Marko 13

1Har o Jesus dran o Debleskro baro kheer win djas, penas jek peskre malendar ap leste: "Sikepaskro, dik, sawe bare barra un sawe shukar khera!" 2Penas o Jesus ap leste: "Kal bare khera, hoi tu dikeh, djan paash. Kek bar atchell ap o wawareste!" 3Un job djas ap o djeteskri berga, hoi hi wergal o Debleskro baro kherestar, un beshas pes kote. Un har jon kokres his, putchan lestar o Petro, un o Jakobo, un o Johanni, un o Andreas: 4"Pen menge, kaana well kowa? Har nai dikas mer, kai kowa lauter glan o wudar tardo hi, hoi wella?" 5Un o Jesus penas ap lende: Denn jak! Ma mukenn tumen kekestar o Debleskro dromestar tele te anell! 6Koi wenna bud mursha, kai penenna: Me hom o Kristo, ko baro rai, kolestar o Dewel penas, te well job. Un bud menshe patsenn ap lengro chochepen. 7An ko tsiro hi kurepen an kol themma, kai hi dur tumendar un ninna an kol themma, kai hi gar dur tumendar. Tumer te shunenn kowa, ma trashenn! Kowa hunte well jaake. Ko tsiro, kai i phub paash djala, well gar jaake sik. 8I pralstune pral bare themma kurenn pen i wawar pralstunentsa. Un i menshe dran jek them marenn i menshen an i wawar them. Un kate un kote well i phub trisslemen. Bud menshen hi gar doha te chal. Kowa lauter wella jaake pral i phub, har i duka wenna pral i djuwjate, kai lell i tarnepen. 9Denn jak ap tumende! Tumer wenn glan i tchatchepangre anlo, un chan dawa an i biboldengre kangria. Tumer patsenn ap mande. Doleske anenn le tumen glan i pralstunende un glan i bare rajende, te rakrenn jon i phagi wi pral tumende. Te han glan lende tardo, palle nai rakrenn tumer mandar, te shunenn jon pral mande o tchatchepen. 10Glan ko tsiro, kai i phub paash djala, hunte well o latcho lab mandar penlo an i tsele themma. 11Te taprenn le tumen, te anenn le tumen glan i tchatchepangre, ma darenn, hoi hunte penenna! Ap ko diwes, kai han glan lende tardo, sikrell o Dewel tumen, hoi te penenn lenge. Kowa rakrenna! Ma bistrenn, tumer han gar kolla, kai rakrenna. Kowa hi o Debleskro Ducho, kai dran tumende rakrella. 12An kol diwessa phukrell o phraal ap peskro phraleste, te well job maredo. Un ninna o dad krell kowa peskro tchaweha. Un i tchawe hadenn pen pral pengre dadende un pral pengre dajende, un denn len an i wasta kolendar, kai marenn len. 13Tumer patsenn ap mande. Doleske wenn i tsele menshe chojedo ap tumende. Kowa, kai atchell soreles tardo an o patsepen, jaake raha, har job djiwella, kowa lell o Debleskro djipen. 14An o Debleskro lab hi tchindlo pral ko djungelo pale-tchiddo koowa. Koon kawa drawerella, kamaus, te haiwell lo les ninna. Ap ko diwes, kai dikenn tumer ko djungelo pale-tchiddo koowa kote tardo, kai hunte well lo gar tardo, palle hunte nashenn kolla, kai hi an o them Judea, sik ap i berge! 15Kowa, kai hi pral ap o kheer, hunte djal buder gar an peskro kheer dre, te lell lo peske tchomone. 16Un kowa, kai budrella ap i kotar phub, kowa hunte djal buder gar khere, te lell lo peskri baja. 17Koi bibacht hi bari kol djuwjenge, kai hi an wawar koowa, ninna kol djuwjenge, kai hi len i tarnepen. 18Mangenn o Deblestar, te well kowa lauter gar an o wend. 19Kowa, hoi an kol diwessa pral i menshende wella, hi djungleder har ko tselo tchilatcho koowa, hoi ap i menshende was jaake raha, har o Dewel i phub kras. Un ko tsiro, hoi well pal kowa, well witar gar jaake tchilatcho. 20Te krals o Dewel ko tchilatcho tsiro gar tikneder, wals kek mensho dran o tchilatcho tsiro win. Kolen, kai o Dewel peske win rodas, kolenge kras lo o tchilatcho tsiro tikneder. 21Te penell jek ap tumende: Dikenn, kate hi o Kristo! - palle patsenn les gar! Un te penell i wawar: Ake, kote hi lo! - palle patsenn les witar gar! 22Chochene mursha wenna un penenna ap tumende: Me hom o Kristo. Un i chochene rakepangre penenna: Me wom o Deblestar bitchedo. Un jon krenna baro un sorelo koowa, hoi i mensho nashte krell gar dran peskri soor. Te djals kowa, anans le kolen o Debleskro dromestar tele, kolen o Dewel peske win rodas. 23Denn jak ap tumende! Me penom tumenge kowa lauter, te djinenn les ap ko tsiro, kai kowa wella. 24An kol diwessa pal ko tchilatcho tsiro, wella o kham kalo har i rat, un o mondo dikell kek buder. 25Un i bare momlia ap o bolepen perenn tele. Un o bolepaskri soor perell khetne. 26Palle dikenn le o Menshengro Tchawes, har well lo an i wolke bari sorjaha un railepen. 27Palle bitchrell lo i bolepangren pral i tseli phub, te anenn le dran hako them kolen khetne, kai len o Dewel peske win rodas. 28Me kamau te sikrap tumende tchomone. Dikenn ap o faigetikro ruk! Te wenn leskre kashta senelo, un i patria wenn dran lende win, palle djinenn tumer, te well sik o nijal. 29Jaake hi kowa ninna koleha, pral kowa rakrom. Te dikenn tumer, har kowa lauter wella, palle djinenn tumer, kai job glan o wudar tardo hi. 30Tchatchepaha, me penau tumenge: Kol menshe, kai an ko tsiro djiwenna, dikenna kowa lauter pengre jakentsa. 31O bolepen un i phub atchenna gar. Mire laba atchenna hako tsiro. 32Kek djinell ko diwes un ko tsiro, kai kowa lauter wella. I bolepangre an o bolepen djinenn les gar, witar gar o Debleskro tchawo. Miro dad an o bolepen kokres djinell les. 33Denn jak! Rikrenn tumare jaka pre! Tumer djinenn gar, kaana hi ko tsiro kai. 34Kowa hi jaake har pash i mursheste, kai djas ap o them. Job mukas peskro kheer un das peskre budepangren lauter an o wast, hakeneste das lo leskri budi. Un penas ap koleste, kai pash o wudar beshdo hi: De garda ap miro kheer! Ma sob! 35Jaake penau tumenge: Rikrenn tumare jaka pre! Tumer djinenn gar ko tsiro, kai o rai pral o kheer pale wella. Job nai well ap i rati, nai well mashkral an i rati, nai well ap ko tsiro, kai dell o bashno gole, nai well taissarlake. 36Jaake denn garda, te hatsell lo tumen gar ap o sopen, te well lo ap jek kopo. 37Kowa, hoi me tumenge penaua, ko penau lauterenge: Denn jak un sowenn gar!

will be added

X\