar koi. 19An ko tsiro, har o Josef an o them Egiptia his, meras o Herodes. Koi was o Debleskro bolepaskro pash leste an i suni, 20un penas ap leste: "Ste pre! Le o tchawes un leskri dat, un dja pale an o them Israel! Kolla hi mulo, kai kaman o tchawes te marell." 21Un job stas pre, las o tchawes un leskri dat, un djas an o them Israel pale. 22Ap o drom shunas lo, te hi o Archelao kanna o baro rai pral o them Judea. Kowa his o Herodeskro tchawo. Doleske trashas o Josef, te djal lo kote pale. Un o Dewel penas leske an i suni, kai te djal. Un job djas an o them Galilea. 23Un kote djiwas lo an i foro, hoi kharella Nazaret. Un jaake was kowa tchatcho, hoi o Debleskre rakepangre glan i raha tsiro penan: Jon denn les Nazaretari gole.

will be added

X\