Mateo 10

1Un o Jesus das peskre deesh-te-dui malen pash peste gole, un das len i soor pral i benga, te nai tradenn le len dran i menshende win, un te nai krenn le lauteren sasto, kai nasselo hi. 2Kolla hi i laba kol deesh-te-dujendar, kolen o Jesus pash i menshende bitchras: O glanstuno his o Simon, kai kharas ninna Petro, un leskro phraal Andreas, un o Jakobo un leskro phraal Johanni, - kolengro dad his o Zebedeo, 3o Filipo, un o Bartolomeo, o Thomas un o Mateo, kai i biboldendar lowe i Remarjenge dre las, un o Jakobo, - koleskro dad his o Alfeo, un o Tadeo, 4un o Simon, kai his kol menshendar, kai kharenna Zelotarja un o Judas Iskariot, ko phukepaskro. 5Kolla deesh-te-dui mursha bitchras o Jesus pash i menshende, un penas soreles ap lende: Ma djan pash kolende, kai kek bibolde hi! Ma djan an i forja, kai i Samaritarja djiwenna! 6Djan pash i Israelitarja! Jon hi har nashede bakre! 7Tumer te wenn pash lende, palle penenn lenge: O tsiro well sik, kai lell o Dewel i menshen dran o tchilatchepen win. 8Krenn i nasselen sasto, un krenn i mulen djido! Un kolla, kai i djungelo nasslepen ap o mass hi, kolen krenn ninna sasto! Tradenn i bengen dran i menshende win! Kai soor dom tumen tchitcheske. Doleske krenn kowa ninna tchitcheske, un lenn kek lowe lendar! 9Ma lenn lowe tumentsa ap o drom, witar kek sonakai, kek rup, un witar kek tikne lowe! 10Lenn kek possita tumentsa, kek duito gad, kek tircha, witar kek kasht! I budepaskro lell peskro chapen kolendar, kolenge job budrella. 11Tumer te wenn an i foro un an i gab, palle putchenn pal jekeste, kai moldo hi, te atchenn tumer an leskro kheer. Pash leste atchenn jaake raha har tumer atchenn an ko foro. 12Te wenn tumer an i kheer dre, palle rakrenn o Debleskri bacht pral kol menshende win! 13Un jon te lenn tumen an lengro kheer dre, palle well o Debleskri bacht ap lende. Jon te lenn tumen gar an lengro kheer dre, palle well o Debleskri bacht gar ap lende. 14Kote, kai lenn le tumen gar pre, un kamenn tumen gar te shunell, kote djan tumenge dran ko kheer un dran ko foro win! Un denn koi tchik tumare pirendar tele! 15Tchatchepaha, me penau tumenge: Ap ko diwes, kai o Dewel o tchatchepen pral i tsele menshende ap i phub wi-rakrella, lenna kol menshe, kai lan tumen gar pre, i bareder phagi har kolla, kai djiwan an i forja Sodom un Gomorra. 16Djinenn, me bitchrau tumen har bakre mank i diwje djuklende. Doleske wenn gosewo har i sapa un djudjo har i parne tchirkle, an kolende kek chochepen hi! 17Denn jak, hoi i menshe tumentsa krenna! Jon anenn tumen glan i tchatchepangre, un mukenn tumen an lengre kangria i tchupnijaha dawa te dell. 18Tumer patsenn ap mande. Doleske anenn le tumen glan i pralstunende un glan i bare rajende, te rakrenn jon i phagi win pral tumende. Kowa well ap tumende, te rakrenn tumer mandar glan lende un glan kolende, kai o Debles gar prindjrenna. 19Kowa te well, palle ma darenn, hoi tumer hunte penenna! O Dewel sikrell tumende, hoi tumer hunte penenna ap ko diwes. 20Tumer han gar kolla, kai rakrenna. Kowa hi o Debleskro Ducho, kai dran tumende rakrella. 21Ap ko tsiro dell i phraal peskro phrales an lengre wasta, te well lo maredo. Un o dad dell o tchawes an lengre wasta, te well job maredo. Un i tchawe hi midjak ap pengre dadende un pengre dajende, un denn len an i wasta kolendar, kai marenn len. 22Tumer patsenn ap mande. Doleske wenn i menshe chojedo ap tumende. Kowa, kai atchell soreles tardo an o patsepen, jaake raha, har job djiwella, kowa lell o Debleskro djipen. 23Te lenn le tumen an jek foro palla, palle nashenn an i wawar foro! Tchatchepaha, me penau tumenge, tumer wenna gar an hako foro an o them Israel jaake raha har o Menshengro Tchawo gar pale was. 24Jek, kai djal an o sikepaskro kheer, djinell gar budeder har o sikepaskro. Un i budepaskro haiwell gar budeder har peskro rai. 25Jek, kai djal an o sikepaskro kheer, koleske hi doha, te djinell lo jaake bud har peskro sikepaskro. Un i budepaskro, koleske hi doha, te haiwell lo jaake bud har peskro rai. Un te penenn le ap o rajeste pral ko kheer: Beng! palle kharenn le ninna kolen jaake, kai an leskro kheer djiwenna. Doleske ma darenn lendar! 26Well o diwes, kai well kowa diklo, hoi kanna khatedo hi. Well o diwes, kai djinell hakeno kowa, hoi kanna kek djinella. 27Kowa, hoi me tumenge tchorchanes penau, kowa penenn i menshenge jaake, te shunell les hakeno! Un kowa, hoi tumenge an o kand penlo wella, kowa penenn i tsele menshenge! 28Ma trashenn kol menshendar, kai nai marenn tumen! Jon nai marenn gar ko djipen an tumende, hoi ninna pal o merepen djiwella. Trashenn o Deblestar, kai nai tchiwell tumen pal o merepen an o bengeskri jag, kai han hako tsiro nashedo! 29Dui tikne tchirkle hi glan i menshende gar budeder moldo har jek bema. Un kek lendar perella ap i phub, te kamell o Dewel kowa gar. Job hi tumaro dad an o bolepen. 30Un job djinella, kitse balla ap tumaro shero hi. 31"Doleske ma darenn! Tumer molenn budeder har bud tchirkle. 32Me penau tumenge: Koon glan i menshende penella: O Jesus hi miro rai! kolestar penau me glan miro dadeste an o bolepen: Job hi miro! 33Koon man buchoste della glan i menshende, koles dau me ninna buchoste glan miro dadeste an o bolepen. 34Ma patsenn, te lap o tchingepen ap kai phub krik. Na-a! Kowa krau gar. Mantsa well o kurepen. 35Mange tchingrenn pen i menshe. O tchawo tchingrell pes peskro dadeha. Un i dai tchingrell pes peskri tchaha. Un i tchai tchingrell pes peskri daha. Un o tchaweskri romni tchingrell pes peskro romeskri dai. 36Un kowa, kai ap o wawareste chojedo hi, djiwell leha an leskro kheer khetne. 37Koon kamell peskro dades un peskri dai budeder har man, hi gar moldo, te well lo miro maal. Un koon kamell peskro tchawes un peskri tchat budeder har man, hi gar moldo, te well lo miro maal. 38Un koon lell gar peskro trushel ap peste un djal mantsa, hi gar moldo, te well lo miro maal. 39Koon kamell peskro djipen te rikrell, kowa nashrell les. Koon peskro djipen mange nashrella, kowa lell les pale. 40Koon tumen an peskro kheer lella, lell man an peskro kheer. Un kowa, kai man an peskro kheer lella, kowa lell koles an peskro kheer, kai man bitchras. 41Koon i Debleskro rakepaskres an peskro kheer lella, un krell kowa doleske, kai kowa o Debleskro lab penella, koles dell o Dewel jaake bud brawlepen, har job peskre rakepangren della. Koon i Debleskro murshes an peskro kheer lella, un krell kowa doleske, kai kowa i Debleskro mursh hi, koles dell o Dewel jaake bud brawlepen, har job i Debleskro murshes della. 42Koon della jekes mire malendar i khoro shilo pani te pijell, koles dell o Dewel tchatchepaha ko latchepen pale, hoi job kras.

will be added

X\