Luka 3

1His ap ko tsiro, kai o Tiberio an o foro Rom deesh-te-pantch bersha baro rai his. Un o Pontio Pilato his o rai pral o them Judea. Un o Herodes his o rai pral o them Galilea. Un peskro phraal Filipo his o rai pral i themma Iturea un Trakonitia. Un o Lisanio his o rai pral o them Abilene. 2Un o Hannas un o Kajafas his bare rashaja. Ap ko tsiro rakras o Dewel an o mulo them ap o Johanneste. Koleskro dad his o Zachari. 3Un o Johanni djas an o them pash o pani Jordan trujal, un penas i menshenge: "Mukenn tumaro tchilatcho drom! Un djan ap o Debleskro drom! Mukenn tumen mandar an o pani te thowell, te sikrenn tumer, kai mukan tumaro phuro djipen! Un o Dewel lell tumari doosh tumendar krik." 4Jaake tchinas o Debleskro rakepaskro, o Jesaja: Jek dell gole an o mulo them: Krenn maro Debleske o drom, te nai well lo pash i menshende! Lenn halauter krik, hoi o Debleske an o drom tchiddo hi! 5Krenn, te well haki berga tikneder! Un hadenn ko them, hoi mank i berge tchiddo hi! O bango drom te well buder gar bango! Un o djungelo drom te well mishto kerdo. 6Palle dikell hakeno, har o Dewel i menshen dran o tchilatchepen win lella. 7Bud menshe djan pash o Johanneste, te mukan le pen lestar an o pani te thowell. Job penas lenge: "Tumer han sapa! Tumer nai nashenn gar glan o Debleskri choli krik, hoi wella pral i menshende. 8Sikrenn i menshende, te djan tumer ap o Debleskro drom, un buder gar ap o tchilatcho drom! Ma penenn, kai o Abraham tumaro dad hi! Kowa anell tumen gar dureder. Me penau tumenge: O Dewel nai krell dran kal barra o Abrahameskre tchawen. 9Tumer han har ruka, kai o tower pashal tchiddo hi, te wenn le tele dino. Hako ruk, kai well kek latcho koowa baro pre, well tele dino, un an i jag witsedo." 10Un i menshe putchan o Johannestar: "Hoi te kras mer?" 11"Te hi jekes dui gada," penas lo, "mu dell lo jek gad koleste, kones kek hi. Un kones chapen hi, kowa dell koleste i paash, kones tchi hi." 12Koi wan ninna bibolde pash leste, te mukenn pen le lestar an o pani te thowell. Kolla his mursha, kai lenn kol themeskre lowe i Remarjenge dre. Jon putchan lestar: "Sikepaskro, hoi te kras mer?" 13Penas o Johanni ap lende: "Ma lenn gar budeder lowe dre, har win kerdo hi!" 14Ninna i lurde putchan lestar: "Har hi mentsa? Hoi te kras mer?" Lenge penas lo: "Ma krenn kekeske tchilatcho koowa, un lenn kekestar lowe i sorjaha! Kol lowe, hoi plaissrenn i pralstune tumenge, kol lowe mukenn tumenge doha te well!" 15I menshe dikan, kai o Dewel o Johannes bitchras, un jon putchan pendar: "Hi job ko baro rai, kolestar o Dewel glan i raha tsiro penas, te well job?" 16Koi penas o Johanni ap lauterende: "Me thowau tumen an o pani. Jek wella, kowa hi sorleder har me. Me hom gar moldo, te krap leskre tircha pre. Job tchiwell o Debleskro Ducho ap tumende, un krell tumen djudjo, har i jag o saster djudjo krella. 17Job hi har i hacho, kai rikrell i witsepaskri an peskro wast, te witsrell lo o djob pral, jaake te perell o phuss tele ap i phub. Peskro djob anell lo an peskro djobeskro kheer dre. Un i phuss chatchrell lo an i jag, hoi chatchella hako tsiro." 18Kol labentsa, ninna bud wawar labentsa rakras o Johanni i menshenge an o dji, un sikras lende o Debleskro drom. 19Un o Herodes, ko baro rai pral o them Galilea, las peskro phraleskri romjat, i Herodia, un kras wawar tchilatcho koowa. Un o Johanni penas leske: "Kowa hi tchilatcho, hoi tu kral." 20Har o Herodes kowa shunas, tchiwas lo o Johannes an o stilepen, un anas jaake wawar doosh ap peste. 21Ap ko tsiro, kai thowas o Johanni i menshen an o pani, was ninna o Jesus pash leste, un mukas pes lestar an o pani te thowell. Un har o Jesus o Debles an-mangas, djas o bolepen pre. 22Un o Debleskro Ducho was har i parno tchirklo ap leste tele. Un i rakepen dran o bolepen penas: "Tu hal miro tchawo, kai me kamaua. Pral tute hom bachtelo." 23O Jesus nai his jaake triin-deesh bersha phuro, har job i menshenge o Debleskro lab penas. I menshe patsan, kai o Josef leskro dad hi. O Josefeskro dad his o Eli. 24Koleskre phure his jek pal o wawar: o Matat, o Levi, o Melki, o Jannai, o Josef, 25o Matatias, o Amos, o Nahum, o Hesli, o Naggai, 26o Mahat, o Matatias, o Simi, o Josech, o Joda, 27o Johanan, o Resa, o Serubabel, o Shealtiel, o Neri, 28o Melki, o Addi, o Kosam, o Elmadam, o Er, 29o Josua, o Elieser, o Jorim, o Matat, o Levi, 30o Simeon, o Juda, o Josef, o Jonam, o Eljakim, 31o Melea, o Menna, o Mattata, o Natan, o David, 32o Isai, o Obed, o Boas, o Salmon, o Nason, 33o Aminadab, o Admin, o Arni, o Esrom, o Perez, o Juda, 34o Jakob, o Isaak, o Abraham, o Terach, o Nahor, 35o Serug, o Regu, o Peleg, o Eber, o Shelach, 36o Kainan, o Arpachsad, o Sem, o Noa, o Lamech, 37o Metuselah, o Henoch, o Jered, o Mahalalel, o Kenan, 38o Enosh, o Set, o Adam. Kowa was o Deblestar.

will be added

X\