Galatarja 2

1- 2Pal deesh-te-star bersha djom me pale an o foro Jerusalem. O Dewel sikras mande, te djap koi. O Barnabas djas mantsa. Un o Tito his ninna pash mande. An o foro Jerusalem djom pash i pralstunende mank i patslende, un penom lenge, har sikrau me o Debleskro drom kol menshende, kai kek bibolde hi. Me kamom te djinell, te hi kowa lenge mishto, hoi me penau, te well koi budi, hoi me krau un krom, gar tchitcheske. 3O Tito, kai kek biboldo hi, his pash mande. Un kol patslengre pralstune penan gar, kai hunte well job ap o mass tchindlo. 4His wawar mursha koi. Jon kran, har te wans le patsle. Jon kaman te dikell, har kol patsle djiwenna, kai buder gar ap o Moseskre laba pandlo hi. Mer, kai ham buder gar pandlo ap kol laba, djiwah kanna pal o Jesuseskre laba. Un kol mursha, kai djiwenn gar pal o Jesuseskre laba, kaman, te was mer pale pandlo ap o Moseskre laba. 5Mer kram kowa gar, hoi jon kaman. Mer kamam, te djinenn tumer soreles: O Jesuseskro drom, hoi mer tumende sikram, kowa hi o tchatcho drom. 6Kol phrala, kai hi pralstune mank i patslende, kolla penan gar, kai kowa, hoi me i menshenge penau, gar tchatcho hi. Te rakrau kol pralstunendar, hi mange jek, hoi jon his. O Dewel dikell gar ap kowa, har i mensho an-diklo hi. 7Jon haiwan, kai mange o Jesus penas, te djap pash kolende, kai kek bibolde hi, te sikrap lende leskro drom, jaake har o Petro o Jesuseskro drom i biboldende sikrella. 8Kowa, kai bitchras o Petres pash i biboldende, hi kowa, kai man bitchras pash kolende, kai kek bibolde hi. 9Kol pralstune mank i patslende his o Jakobo, un o Kefas, un o Johanni. Har jon haiwan, kai o Dewel mange latcho hi un man koi budi das, dan jon man un o Barnabes o tchatcho wast, te dikenn halauter, kai ham mer phrala. Mer kram win, te djas mer pash kolende, kai kek bibolde hi, un jon te djan pash i biboldende. 10Hi jek koowa, hoi jon mendar mangan, te bistras mer gar i tchorwelen mank lende. Ap kowa rikrom man i tselo djijeha. 11- 12An ko tsiro, har o Kefas an o foro Antiochia his, chas job kol patslentsa, kai kek bibolde hi. Koi wan patsle bibolde koi pashal dran o Jakobeskri kangri. Kolla rikran pen ap o Moseskre laba un chan gar kolentsa, kai kek bibolde hi. Un o Kefas trashas lendar, un tsardas pes pale, un kamas buder gar kol patslentsa khetne te well, kai kek bibolde hi. Koi penom me leske an o mui, kai kowa gar mishto hi, hoi job kras. 13Jaake har o Kefas dui tchipjentsa rakras, kran ninna kol wawar patsle bibolde. Har o Barnabas len dikas, kras job ninna jaake har jon, un tsardas pes kol patslendar pale, kai kek bibolde hi, te well lo an-diklo pash i biboldende. 14Har me dikom, kai jon gar ap o tchatcho drom djan, jaake har o Jesus les mende sikras, koi penom me ap o Kefaseste glan hakeneste: Ninna te hal i biboldo, djiweh tu gar har i biboldo. Hoske kameh i sorjaha, te djiwenn kol patsle, kai kek bibolde hi, har i bibolde? 15- 16Mer ham bibolde. Jaake wam mer boldo. Un ham gar kolendar, kai kek bibolde hi un gar ap o Debleskro drom djana. Ninna te ham gar kolendar, djinah, kai kek mensho tchatcho wella glan o Debleste, te djiwell lo pal o Moseskre laba. Na-a, o Dewel krell koles tchatcho glan peste, koon patsell ap o Jesus Kristeste. Doleske patsah mer o tselo djijestar ap o Jesus Kristeste, te was tchatcho glan o Debleste. 17Mer ninna, kai ham bibolde, kamah, te krell men o Dewel tchatcho glan peste. Kol labentsa penah mer, kai ham pale-tchidde un tchilatche glan o Debleste, jaake har i tsele wawar menshe ap i phub. Penau kanna, kai o Jesus Kristo men ap o tchilatcho drom anas? Na-a! 18Me woms tchatchepaha ap o tchilatcho drom tardo, te penoms kanna, te rikras men pale ap o Moseskre laba, kai me glan i tsiro penom, te hunte rikras men gar ap kol laba. 19Har krom gar, hoi o Moseskre laba penenna, penan kol laba mange: Tu hunte meress. Jaake hom lenge mulo un nai djiwau kanna o Debleske. Me merom o Jesuseha ap o trushel. 20Kowa hom gar me, kai djiwau kanna. Hi o Jesus Kristo, kai djiwell an mande. Un ko djipen, hoi kanna djiwau, djiwau me an o patsepen ap o Debleskro tchaweste. Job kamas te djiwap, un das peskro djipen mange an o merepen. 21Jaake tchiwrau o Debleskro latchepen gar ap i rig. Te djiwoms me pal o Moseskre laba, un kolla krans mange tchatcho glan o Debleste, meras o Jesus Kristo tchitcheske.

will be added

X\