Luka 1

1Latcho Theofilo, bud menshe tchinan an i liil, hoi o Dewel mashkral mende kras. 2Jon tchinan pre, hoi kolla penan, kai kote pashal his un kowa lauter dikan. 3Un me ninna putchom i menshendar har kowa lauter his, te djinap kowa lauter mishto. Doleske kamau tuke kowa jaake pre te tchinell, har kowa tchatchepaha his. 4Jaake haiweh tu, kai lauter tchatcho hi, hoi penan le tuke. 5Ap kau tsiro, kai o Herodes o baro rai pral o them Judea his, djiwas i rashai. Kowa his jek kol rashajendar, kai kharan pen pal o rashai Abia. Leskro lab his Zachari. Un leskri romni kharas Elisabet. Joi hi o Aroneskre menshendar 6O Zachari un i Elisabet his latcho an o Debleskre jaka. Un jon shunan ap o Debleste, un kran lauter, hoi an o Debleskro lab tchindlo his. 7Len his kek tchawe. Joi nai las kek. Un jon dui his phuro. 8- 9His i tsiro, kai budran kol rashaja an o Debleskro baro kheer, kolendar o Zachari jek his. Un har pash lende jaake hi, rodan le les win, te djal lo an o Debleskro baro kheer, te chatchrell lo kasht o Debleske, hoi shukar sungella. 10Un ap ko tsiro, har chatchras job ko kasht, hoi shukar sungella, his bud menshe win tardo, un mangan o Debles an. 11Ap jek kopo his o Debleskro bolepaskro tardo ap i tchatchi rig pash o Debleskro sonakaskro bob, kai o Zachari o kasht chatchas. 12Har o Zachari les dikas, las lo traash lestar. 13Koi penas o bolepaskro ap leste: "Ma traash, Zachari! O Dewel shunas tut, har tu mangas lestar, te well tumen i tarnepen. Tiri romni Elisabet lella i mursh tchawes. Un koles dess tu ko lab Johanni. 14Un tiro dji stella i bachtjatar. Un bud menshe wenna bachteles pral ko tarnepen. 15Un job well bares glan o Debleskre jaka. Mool un wawar sorelo pipen pijell job gar. Un har job gomme gar boldo hi, hi lo pherdo Debleskro Ducho. 16Un job anell bud menshen an Israel pash o Debleste. 17Un job hi pherdo Debleskri soor jaake har o Elija, un job krell i drom pre o Debleske. Un job krella, te lenn i dada pale i dji pengre tchawenge. Un kolla, kai shunan gar ap o Debleste, kolen anell job pale ap o tchatcho drom. Un jaake krell lo, te hi i menshen djia, kai pre hi lengro Debleske." 18O Zachari penas ap o bolepaskro: "Har nai djinau me, kai tiro tchatcho hi? Me hom i phuro mursh. Un miri romni hi ninna phuro." 19O bolepaskro penas ap leste: "Me hom o Gabriel, un me hom glan o Debleste tardo. O Dewel bitchras man pash tute, te penap tuke kowa. 20"Ap o tchatcho tsiro well kowa jaake, har tuke penom. Tu patsal mire laba gar, un doleske lell o Dewel tiro rakepen jaake raha krik, bis te well ko diwes, kai kowa lauter wella." 21Un i menshe dikan ap o wudar an o Debleskro baro kheer, un djinan gar, hoske o Zachari jaake raha an o Debleskro baro kheer atchella. 22Un har job kote win was, nai rakras lo buder gar. Job hadas peskro wast, te sikrell lo lende, te nai rakrell job buder gar. Koi pre dikan i menshe, kai o Dewel rakras leha an o Debleskro baro kheer. 23Un har kol diwessa trujal djan, kai job an o Debleskro kheer budras, djas lo khere. 24Un palle was leskri romni Elisabet an wawar koowa, un khatras pes pantch tchon glan i menshengre jaka. Un joi penas: 25"O Dewel dikas latches ap mande un kras, te well man i tarnepen ap ko tsiro, har job kamas, un las miri ladj mandar krik." 26- 27Ap ko tsiro har i Elisabet o shobto tchon an wawar koowa his, bitchras o Dewel o bolepaskres, o Gabrieles, pash i tarni tchate. Lakro lab his Maria. Joi djiwas an o foro Nazaret. Kowa hi i foro an o them Galilea. Un kolakro pirno kharas Josef. O Josef his o Davideskre menshendar. 28Un o Gabriel was pash late an o kheer un penas: "Latcho diwes, Maria! O Dewel hi tuha! Job dikas latches ap tute." 29Joi tapras i daar, har job jaake rakras, un penas peske: "Hoi penell job koi?" 30Un o bolepaskro penas ap late: "Ma traash, Maria! O Dewel hi tuke latcho. 31Shun, tu weh an wawar koowa, un leh i tchawes. Koles dess tu o lab Jesus. 32Kowa well i baro rai. Job well kharedo Debleskro tchawo. Un o Dewel krell lestar i baro rai pral Israel, jaake har jek leskre phurendar, o David, o baro rai his. 33Un job atchell baro rai pral o Jakobeskre menshende hako tsiro. Un les hi penepaske pral lauter un hakeneste. Kowa atchell jaake hako tsireske." 34Koi penas i Maria ap o bolepaskro: "Har djal kowa? Man hi kek mursh." 35O bolepaskro penas ap late: "O Debleskro Ducho un leskri soor well pral tute. Doleske well o tarnepen o Deblestar un well Debleskro tchawo kharedo. 36Shun, i Elisabet, kai tire menshendar hi, hi an wawar koowa an o shobto tchon. Joi hi phuri un latar well penlo, kai lell li nai kek tchawe. 37O Dewel nai krell halauter." 38Koi penas i Maria: "Me kamau o Debleske koi te well. Lauter te well jaake, har tu penal." Koi djas job peske. 39Pal i tikno tsiro djas i Maria jaake sik har djala an i foro an o pralstuno them Judea. 40Un joi djas an o Zachareskro kheer, un penas: "Latcho diwes, Elisabet!" 41Har i Elisabet kowa shunas, stas o tarnepen an late. Un i Elisabet was pherdo Debleskro Ducho, 42un das bares gole: "Sharedi weh tu mashkral i tsele djuwjende, un sharedo well o tarnepen an tute! 43Har djal kowa, te well koi dai miro rajestar pash mande? 44Har me tut shunom, stas o tarnepen i bachtjatar an mande. 45Bachteli hal tu! Tu patsal, te well kowa jaake, hoi o Dewel tuke penas." 46Un i Maria penas: "Me sharau mo Debles. 47Un miro dji dell gole i bachtjatar pral mo Debleste. Job hi ap miri rig. 48Me hom gar moldo, te dikas o Dewel jaake latches ap mande. Un kanna sharenn man i tsele menshe. Un lengre tchawe penenna mandar, kai o Dewel man bachteles kras. 49Baro koowa kras job ap mande. Les hi i tseli soor, un leskro lab hi bareder har hako wawar lab. 50Job kras peskro dji pre kol phurenge un kolengre tchawenge, lauterenge, kai shunenn ap leste, un darenn lestar. 51Un job hadas peskri soreli mussi, un tradas kolen krik, kai kran pen kokres bares. 52Job las i soor i bare rajendar krik, te well len buder tchi penepaske, un hadas i tiknen, te wenn le baro. 53Kolen, kai bok his, das job te chal. Un kol brawelen bitchras lo krik. Un jon nai lan tchi peha. 54Un job bistras gar peskro budepaskres, o Israel, un kras peskro dji leske pre, 55jaake har penas lo mare phurenge, o Abrahameske un leskre tchawenge, te well lo lenge latcho hako tsireske." 56I Maria atchas triin tchon pash i Elisabet. Un palle djas li khere. 57Un ko tsiro was, kai las i Elisabet i tarnepen. Un kowa his i tchawo. 58Lakre menshe un kolla, kai djiwan trul late, shunan kowa, un wan bachteles laha pral ko baro latchepen, hoi o Dewel kras ap late. 59Pal ochta diwessa wan le, te tchinenn le o tarnepas ap o mass. Un jon kaman les ko lab Zachari te dell, jaake har leskro dad kharella. 60Leskri dai penas: "Na-a! Job hunte lell ko lab Johanni." 61Penan le ap late: "Kek tire menshendar kharell jaake." 62Un jon sikran i wastentsa ap leskro dad, te penell kowa, har ko tarnepen hunte kharella. 63Un job kamas, te anenn le leske tchomone, kai nai tchinas job pre. Un job tchinas: "Job kharell Johanni." Koi kran lauter bare jaka. 64Ap jek kopo nai rakras o Zachari pale, un sharas o Debles. 65Un i traash was ap lauterende, kai trul lende djiwan. Un i tsele menshe, hoi an o pralstuno them Judea djiwan, rakran pral kowa. 66Un lauterenge djas kowa an o dji, kai kowa shunan. Un jon penan: "Hoi well dran kau tarnepen?" Un lauter patsan, kai o Debleskri soor ap o tchaweste tchiddo hi. 67Un leskro dad Zachari was pherdo Debleskro Ducho, un penas kol laba, hoi o Dewel an leste tchiwas: 68"Sharas o baro Debles! Job hi o Israeleskro Dewel! Job was pash mende, un las men dran mari bibacht win. 69Job bitchras menge jek soreles, te lell job men dran o tchilatchepen win. Un kawa wella o Davideskre menshendar. 70Glan i raha tsiro penan i Debleskre rakepangre, 71te lell men o Dewel dran i wasta kolendar win, kai kamenn men te marell, awa, te lell lo men dran i wasta kolendar win, kai men gar kamenna. 72Les his i baro dji mare phurenge un bistras gar kowa, hoi job lentsa an o phuro tsiro win kras un peskro wast pre das. 73Glan maro dadeste, o Abrahameste, das job pes sowel, 74te lell lo men dran i tchilatche wasta win, te budrah nai leske, un trashah buder gar, 75jaake te djiwas mer leske i djudjo un latcho djijeha jaake raha, har djiwah. 76Un tu miro tchawo, tu weh ninna i Debleskro rakepaskro. Un tu djah glan o Debleste, un kreh leske i drom pre, te well lo nai pash i menshende. 77Leskre menshende sikreh tu, har nai well lengri doosh krik lino, jaake te djan le gar nashedo. 78Maro Debles hi i baro dji menge. Leskro kamlepen well pash mende. Kowa hi har o kham, hoi djal pre ap o bolepen, 79un well diklo kolendar, kai hi len traash o merepastar. Kai bari momeli anell men ap o drom, kai wella o Debleskri bacht ap mende." 80O Johanni was baro, un haiwas hako diwes feteder, hoi o Dewel kamella. Un job djiwas an o mulo them jaake raha, bis te was ko diwes, kai job glan i menshende an Israel rakras.

will be added

X\