Luka 17

1Un o Jesus penas ap peskre malende: "Tchatchepaha, menshe wenna, kai kamenn tumen o Debleskro dromestar tele te anell. Bibacht ap koleste, kai kowa krella! 2Koleske wals feteder, te well leske i pharo bar trul i meen pandlo, un te well lo an o baro pani witsedo, te nai anell lo buder gar jekes kal tiknendar ap o tchilatcho drom. 3Denn jak ap tumende! Te krell tiro phraal tchilatcho koowa ap tute, pen leske, kai kowa gar mishto hi, hoi job kras! Te khaitell les ko tchilatcho koowa, hoi job ap tute kras, jaake ab buder gar chojedo ap leste! 4Te krell lo efta kope ap o diwes tchilatcho koowa ap tute, un te well lo efta kope pash tute un penella, kai les kowa khaitella, jaake ab buder gar chojedo ap leste!" 5Un kol deesh-te-dui bitchepangre penan ap o Jesuseste: "Kre maro patsepen soreles!" 6Koi penas o rai Jesus ap lende: "Te wals tumaro patsepen ninna tikno har i senftikro djob, nai penans tumer ap ko baro ruk: Witse tut an o pani! Un ko ruk shunals ap tumende." 7"Shunenn, hoi me tumenge penaua: Kek tumendar penella ap peskro budepaskro, kai pal peskri budi ap o kotar them khere wella: Am, besh tut kate tele, cha un pi! 8Ko krenn tumer gar. Tumer penenn leske: Rib tut trujal un kre mange chapaske! Aan ko chapen pash mande! Palle nai chah un pijeh tu ninna. 9Parkrenn tumen pash leste koleske, hoi job kras? Na-a, ko krenn tumer gar. 10Jaake hi kowa ninna tumentsa. Te kran tumer lauter, hoi o Dewel tumenge penas, palle penenn: Mer ham tire budepangre. Mer kram, hoi hunte kram." 11Har o Jesus ap o drom an o foro Jerusalem his, djas lo mank i themma Samaria un Galilea. 12Un job djas an i gab. Un kote wan deesh nassele mursha pash leste. Kolen his i djungelo nasslepen, kai lengro mass tele merella. Jon his lestar doha dur krik tardo, 13un dan gole: "Jesus, latcho rai, kre tiro dji menge pre!" 14Un o Jesus dikas len, un penas ap lende: "Djan pash o rashajeste, un sikrenn tumen glan leste!" Un har jon djan, wan jon ap o drom sasto. 15Jek lendar, har job dikas, te hi lo sasto, djas lo pash o Jesuseste pale pale, un sharas o Debles o tselo djijeha. 16Job witsras pes glan o Jesuseskre pire tele, un parkras pes. Kowa his i Samaritari. 17Koi penas o Jesus: "Deesh wan sasto. Kai hi kol wawar enja? 18Hi kek wawar koi, kai was pale pale, te sharell lo o Debles har kau Samaritari?" 19Un job penas ap ko mursheste: "Ste pre, un dja khere! Tiro patsepen kras tut sasto." 20Un i Farisarja putchan o Jesusestar: "Kaana well ko tsiro, kai dikah, kai o Dewel o rai hi pral i tseli phub?" Koi penas lo: "Ko tsiro well gar jaake, te nai dikenn kowa. 21Ninna nai penell jek gar: Kanna hi ko tsiro kai." Un o Jesus penas dureder: "Kote, kai i mensho kamella, te well o Dewel leskro rai, kote was ko tsiro." 22Un job penas ap peskre malende: "I tsiro wella, kai tumaro dji kamell o Menshengro Tchawes jek diwes te dikell. Un tumer dikenn les gar. 23Un jon penenn ap tumende: Dikenn, kote hi lo! Dikenn, kate hi lo! Me penau tumenge: Djan gar kote! Patsenn gar, hoi kol menshe penenna! 24Jaake har i Debleskri jag ap o bolepen diklo hi, hoi djal jek rigatar ap i wawar rig an o bolepen, jaake well o Menshengro Tchawo ap peskro diwes diklo. 25Glan ko tsiro hunte lell lo bud duka ap peste. Un i menshe, kai kau diwes djiwenna, tchiwenn les ap i rig. 26Ap ko tsiro, kai o Menshengro Tchawo pale wella, djiwenn i menshe jaake har an ko tsiro, kai o Noa djiwas. 27Kol menshe chan, pijan, un romedineran, bis ap ko diwes, kai o Noa an o panjeskro kheer djas, un o baro pani was, un lauter tassan le. 28Ko tsiro, kai o Menshengro Tchawo pale wella, hi ninna har ko tsiro, kai o Lot djiwas. Jon chan, pijan, jon ginan, bikran, jon budran ap pengro kotar phub, un kran penge khera. 29Ap ko diwes, kai o Lot dran o foro Sodom djas, was jag dran o bolepen, un lauter wan chatchedo. 30Jaake djal kowa ninna ap ko diwes, kai o Menshengro Tchawo diklo wella. 31Koon ap ko diwes ap o kheer hi, un kones peskro koowa an o kheer hi, kowa hunte djal gar tele, te lell lo peskro koowa. Un koon ap peskro kotar phub budrella, hunte djal gar buder khere. 32Ma bistrenn o Loteskri romjat! 33Koon kamell peskro djipen te rikrell, kowa nashrell les. Koon peskro djipen nashrella, kowa lell les pale. 34Me penau tumenge: Te hi an koi rati dui menshe an o tchiben tchiddo, well ko jek krik lino, ko wawar atchell koi. 35Dui djuwja krenn dran djob jarro. Koi jek well krik lino, koi wawar atchell koi. 36Dui budrenn ap i kotar phub. Ko jek well krik lino, ko wawar atchell koi." 37Leskre mala putchan lestar: "Rai, kai well kowa?" Penas lo: "Kote, kai i mulo mass tchiddo hi, kote wenn i bare diwje tchirkle khetne te chan le."

will be added

X\