Jesuseskre bitchepangre 16

1Jon wan ninna an i forja Derbe un Listra. Koi his i tarno patslo mursh. Kowa kharas Timoteo. Leskri dai his i biboldetsa. Un joi his patslo. Leskro dad his kek biboldo. 2O Timoteo his i mursh, pral koleste rakran i patsle mishto an i forja Listra un Ikonion. 3Koles kamas o Paulo peha te lell ap o drom. Job las les un tchinas les ap o mass, har kowa pash i bibolde hi, te tchingrenn i bibolde gar koi pral. I bibolde djinan lauter, kai leskro dad kek biboldo hi. 4An kol forja, kai jon wan, dan jon i phralen ko liil, kai dre tchindlo hi, hoi o Jesuseskre bitchepangre un i phureder mank i patslende an o foro Jerusalem win kran. Un jon penan lenge, te rikrenn le pen ap kol laba. 5Un i tsele patsle wan sorleder an o patsepen, un hako diwes wan budeder patslo. 6O Paulo un o Silas djan dureder. Un har o Debleskro Ducho gar kamas, te penan le o Debleskro lab an o them Asia, djan le an i themma Frigia un Galatia. 7Har jon an o them Misia wan, kaman le dureder an o them Bitinia te djal. Un o Jesuseskro Ducho mukas len gar kote te djal. 8Koi djan le mank o them Misia tele an o foro Troas. 9Koi dikas o Paulo an i suni i murshes dran o them Macedonia. Kowa mangas les un penas: "Am wergal an o them Macedonia, un pen menge o Debleskro lab!" 10Koi pre rodam mer sik i panjeskro ulepaskro, kai lell men peha an o them Macedonia. Mer djinam, kai das men o Dewel gole, te penas kote i menshenge o latcho lab o Jesus Kristestar. 11Mer uleram dran o foro Troas krik, un wam an o foro Samotrake. Ap o wawar diwes djam an o foro Neapolis. 12Palle uleram dureder an o foro Filipi. Kowa hi i foro an ko them Macedonia. Kote djiwan bud Remarja. Mer atcham i tsiro an ko foro. 13Ap o Debleskro diwes djam mer win glan o foro pash o pani. Mer patsam, te wenn pash o pani menshe khetne, kai mangenn kote o Debles an. Koi besham men tele, un rakram kolla djuwjentsa, kai kote wan. 14Koi his i djuwel, kai mangas kote o Debles an. Joi his i bikepaskretsa un bikras ripja dran lolo thann. Koja kharas Lidia. Joi his dran o foro Tiatira. Kolake kras o rai Jesus o dji pre. Un joi shunas, hoi o Paulo penas, un was patslo. 15Un joi mukas pes peskre menshentsa an o pani te thowell, te sikrell li, te patsell li ap o rajeste, o Jesuseste. Un joi mangas men soreles un penas: "Te patsenn tumer, kai me ap o rajeste, o Jesuseste patsau, awenn an miro kheer un atchenn kote!" Un joi mangas men o tselo djijestar, te was mer an lakro kheer. 16Jek diwes, har mer djam pale pash o pani, kai jon mangan o Debles an, tapram mer i rakli, an kolate his i beng, kowa das lat o durkepen. Lakro durkepaha anas li lakre rajenge bud lowe dre. 17Koja las o Paules un men palla, un das gole: "Kalla mursha budrenn ko baro Debleske! Kalla sikrenn tumenge o drom pash leste." 18Kowa das li gole hako diwes. O Paulo was chojedo, un risras pes trujal, un penas ap ko bengeste, kai hi an late: "Me penau tuke an o Jesus Kristeskro lab: Dja dran late win!" Koi djas o beng dran kai rakli win. 19Har lakre raja dikan, kai nashte anas joi lenge buder kek lowe, wan le tchilatcho, un tapran o Paules un o Silases. Un jon anan len an o foro glan i pralstunende. 20I pralstune anan i tchatchepangren an ko foro khetne, un penan: "Kalla anenn tchingepen an maro foro. Jon hi bibolde, 21un penenn menge, te rikras ap sawe laba, hoi mer nai krah gar. Mer ham Remarja." 22Bud menshe, kai his koi, wan tchilatcho ap o Pauleste un ap o Silaseste. Un kol tchatchepangre mukan lenge i koola tele te tsardell, un penan, te denn le len i kashtentsa. 23Pal kowa har jon len soreles dawa dan, witsran le len an o stilepen, un penan ap o rajeste pral o stilepen: "De mishto jak ap lende!" 24Har jon kowa ap leste penan, witsras job len an o palstuno stilepen, un tchiwas lengre pire an o kasht, un pandas len. 25Deesh-te-dujenge an i rat sharan o Paulo un o Silas o Debles, un giwan leske i gili. Un kol wawar stilepangre shunan kowa, har jon giwan. 26Ap jek kopo trissas i phub, un ko kheer, kai o stilepen his, peras khetne. I wudja stan pre, un ap i stilepangre peran i sasterne shelle tele. 27Har o rai pral o stilepen pre djangewas un dikas, kai kol wudja an o stilepen pre his, patsas lo, kai kol stilde nashan penge. Koi las job peskro charo, un kamas pes te marell. 28Koi das o Paulo soreles gole: "Ma mare tut! Mer ham lauter kate!" 29Un o rai pral o stilepen mangas i momeli, un djas sik pash i stilepangre. Les his i bari daar, har mukas job pes glan o Pauleste un o Silaseste tele te perell. 30Un job anas len win, un penas ap lende: "Rajale, hoi krap, te lap o Debleskro djipen?" 31Penan le ap leste: "Pats ap o rajeste, o Jesuseste! Jaake leh tu un tire menshe o Debleskro djipen." 32Un o Paulo un o Silas penan leske, un kol tsele wawarenge an leskro kheer, o Debleskro lab. 33An koi rati thowas o rai pral o stilepen lengro rat tele, un mukas pes un peskre tsele menshen an o pani te thowell, te sikrell lo, te patsell lo ap o rajeste, o Jesuseste. 34Job las len dre an peskro kheer, das len te chal un te pijell, un his bachtelo peskre tsele menshentsa, kai wan jon patslo ap o Debleste. 35Har diwes was, bitchran kol tchatchepangre pengre klisten pash o rajeste pral o stilepen un penan leske, te mukell lo o Paules un o Silases te djal. 36Kowa was pash o Pauleste un penas leske: "I tchatchepangre bitchran man, te penap tumenge, te han tumer gar buder stildo. Awenn win un djan tumaro drom. Kek krell tumenge tchilatchepen!" 37O Paulo penas ap kol klistende: "Mer ham Remarja. Tumare pralstune mukan men dawa te dell glan i tsele menshende. Jon rakran kek tchatchepen pral mende win, un witsran men an o stilepen. Un kanna kamenn jon men tchorchanes dran o stilepen win te anell. Jaake djal kowa gar, har jon kamenna. Kolla tchatchepangre, kai kran kowa, kolla hunte wenna pash mende un hunte anenn men dran o stilepen win. Kowa penenn lenge!" 38Kol kliste penan kowa i tchatchepangrenge. Har kolla shunan, kai o Paulo un o Silas Remarja hi, lan jon traash, 39un djan pash lende, mangan pen tele glan lende, anan len dran o stilepen win, un mangan len, te djan le dran o foro win. 40Un o Paulo un o Silas djan pale an o kheer, kai i Lidia djiwell. Un har jon kote pengre phralen dikan, penan jon lenge: "Ma trashenn! Atchenn o Debleha!" Palle djan jon dran ko foro win.

will be added

X\