Jesuseskre bitchepangre 7

1Koi putchas ko baro rashai lestar: "Hi kowa tchatcho, hoi kolla penan?" 2Koi penas o Stefano: "Tumer phrala un dada, shunenn! Maro baro un railo Dewel mukas pes maro dadestar Abraham te dikell an o them Mesopotamia. Ap ko tsiro djiwas o Abraham gomme gar an o foro Haran. 3Un o Dewel penas ap leste: Dja dran tiro them! Muk tire menshen, un dja an ko them, hoi me tuke sikrau! 4Koi djas o Abraham dran ko them Kaldea, un djiwas an o foro Haran. Un har leskro dad meras, anas o Dewel les an ko them, kai tumer kanna djiwenna. 5O Dewel das les kek kotar phub an kau them, witar gar i tikno kotar. Un o Dewel das les peskro lab, te dell lo leskre tchawende i them. An ko tsiro his o Abrahames kek tchawo. 6O Dewel penas ap leste: Tire tchawe, kai pal tute wenna, hi wi-themarja an i them, kai gar lengro hi. Star-sheel bersha hunte budrenn le i wawarenge tel duka un bare dawa. 7Un kolla, kai len dan un dukran, kolen dau me i phagi. Un pal kowa djan le dran ko them win, un mangenn man kate an kau them an. 8Un o Dewel das o Abrahameste peskro lab, te hi lo leskro Dewel un o Dewel lauterenge, kai pal leste wenna. Un job penas o Abrahameske, te mukell job pes ap peskro mass te tchinell. Ninna i tsele mursh tchawe, kai pal leste wenna, hunte wan tchindlo ap pengro mass. Un o Abraham las i tchawes, o Isaak. Un o Abraham tchinas les ap o mass, har job efta diwessa phuro his. Un o Isaak tchinas o Jakobes, un o Jakob peskre deesh-te-dui tchawen. Kolla hi mare phure dada, kolendar mer wam. 9Mare phure dada silweran ap o Josefeste, un bikran les an o them Egiptia. Un o Dewel his pash leste, 10un las les win dran halauter, hoi o Josefeske pharo his. Un o Dewel das les bud goswepen un kras, te dikas o baro rai pral o them Egiptia latcho ap o Josefeste. Ko baro rai kras, te was o Josef o rai pral o tselo them Egiptia un pral o tselo rajeskro kheer. 11Un palle was i tsiro, kai bokan le an o tselo them Egiptia un an o them Kanaan. Un mare phure hatsan tchi te chal an o them Kanaan. 12Har o Jakob shunas, kai an o them Egiptia djob della, bitchras job peskre tchawen an ko them, te ginenn le penge djob, un pal i tsiro bitchras lo len i duito kopo. 13Har jon o duito kopo an o them Egiptia wan, prindjran le o Josefes. Koi djinas o baro rai pral o them, hawe menshendar o Josef his. 14O Josef mukas peskro dades, un peskre tsele menshen an o them Egiptia te well. Kolla his efta-deesh-te-pantch menshe. 15Jaake was o Jakob an o them Egiptia, un kote djiwas lo peskre tchawentsa. Kolla hi mare phure. Un kote meran le ninna. 16Un lengre tchawe anan len an o them Kanaan un paskran len an o foro Sichem ap ko kotar phub, hoi ginas o Abraham kol menshendar, kolengro phuro dad o Hamor his. 17Palle was ko tsiro, kai kowa was, hoi o Dewel o Abrahameske penas. I Israelitarja wan hako diwes budeder an o them Egiptia. 18Koi was i wawar mursh baro rai pral o them Egiptia. Kowa djinas tchi o Josefestar, 19un rodas i drom, har te rikrell lo mare menshen tele. Un jon hunte budran tel dawa, un hunte mukan pengre tikne tchawen, te merenn jon. 20An ko tsiro was o Mose boldo. Un job his shukar an o Debleskre jaka. Triin tchon his job an peskro dadeskro kheer, un jon dan garda ap leste. 21Un palle nai khatran le o Moses buder gar an o kheer. Un kote, kai tchiwan le les, hatsas les i tchai o baro rajestar pral o them Egiptia. Un joi las les pash peste un tsardas les pre, har te wals lo lakro tchawo. 22Un gosewe Egiptarja sikran leste lauter, hoi jon djinan, jaake te was lo gosewo an lauter, hoi job rakras un kras. 23Har o Mose star-deesh bersha phuro his, kamas lo pal peskre menshende, i Israelitarja, te dikell. Un job djas kote, kai budran le. 24Un kote dikas job, kai jek leskre menshendar dawa chas. Un job djas koi, te well lo ap leskri rig, un das koi Egiptares pale un das les mulo. 25O Mose patsas, kai peskre menshe haiwenna, kai o Dewel les bitchras, te lell lo len dran lengri bibacht win. Jon haiwan kowa gar. 26O wawar diwes was job pash peskre menshende, har dui lendar tchingran. Un job das len trad, te tchingrenn le pen gar, un penas: Murshale, tumer han phrala, hoske tchingrenn? 27Kowa, kai kras ko tchingepen das les i spildini un penas: Hal tu i tchatchepaskro un i rai pral mende, te hunte shunas ap tute? 28Kameh tu man ninna mulo te dell, har tu taissar ko Egiptares mulo dal? 29Har o Mose kowa shunas, nashas job peske, un djas an ko them Midian. Koi wan leske dui tchawe boldo. 30Star-deesh bersha pal kowa his o Mose an o mulo them pash koi berga Sinai. Koi mukas pes i Debleskro bolepaskro glan leste te dikell an i subjengro bur, hoi chatchas. 31Hoi job kote dikas, nai patsas lo gar. Jaake djas lo pash ko bur, te nai dikell lo feteder, hoi kowa hi. Kote rakras o Dewel ap leste: 32Me hom o Dewel tire phurendar, o Dewel o Abrahamestar, o Isaakestar, un o Jakobestar. Un i bari traash was ap o Moseste, har job kowa shunas, un darjatar nai dikas lo gar kote pre. 33Un o Dewel penas ap leste: Rib tire tircha win! Kote, kai tardo hal, hi o Debleskro them. 34Me dikom, har mire menshe chan dawa an o them Egiptia. Un me shunom lengri gole un lengro ropen, un wom dran o bolepen tele, te lap len dran kau them win. Un me kamau, te djas tu an o them Egiptia. 35O Dewel bitchras kau Moses, kai pash peskre menshende tchi moldo his. Kowa dikah mer koi pre, har jon penan: Koon kras tut pral mende tchatchepaskro un rai, te hunte shunas mer ap tute? O Dewel bitchras les, te well lo rai pral lende, un te anell lo len dran ko them win, kai jon pandle budepangre his. Kowa penas leske ko bolepaskro, kai dran i subjengro bur ap leste rakras. 36Kau Mose anas i Israelitarjen wi un kras baro un sorelo koowa an o Debleskri soor an o them Egiptia, un pash o lolo pani, un star-deesh bersha an o mulo them. 37Kowa his o Mose, kai ap lende penas: O Dewel bitchrell tumenge i Debleskro rakepaskres har me hom. Kowa hi jek tumare menshendar. 38Un har kol Israelitarja an ko mulo them pash koi berga Sinai glan o Debleste khetne wan, his o Mose ap i berga Sinai tardo mashkral o bolepaskro un mare phurende. Un o bolepaskro das les kol Debleskre laba, hoi denn o djipen, te anell o Mose len pash mende. 39Mare phure kaman gar ap leste te shunell un kran, hoi jon kaman. Jon kaman te djiwell, har jon an o them Egiptia djiwan. 40Ap o Aron penan le: Kre menge i dewel, kai dell garda ap mende un sikrell mende o drom! Mer djinah gar, hoi djas o Moseske, kai anas men dran o them Egiptia win. 41An ko tsiro kran le i grumni dran sonakai, te well kaja lengro dewel. Un jon anan fichen, maran len un chatchran len lake, un wan bachtelo pral kowa, hoi jon kran. 42O Dewel djas peske lendar un mukas len. Koi mangan jon i momlia an o bolepen an. Jaake was kowa, hoi tchindlo hi an o liil, kai o Debleskre rakepangre tchinan. Kote penell o Dewel: Murshale an Israel, mange chatchran tumer kek fichen, un anan kek chapen glan mande an kol star-deesh bersha, har hans an o mulo them. 43Tumer hidjan ko kheer trujal, kai o Moloch dren hi. Ninna hidjan koi bolepaskri momeli tumentsa, kai Refan kharedo wella. Kol dujen kran tumer tumare wastentsa, te nai mangenn len an. Doleske tradau me tumen dran tumaro them win, un anau tumen pandlo an o them Babilonia, un dureder. 44O Stefano penas dureder: Mare phuren his o Debleskro tikno kheer, hoi his kerdo dran fichengre balla, un hidjan les lentsa, har djan le an o mulo them trujal. Kau kheer kran le jaake, har o Dewel kowa o Moseste ap i berga sikras. 45Mare phure hidjan kau kheer lentsa, bis te anas len o Josua an o them Kanaan. Kote djiwan wawar menshe, kai o Debles gar prindjrenna. Kolen tradas o Dewel win, un das ko them mare phurende. O Debleskro tikno kheer dran fichengre balla atchas an o them Kanaan un his gomme koi, har o David o baro rai was. 46Ap koleste dikas o Dewel latches. Un o David mangas lestar, te nai krell lo leske i kheer dran barra, kai i tsele Israelitarja nai mangenn les an. 47His gar o David, na-a, kowa his leskro tchawo, o Salomo, kai kras o Debleske i baro kheer dran barra. 48O baro Dewel djiwell gar an khera, kai i menshe kran pengre wastentsa. Kowa penas glan raha tsiro o Debleskro rakepaskro, o Jesaja: 49O Dewel penas: O bolepen hi miro beshepaskro, un i phub hi tel mire pire tchiddo. Hawo kheer kamenn tumer mange te krell tumare wastentsa, kai djiwap dre? 50Me krom o bolepen un i phub mire wastentsa." 51Un o Stefano penas dureder ap lende: "Tumer kamenn tchi te haiwell. Tumaro dji hi har bar. Tumare kandentsa shunenn tchi, un kamenn gar ap o Debleskro Ducho te shunell. Jaake kran tumare phure. Jaake krenn ninna tumer. 52Penenn mange: Dell jek Debleskro rakepaskro, kai lan tumare phure gar palla? Jon maran kolen, kai glan-wi penan, te well ko jek, kai hako tsiro o tchatchepen krella. Job was, un tumer phukran ap leste un maran les. 53I bolepangre anan tumenge kol laba, kai penenna, hoi o Dewel tumendar kamella. Un tumer rikran tumen gar ap lende." 54Har jon kowa shunan, hoi o Stefano lenge penas, djas lenge kowa an o dji, un i bari choli tapras len. 55O Stefano, pherdo Debleskro Ducho, dikas an o bolepen pre, un dikas o Debleskro railepen un o Jesuses ap o Debleskri tchatchi rig tardo. 56Un o Stefano penas: "Me dikau o bolepen pre, un o Menshengro Tchawes ap i tchatchi rig o Deblestar tardo." 57Koi dan jon soreles gole, tchiwan pengre wasta ap i kanda, te shunenn le gar, un djan ap leste, 58tradan les dran o foro win, un witsran barentsa ap leste. Un kolla, kai witsran i barra, riwan pengre koola win, un i tarno mursh, kai kharas Saulo, das ap lende jak. 59Har jon ap leste i barentsa witsran, das o Stefano gole: "Rai Jesus, le man pash tute!" 60Un job peras ap i phub tele, un das pale gole: "Rai, le koi doosh lendar!" Har job kowa penas, meras lo.

will be added

X\