Jesuseskre bitchepangre 22

1Tumer mursha, phrala un dada, shunenn, hoi kamau tumenge te penell! 2Har jon shunan, kai rakrell job hebretikes, dan le buder gar gole. Un job penas: 3Me hom i biboldo, un wom boldo an o foro Tarsus, an ko them Cilicia. Baro wom an o foro Jerusalem. Miro sikepaskro his o Gamaliel. Kowa sikras mande, te djiwap jaake, har mare phure djiwan. Jaake har tumer pal o Moseskre laba djiwenna, djiwom me ninna o tselo djijestar. 4Me lom kolen palla, kai djan ap ko newo drom - me lom len jaake palla, te marom len. Murshen un djuwjen pandom, un witsrom len an o stilepen. 5Ko baro rashai un kol tsele biboldengre phureder nai penenn, kai kowa tchatcho hi, hoi penau kate. Har kamom an o foro Damaskus te djal, dan man i rashaja lila peha i biboldenge an ko foro, te nai pandap ninna kote kolen, kai djan ap ko newo drom, te anap len an o foro Jerusalem, te lenn le kote pengri phagi. 6Jaake djom ap o drom an o foro Damaskus. Har me homs i paash diwes glan o foro Damaskus, was ap jek kopo i bari momeli dran o bolepen trul mande. 7Me perom ap i phub, un shunom, har jek ap mande penas: Saulo, Saulo, hoske leh tu man palla? 8Me penom: Koon hal tu, mo rai? Un job penas ap mande: Me hom o Jesus dran Nazaret, koles tu palla leh. 9Kolla mursha, kai pash mande his, dikan nai koja momeli. Jon shunan gar kol laba, hoi job ap mande penas. 10Me putchom: Rai, hoi krap? Un o rai penas ap mande: Ste pre un dja an o foro Damaskus! Kote well tuke penlo, hoi tu hunte kress. 11Koi bari momeli his jaake soreli, kai kras li man korelo. Un kolla, kai pash mande his, lan man ap o wast, un anan man an o foro Damaskus. 12Koi his i patslo mursh. Kowa kharas Anania. Job rikras pes ap kowa, hoi an o Moseskre lila tardo hi. Kowa his an-diklo pash i tsele biboldende, kai kote djiwan. 13Kowa was pash mande un penas: "Miro phraal Saulo, tu dikess pale." Un ap jek kopo dikom me pale. 14Palle penas lo ap mande: "Ko Dewel mare dadendar rodas tut win, te djiness tu, hoi job kamella, un te dikess tu koles, kai hi kek tchilatchepen an leste, un shuness, hoi job penella. 15Tu hunte rakress lestar glan i tsele menshende un peness, hoi tu dikal un shunal. 16Un kanna ste pre! De leskro lab an-gole! Un muk tut an o pani te thowell, un tiri doosh tele te thowell!" 17"Har me pale an o foro Jerusalem wom, un an o Debleskro baro kheer o Debles an-mangom, was o Debleskro Ducho soreles ap mande. 18Un me dikom o Jesuses, un job rakras ap mande: Dja jaake sik har djala dran o foro Jerusalem. Kal menshe kate patsenn gar, hoi tu pral mande peneh. 19Me penom: Rai, jon djinenna, kai me kolen, kai ap tute patsan, an o stilepen witsrom, un me mukom len an i biboldengre kangria i tchupnijaha te dell. 20Me homs bachtelo, har maran le o Stefanes, koles, kai tutar rakras. Me homs pashal tardo, har maran le les. Un kolla, kai maran les, ap kolengre koola dom jak. 21O rai Jesus penas ap mande: Dja dran o foro Jerusalem win! Me bitchrau tut an i wawar themma pash kolende, kai kek bibolde hi. 22Har kol tsele menshe o Pauleskre laba shunan, dan le lauter gole: "Anenn les krik un denn les mulo!" 23Jon dan bari gole, tsardan pengre koola i choljatar pendar tele un witsran tchik an o bolepen. 24Koi penas ko baro lurdo, te anenn le o Paules an o lurdengro kheer, un te denn le les dawa i tchupnijaha, te penell job, hoske kol bibolde jaake chojemen ap leste hi. 25Har jon les pandan, te denn le les i tchupnijaha, penas o Paulo ap ko baro lurdeste, kai kote pashal tardo hi: "Nai denn tumer jekes i tchupnijaha, kai hi i Remari, un was gomme gar glan i tchatchepangre anlo?" 26Ko baro lurdo djas pash peskro pralstuneste, un penas ap leste: "Hoi kameh te krell? Kau mursh hi i Remari." 27Koi djas ko pralstuno pash o Pauleste, un putchas lestar: "Pen mange: Hal tu i Remari?" Penas lo: "Awa!" 28Koi penas ko pralstuno: "Me dom bud lowe, te wap i Remari." Penas o Paulo: "Me wom jaake boldo." 29Un kolla, kai kaman les dawa te dell, djan penge sik. Un ko pralstuno daras, har shunas lo, kai hi o Paulo i Remari, un te mukas lo i Remares te pandell. 30O wawar diwes kamas o pralstuno lurdo win te hatsell, hawi doosh kol bibolde ap o Pauleste pre anan. Un job las les dran o stilepen win, un penas, te wenn kol bare rashaja un kol tsele pralstune bibolde khetne. Un job anas o Paules glan lende.

will be added

X\