Jesuseskre bitchepangre 8

1His mishto an o Sauleskre jaka, te maran le les. Pal ko diwes lan le i patslen soreles palla an o foro Jerusalem. Un i patsle nashan an o them Judea un an o them Samaria. I Jesuseskre bitchepangre atchan an o foro Jerusalem. 2Un mursha, hoi ap o Debleskro drom djan, paskran o Stefanes un rowan bud pral leskro merepen. 3O Saulo kras lauter, te nai marell lo i tsele patslen. Job djas an i khera, las len koi win, murshen har djuwjen, un witsras len an o stilepen. 4Kol patsle, kai ap o nashepen his, djan trujal un penan o latcho lab o Jesus Kristestar. 5O Filipo djas an ko foro Samaria un rakras kote o Jesus Kristestar. 6Kol menshe dan jak ap kowa, hoi o Filipo penas un kras an o Debleskri soor. 7Bud menshendar tradas lo bengen wi. Kolla dan soreles gole, har jon lendar win djan. Un bud menshe, kai his bango un nai djan gar, wan sasto. 8Un hakeno an kau foro his bachtelo pral kowa, hoi koi djas. 9An ko foro Samaria his ninna i mursh, kowa his i durkepaskro. Leskro lab his Simon. Job penas pestar, te hi lo i baro mursh. Un i menshe an ko foro kran bare jaka pral kowa, hoi job kras. 10Un halauter shunan ap leste, un penan: "Ap ko mursheste hi o Debleskri bari soor." 11Peskro durkepaha tsardas lo len lauter ap peste. Doleske rikran jon bud lestar. 12Har kanna o Filipo lenge o Jesus Kristestar penas, koles o Dewel bitchras, te anell lo len pash o Debleste, patsan djuwja un mursha ap kowa, hoi o Filipo lenge penas. Un jon mukan pen lestar an o pani te thowell, te sikrenn le, te patsenn le ap o Jesuseste. 13Koi was ninna o Simon patslo, un mukas pes lestar an o pani te thowell. Palle atchas lo pash leste. Un har o Simon ko baro un sorelo koowa dikas, hoi o Filipo an o Debleskri soor kras, atchas leske o rakepen krik. 14Un kol Jesuseskre bitchepangre an o foro Jerusalem shunan, kai kol menshe an o them Samaria patslo wan. Un jon bitchran o Petres un o Johannes pash lende. 15Kolla wan an o them Samaria, un mangan o Deblestar, te dell lo i patslende o Debleskro Ducho. 16Kol patsle his kokres ap ko lab Jesus an o pani thodo. O Debleskro Ducho peras gomme gar ap lende. 17Koi tchiwan o Petro un o Johanni i wasta ap lende, un o Debleskro Ducho peras ap lende. 18Har o Simon dikas, kai o Debleskro Ducho ap lende was, har o Jesuseskre bitchepangre i wasta ap lende tchiwan, kamas job len lowe te dell, 19un penas ap lende: "Denn man ninna koi soor, te lell hakeno, koneske me o wast pre tchiwau, o Debleskro Ducho!" 20O Petro penas ap leste: "Dja pash o bengeste, tu un tire lowe! Tu patseh tchatchepaha, te nai gineh tu i lowentsa o Debleskri soor! 21Kau koowa, hoi mer krah, hi o Debleskro koowa un gar tiro koowa. Tiro dji hi gar tchatcho glan o Debleste. 22Kanna, muk tiro tchilatcho drom, un pen o Debleske, te khaitell tut ko tchilatcho koowa, hoi tu kral. Un mange lestar, te lell lo koi doosh tutar! 23Me dikau, kai hal pherdo tchilatcho koowa, un ko tchilatchepen hi o rai pral tute." 24Koi penas o Simon ap lende: "Mangenn o Deblestar, te well kowa gar pral mande, hoi tumer penan!" 25Har o Petro un o Johanni i menshenge penan, hoi o Jesus penas un kras, djan jon pale an o foro Jerusalem. Ap lengro drom pale wan le an bud gaba an ko them Samaria un sikran kote i menshende o Jesuseskro drom. 26O Debleskro bolepaskro penas ap o Filipo: "Ste pre un dja ap ko drom, kai djal dran Jerusalem tele an ko foro Gaza. Ap ko drom hi gar bud menshe." 27Koi stas lo pre un djas kote. Ap ko drom his ninna i mursh dran o them Etiopia. Ap kau tsiro his i bari rani i rajetsa pral o them Etiopia. Un ko mursh his i pralstuno an lakro them un das garda ap lakro tselo brawlepen. Kowa was an o foro Jerusalem, te mangell job o Debles an. 28Har job pale ap o drom his, te djal lo khere, his job an peskro wurdin beshdo, un draweras ko liil, kai o Debleskro rakepaskro Jesaja tchinas. 29Koi penas o Debleskro Ducho ap o Filipeste: "Dja pash ko wurdin un atch koi pashal!" 30Un o Filipo nashas koi, un shunas, har kowa ko liil draweras, hoi o Debleskro rakepaskro Jesaja tchinas. Un o Filipo putchas lestar: "Haiweh tu, hoi tu drawereh?" 31"Na-a," penas lo, "har nai haiwap, te penell mange kek, hoi koi tchindlo hi?" Un job mangas o Filipes, te well job pash leste an o wurdin, te beshell lo pes pash leste. 32Kol laba, hoi job draweras, his kolla: Job his har i bakro, kai djal kote, kai well lo maredo. Job kras peskro mui gar pre har i tarno bakro, koleske tchinenn le i balla tele. 33Jon kran leha, har te wals lo tchi moldo un rakran gar o tchatchepen, har anan le les glan i tchatchepangre. Kek nai rakrell leskre tchawendar. Leskro djipen was kai phubjatar krik lino. 34Har ko pralstuno kowa draweras, putchas lo o Filipestar: "Konestar rakrell o Debleskro rakepaskro? Rakrell job pestar? Rakrell job i wawarestar?" 35Koi penas o Filipo leske, hoi kol laba kamenn te penell, un penas leske o latcho lab o Jesusestar. 36Koi wan le pash o pani, un ko pralstuno penas: "Koi hi pani. Hi mange tchomone an o drom tchiddo, te mukap man tutar an o pani te thowell?" 37"Te patseh tu o tselo djijestar ap o Jesus Kristeste, nai krau me kowa," penas o Filipo. Penas ko pralstuno: "Me patsau, kai hi o Jesus Kristo o Debleskro tchawo." 38Un job penas, te atchell ko wurdin tardo. Un kol dui, o Filipo un o pralstuno, djan khetne an o pani, un o Filipo thowas les an o pani. 39Har jon dran o pani win djan, las o Debleskro Ducho o Filipes ap jek kopo kote krik. Un ko pralstuno dikas les buder gar. Un job djas bachteles peskro drom dureder. 40O Filipes hatsan le an o foro Ashdod. Un job djas trujal, un penas o latcho lab o Jesusestar an kol tsele forja. Un jaake was lo an o foro Cesarea.

will be added

X\