Hebrearja 6

1Kanna kamah te rakras pral kowa, hoi kolenge hi, kai hi phure an o patsepen, un buder gar pral kowa, hoi mer kolenge penah, kai hi tarno an o patsepen. Mer kamah buder gar pral kowa te rakrell, hoi tumer shunan, har patslo wan! Ap ko tsiro was tumenge penlo, te mukenn tumaro tchilatcho drom, hoi an o merepen anella, un te patsenn ap o Debleste, un te djan ap leskro drom. 2Ninna was tumenge penlo, te mukenn tumen an o pani te thowell, te sikrenn tumer, kai mukan tumaro phuro djipen. Ninna was tumenge penlo, hoske i patslo peskre wasta ap i wawareste tchiwella. Tumenge was ninna penlo, te krell o Dewel i mulen djido, un te rakrell lo o tchatchepen pral lende win. Kowa, hoi job len dell, - o djipen har i phagi, - kowa atchell hako tsiro ap lende. 3Djas kanna dureder! Kowa kamell o Dewel mendar! 4- 6Hi menshe koi, kolenge kras o Dewel lengre djia pre, te haiwan le leskro bolepaskro latchepen. Un o Debleskro Ducho budras an lengre djia. Un jon haiwan o Debleskro latcho lab un leskri soor an lengro djipen. Kolla te perenn o Debleskro dromestar tele, nai anell len kek pale ap o Debleskro drom. Kowa, hoi jon krenna hi jaake, har te denn le penge o Jesus Kristes pale ap o trushel. Un kol wawar san pral leste. 7Mer menshe ham har i phub, ap late bud kope o brishin das. O Dewel dikell latches ap koleste, kai hi har koi phub, hoi lell o brishin an peste dre, un anell latcho koowa win kolenge, kai budrenn koi. 8Job dikell gar latches ap koleste, te hi lo har koi wawar phub, hoi anell subjengre burra, un wawar djungele burra win. Koi phub hi tchi moldo, un pal i tsiro well li chatchedo. 9Kamle mala, ninna te rakrah jaake, patsah soreles, te han tumer ap i feteder drom. Ko drom anell tumen pash o Debleste. 10O Dewel hi latcho un tchatcho, un bistrell gar tumaro kamlepen ap leste, har budran i patslenge, un krenn kowa gomme kanna dureder. 11Mer kamah o djijestar, te tchiwell hakeno tumendar peskro dji ap ko shukar djipen, hoi kamell o Dewel les te dell an o bolepen. 12Ma awenn khino, te krenn o Debleskri budi! Awenn jaake har kolla, kai atchan soreles an o patsepen, un lan kowa, hoi o Dewel lenge penas. 13- 16Te dell i mensho peskro lab, dell lo peskro dadeskro wast koi pre. Leskro dad hi bareder har job. Jaake sikrell lo o wawares, te krell lo tchatchepaha kowa, hoi job penas. Un ko wawar patsell les. Har das o Dewel o Abrahameste peskro lab, das lo peskro wast koi pre. His kek, kai his bareder har o Dewel. Un o Dewel penas: Tchatchepaha, bud bacht mukau pral tute te well, un tutar wenna bud bud tchawe. Un o Abraham patsas o Debles, un witsras gar peskro patsepen ap i rig. Un jaake las lo kowa, hoi o Dewel leske penas. 17Har das o Dewel peskre menshen peskro lab, das lo ninna peskro wast koi pre. Jaake sikras lo len, te dell lo len tchatchepaha kowa, hoi job lenge penas. 18Ko lab, hoi das o Dewel un das peskro wast pre, nai well an kek tsiro krik lino. O Dewel chochella gar. Un mer, kai wam pash leste, te lell lo men dran o tchilatchepen win, men hi kanna leskro sorelo lab, te dell lo men o djipen, hoi gar pre-herella, jaake har job penas. 19- 20Kau patsepen rikrell maro djipen, jaake har rikrell i sorelo saster i panjeskro ulepaskro, te djal lo gar ap o pani nashedo. Un kowa, ap koleste patsah un dikah, kowa hi o Jesus. Job djas glan mende pash o Debleste an o bolepen, jaake har djas o baro rashai an o phuro tsiro an o Debleskro kheer. Un jaake was o Jesus hako tsireske sawo baro rashai, har glan i raha tsiro o Melchisedek his.

will be added

X\