Jesuseskre bitchepangre 27

1Har kran le win, te ulerah mer ap o panjeskro ulepaskro an o them Italia, dan le o Paules un wawar stilden an i wasta i baro lurdestar. Leskro lab his Julio. Kowa his i pralstuno pral kol lurdende, kai o baro rajeskre lurde kharedo wenna. 2Mer djam ap o panjeskro ulepaskro. Kowa was dran o foro Adramition un uleras an kol forja, kai pash o pani an o them Asia tchiddo hi. Mentsa was ninna i mursh dran o foro Tessalonika. Leskro lab his Aristarcho. 3O wawar diwes wam an o foro Sidon. O Julio his kamlo ap o Pauleste, un mukas les pash peskre malende te djal, te wenn kolla leske koi. 4Har mer dureder uleram, phurdas i baro ducho pral o baro pani. Doleske uleram mer ap koi rig ko themestar Ciprus, kai ko baro ducho gar jaake soreles phurdas. 5I themma Cilicia un Pamfilia mukam mer tchatches tchiddo, un wam an ko them Licia an o foro Mira. 6Koi hatsas ko baro lurdo i panjeskro ulepaskro, hoi was dran o foro Alexandria, un kamas an o them Italia te ulerell. Un mer djam ap ko panjeskro ulepaskro. 7Bud diwessa wam gar sik dureder, un maram men tele, te was pash ko foro Knidus. O baro ducho phurdas jaake soreles pral o pani, te nashte djam gar, kai kamam. Jaake uleram pash o them Kreta, un dureder trul ko kotar them, kai kharella Salmone. 8Menge his phares, te was dureder. Palle wam ap i wawar rig, kai kharella Latchi platsa. Koi pashal hi o foro Lasea tchiddo. 9Har kote wam, nashram bud tsiro. O wend his glan o wudar, un mer lam daar, te uleras dureder. Doleske penas o Paulo ap lende: 10"Murshale, te ulerah mer ap o pani dureder, dikau me, te wella bud bibacht ap mende. Gar kokres o panjeskro ulepaskro nai djal paash un kowa, hoi koi pre hi, djal nashedo. Ninna bud mendar nai tassen." 11Ko baro lurdo shunas budeder ap koleste, kai ulerell ko panjeskro ulepaskro un ap koleste, kai hi o rai pral ko panjeskro ulepaskro, har ap o Pauleste. 12Kote, kai maro panjeskro ulepaskro tchiddo his, his gar mishto, te atchas mer pral o wend. Doleske kaman i budester mursha dureder te ulerell, te wenn jon glan o wend an o foro Fenix. Kawa his o feteder foro an o them Kreta, kai jon nai atchans pral o wend. 13Har i latcho baro ducho phurdas, patsan le, kai ko tsiro was, te nai uleras dureder. Un jon uleran, jaake nesh har djala, langs ko them Kreta. 14Pal i tikno tsiro phurdas o baro ducho soreles dran i wawar rig. Ko ducho kharella Eurakulon. 15Kau sorelo ducho tapras o panjeskro ulepaskro, un mer nai rikram les buder gar, jaake sorelo his lo. Koi mukam mer o panjeskro ulepaskro jaake te djal, har ko baro ducho kowa kamas. 16Mer uleram dureder ap o pani pash ko them Kauda, un maram men tele, te nashras gar o tikno bero. 17Jon tsardan les pre, un palle pandan le shelle trul o tselo panjeskro ulepaskro, te djal lo gar paash. Halauter daran, te nai ulerals o panjeskro ulepaskro ap i barra, kai glan o them Libia tel o pani hi. Doleske witsran le ko sasterno shello an o pani tele, hoi rikrell o panjeskro ulepaskro pale, te djal lo gar jaake sik. Un jon mukan o panjeskro ulepaskro jaake te djal har o baro ducho les pral o pani phurdas. 18Ko baro ducho phurdas jaake soreles, kai witsran le o wawar diwes bud koowa an o pani, hoi kaman le an wawar forja te anell. 19O triinto diwes witsran jon kowa an o pani, hoi ap o panjeskro ulepaskro his, te nai ulerell lo. 20Bud diwessa nai dikam o kham un i bolepangre momlia gar, jaake sorelo phurdas o baro ducho pral o baro pani, un das sorelo brishin. Koi patsam mer, kai nashrah mer maro djipen. 21Har chan le i raha tsiro tchi, djas o Paulo mashkral lende, un penas: "Murshale, tumer hunte shunans ap mande, un atchans an o them Kreta. Jaake wals i tseli bibacht gar pral mende. 22Kanna penau me tumenge: Denn gar pre! Kek tumendar merella. Kokres kau panjeskro ulepaskro djal paash. 23Kai rat was i bolepaskro pash mande. Koles bitchras miro Dewel, koleske budrau. 24Kowa penas ap mande: Ma traash, Paulo! Tu hunte wess glan o baro rajeste an o foro Rom anlo. O Dewel shunas tut: Kek ap kau panjeskro ulepaskro merella. 25Doleske murshale, ma trashenn! Me patsau o Debles, lauter wella jaake, har job mange penas. 26O baro ducho phurdell men ap i tikno kotar them an o baro pani." 27Mer hams deesh-te-star diwessa ap o baro pani Adria. An koja rat patsan kol budepangre ap o panjeskro ulepaskro, te dikenn le i kotar them. 28Koi witsran jon i saster an o pani, hoi ap i shello pandlo hi, te dikenn le, har dur kowa tele djala. Kowa djas star-deesh metarja dur tele. I kotar dureder kran jon kowa pale, un dikan, kowa djas triin-deesh metarja dur tele. 29Koi trashan le, te ulerenn le ap i bare barra, hoi tel o pani his. Un jon witsran star sasterne shelle, pal o panjeskro ulepaskro an o pani, te well lo gar krik tsardedo. Un o panjeskro ulepaskro atchas kote tchiddo, bis te was o wawar diwes. 30Kol budepangre ap o panjeskro ulepaskro kaman penge tchorchanes mendar te djal, un penan chochenes ap i wawarenge: "Mer mukas ko tikno bero an o pani, te nai witsras ninna glan o panjeskro ulepaskro sasterne shelle an o pani." 31O Paulo penas ap ko baro lurdeste un ap kol lurdende: "Te atchenn kolla gar ap o panjeskro ulepaskro, ham mer lauter nashedo." 32Koi dan i lurde kol shelle tele, un mukan ko tikno bero an o pani te perell. 33Un har buder gar jaake tamlo his, penas o Paulo ap lauterende, te chan jon tchomone: "Tumer maran tumen deesh-te-star diwessa tele," penas job, "un an ko tselo tsiro chan tumer tchi. 34Doleske mangau me tumen: Chan kanna tchomone! Kowa hunte krenn, te atchenn djido. Kek tumendar nashrell i bal ap o shero." 35Un har job kowa penas, las job o maro, parkras pes pash o Debleste glan lauterende, phagas o maro, un chas. 36Har jon kowa dikan, tapran le newi soor un chan ninna. 37Mer hams lauter khetne ap o panjeskro ulepaskro dui-sheel-efta-deesh-te-shob (276) mursha. 38Un har jon lauter tchalo his, witsran le o tselo djob an o pani, te well o panjeskro ulepaskro buder gar jaake pharo. 39Har diwes was, dikan kol budepangre ap o panjeskro ulepaskro i kotar them an o pani. Kowa prindjran jon gar. Kote dikan le i kotar phub, kai o panjeskro ulepaskro tchiddo nai wals. Un jon penan penge: Te djal kowa, djah kote ap o them. 40Un jon dan kol sasterne shelle tele, un witsran len an o pani, un pandan kol shelle pre, hoi rikran ko kasht, hoi o ulepaskro ap i tchatchi rig anell. Palle tsardan le ko baro thann pre, te phurdell o baro ducho koi dre un anell len ap o them. 41Ap jek kopo uleran le ap i barra, hoi tel o pani hi. Un o panjeskro ulepaskro his glanstunes soreles ap i barra beshdo. Un o sorelo pani kras o palstuno kotar paash. 42Koi kaman i lurde i stilden te marell, te nashell kek peske. 43Ko baro lurdo kamas gar, te well o Paulo mulo dino. Job djas koi mashkral un penas, te stenn kanna kolla an o pani, kai nai rikrenn pen pral o pani, te wenn le wergal ap o them. 44un te tchiwenn pen i tsele wawar ap i kashta an o pani, te nai wenn le halauter wergal ap o them. Jaake wam mer lauter djido ap o them.

will be added

X\