Hebrearja 7

1O Melchisedek his o baro rai pral o foro Salem, ninna o baro rashai o baro Deblestar. An ko tsiro djas o Abraham an o kurepen, un maras i bare rajen pengre lurdentsa. Har job pale was, djas o Melchisedek pash leste, un rakras o Debleskri bacht pral leste win. 2Un o Abraham das les o deshto kotar lauterestar, hoi las job an o kurepen. Ko lab Melchisedek kharella Tchatcho Rai, un job his ninna o rai pral o foro Salem. O lab Salem kharella Bacht. 3An o Debleskro lab hi tchi tchindlo pral leskro dadeste un leskri date. Tchi hi koi tchindlo pral leskre phurende, witar gar pral ko diwes, kai job boldo was, un kai job meras. Jaake atchell lo o baro rashai hako tsireske, har o Debleskro tchawo. 4Kowa sikrell tumen, har baro o Melchisedek his! Koles das maro kamlo dad, o Abraham, o deshto kotar lauterestar, hoi las job an o kurepen. 5Ninna an o them Israel lan i rashaja o deshto kotar lauterestar, hoi i Israelitarja penge khetne anan. Jaake his tchindlo an o Moseskre lila. Kol rashaja, - lengro dad his o Levi, - lan o deshto kotar kolendar, kai lengre phrala his. Kolla lauter wan pal o Abraham. 6Koleste das o Dewel peskro lab, te krell lo les baro, un te dell lo les bud bacht. Ninna te hi o Abraham jaake baro, hi o Melchisedek bareder har job. Job las o deshto kotar o Abrahamestar un rakras o Debleskri bacht pral leste win, ninna te his lo gar leskre menshendar. 7Un hakeno djinella: O bareder rakrell i bacht win pral o tikneder. 8I rashaja an o them Israel, kolende i menshe pengro deshto kotar denna, kolla hi menshe, kai hunte merenna. O Melchisedek, kolestar hi penlo, te djiwell lo. 9I rashaja an o them Israel wenna pal o Levi. Kolla lenn o deshto kotar, hoi pengre phrala khetne anan. Un o Levi was pal o Abraham. Jaake nai penah: Har das o Abraham o deshto kotar, das kowa ninna leskro tchaweskro tchawo, o Levi, 10ninna te his o Levi gomme gar boldo, har o Melchisedek pash o Abrahameste djas. 11Mer djinah, har das o Dewel peskre menshende o Moseskre lila, koi penas job ap o Levideskre tchawe, te wenn le rashaja. Ninna te kran jon pengri budi jaake, har lengro dad, o rashai Aron, nai tchiwan le i menshen gar an o tchatchepen glan o Debleste. Doleske rodas o Dewel i wawar rashajes win, jek, kai krell peskri budi jaake har o Melchisedek, un buder gar jaake har o Aron. 12Mer djinah: Te lell o Dewel peske i wawar rashai, kai gar o Levideskre tchawendar hi, palle sikrell o Dewel ninna i wawar drom, kai wenn nai i menshe pash leste. 13- 14Maro baro rashai, kolestar kate rakedo wella hi o Jesus Kristo. Job well gar o Levideskre menshendar. Mer lauter djinah, leskre menshe wenna pal o Juda. Un kek kolendar his i rashai. Lenge penas o Mose gar, te wenn le rashaja. 15- 16Mer haiwah mishto, ko wawar rashai, kai hi jaake har o Melchisedek, koles his kek dad, koon ninna rashai his. Na-a. Les hi o Debleskro djipen, kai hako tsiro atchella. Doleske was lo maro rashai. 17O Dewel penell pral leste: Tu hal i rashai hako tsireske har o Melchisedek. 18Jaake tchiwas lo kol phure laba, hoi o Mose i menshenge penas, ap i rig. An kol laba his kek soor. Un jon his tchi moldo. 19O Moseskre laba nai kran i menshen gar tchatcho glan o Debleste. Doleske sikras men o Dewel i newo un feteder drom, kai anell men pash leste. 20- 21Job tchiwas o Jesuses an leskri budi un penas: Tu hal i baro rashai hako tsireske, un job das peskro wast koi pre. Un kal laba nai khaitenn les kek tsireske. Har job o Levideskre tchawen lengri budi das, te wenn le rashaja, das job gar peskri wast koi pre. 22Jaake was o Jesus kowa, kai nai anell men tchatchepaha pash o Debleste. Kowa nai kras o Mose gar. 23An ko tselo tsiro his bud rashaja. Kolla lauter hunte meran. Har jek meras, was pale i wawar. 24O Jesus atchell o rashai hako tsireske. Job merella gar, un kek wawar well pal leste. 25Doleske nai krell lo, te djal kek kolendar nashedo, koon job pash o Debleste anas. Job djiwell hako tsireske, un mangell o Debles lenge. 26O Jesus hi o baro rashai, kai hunte well men. Job hi latcho glan o Debleskre jaka. Kek tchilatchepen, witar kek doosh hi ap leste. Na-a, job hi gar jaake har mer tchilatche menshe ham, kai ham pale-tchiddo glan o Debleste. Un o Dewel kras les bareder har hako wawar an o bolepen. 27Job hi gar har kol wawar bare rashaja, un hunte anell gar hako diwes i maredo fiches o Debleske, te well peskri doosh krik lino. Ninna hunte anell lo gar i wawar menshenge marede fichen o Debleske, te well lengri doosh krik lino. Na-a, job kokres das peskro djipen an o merepen jek kopo hako tsireske. 28Kol wawar bare rashaja hi menshe un gar sorelo, un nai krenn gar mishto kowa, hoi o Dewel lendar kamella. Jon wan rashaja jaake, har o Mose an peskre lila tchinas. Bud tsiro palla, das o Dewel peskro lab, un das peskro wast koi pre, te well leskro tchawo i baro rashai hako tsireske. Job krell lauter mishto, hoi o Dewel lestar kamella.

will be added

X\