Jesuseskre bitchepangre 14

1An o foro Ikonion djas o Paulo un o Barnabas pale an i biboldengri kangri, un penan i menshenge o Debleskro lab jaake, kai wan bud bibolde patslo, ninna bud wawar, kai kek bibolde hi. 2Kol bibolde, kai wan gar patslo, penan, te wals kowa gar tchatcho, hoi o Paulo penas, un kran, te wan kolla, kai kek bibolde hi, chojedo ap i patslende. 3Un o Paulo un o Barnabas atchan i raha tsiro an ko foro. Un len his kek traash, te sikren le i menshende o Jesuseskro drom. Un o rai Jesus das len i soor, te kran le baro un sorelo koowa, hoi kek wawar nai kras. Jaake sikras job, kai kowa, hoi jon pral leskro baro latchepen penan, tchatcho hi. 4I menshe an ko foro djinan gar, koneske te patsenn le. His sawe, kai rikran kol biboldentsa khetne. Wawar rikran pen ap o Jesuseskre bitchepangre. 5Kowa djas jaake dur, kai tchiwan pen i bibolde khetne kolentsa, kai kek bibolde hi. Un khetne lengre pralstunentsa kaman le ap kol dujende pre te djal, te denn le len i barentsa mulo. 6Har o Paulo un o Barnabas kowa haiwan, nashan le penge an ko them Likaonia, an kol forja Listra un Derbe. 7Un jon penan i menshenge an ko them o latcho lab o Jesus Kristestar. 8An o foro Listra his i mursh beshdo. Koles his nassele pire, un nai nashas gar jaake raha har job djiwas. 9Kowa shunas, hoi o Paulo rakras. Un har o Paulo haiwas, kai job patsella, kai o Jesus nai krell les sasto, dikas lo ap leste, 10un das gole ap leste: "Ste pre! Atch ap tire pire tardo!" Un job stas pre, un djas trujal. 11Har kol menshe dikan, hoi o Paulo kras, dan jon ap pengro rakepen Likaontikes gole, un penan: "O dewel Zois un o dewel Hermes wan dran o bolepen tele pash mende!" 12Jon penan ap o Barnabas: "O Zois", un ap o Paulo: "O Hermes". O Paulo his o rakepaskro. Doleske kharan le les jaake. 13Glan ko foro his ko kheer tardo, kai mangan i menshe ko debles an, kai kharas "Zois". Koleskro rashai anas grumjen un shukar senlepen glan ko foreskro wudar. Job un kol menshe kote kaman kau koowa glan o Pauleste un glan o Barnabeste te anell, har te wans le i dewel. 14Har o Barnabas un o Paulo kowa shunan, kran le pengre ripja paash un stan mashkral kol menshende, un dan gole: 15"Murshale, hoi krenn tumer kote? Mer ham menshe har tumer, un penah tumenge o latcho lab o djido Deblestar. Job kamell, te wenn tumer ap leskro drom, un mangenn buder gar kol chochene deblen dran kasht un bar an. Job hi ko Dewel, kai kras o bolepen un i phub, un o baro pani, un lauter, hoi djiwella. 16An o phuro tsiro mukas job i menshen, kai kek bibolde hi, jaake te djiwell, har jon kaman. 17Ninna te djinans tumer tchi lestar, hunte dikans, kai o Dewel djiwella. Job kras bud latcho koowa tumenge. Job dell tumen o brishin dran o bolepen, te well lauter ap i phub baro. Job dell tumende te chal, un i bacht an tumaro dji." 18Fote o Paulo un o Barnabas jaake rakran, kaman i menshe lenge fichen te marell. Un o Paulo un o Barnabas mangan len pengro tselo djijestar, te krenn le kowa gar. 19Koi wan bibolde dran i forja Antiochia un Ikonion an kau foro. Kolla lan bud menshen ap pengri rig, lan barra, witsran i barentsa ap o Pauleste, tsardan les dran o foro win, un dikan ap leste, un penan: "Kowa hi mulo." 20Har o Pauleskre mala trul leste tardo his, stas job pre un djas an ko foro. Ap o wawar diwes djas lo o Barnabeha an o foro Derbe. 21An ko foro penan le o latcho lab o Jesus Kristestar, un bud menshe wan patslo. Palle djan jon pale an kol forja Listra, Ikonion un Antiochia, 22djan pash i patslende un dan len soor an o dji, un rakran lenge an o dji, te atchenn jon an o patsepen. Un jon penan ap kol patslende: "Ap maro drom pash o Debleste an o bolepen krenn menge i menshe o djipen phares." 23Un an hake gaba un forja, kai i patsle khetne wan, rodas o Paulo un o Barnabas phralen win, te wenn le phureder mank i patslende. Un o Paulo un o Barnabas lan penge i tsiro, kai chan le tchi o Debleske, un mangan o Debles lauterenge, kai ap leste patslo wan, te dell lo ap lende jak. 24Palle djan le an i themma Pisidia un Pamfilia. 25Jon penan i menshenge an o foro Perge o Debleskro lab, un djan dureder an o foro Attalia. 26Kote djan le ap o panjeskro ulepaskro, un wan an o foro Antiochia. Kowa his kau foro, kai bitchran i patsle o Paules un o Barnabes an wawar forja, te penan jon kote o latcho lab o Jesus Kristestar, un jon mangan o Debles, te djal lo lentsa. Kai budi his kanna kerdo. 27Un o Paulo un o Barnabas wan kanna pale pale an ko foro. Kote dan le i patslen khetne gole, un penan lenge, kai o Dewel lentsa his, un har bud koowa job kras, un har job ninna kolen, kai kek bibolde hi, pash peste gole das, un jon ap leskro drom wan. 28Un o Paulo un o Barnabas atchan i raha tsiro pash kol patslende.

will be added

X\