1 Latcho Theofilo, an miro ersto liil tchinom tuke lauter, hoi o Jesus kras, un i menshende sikras, 2 jaake raha har job gomme gar an o bolepen djas. Glan kowa, kai djas lo an o bolepen, rakras lo kolentsa, kolen job win rodas, te wenn le peskre bitchepangre, un penas lenge an i soor, hoi das les o Debleskro Ducho, hoi jon hunte krenna. 3 Pal peskro merepen, djiwas lo star-deesh (40) diwessa kate ap kai phub, un mukas pes lendar te dikell bud kope. Un tchatchepaha jon dikan, kai hi job djido. Un job rakras lentsa pral o tsiro, kai hi o Dewel o rai pral i tsele menshende. 4 Har job lentsa khetne his, penas job lenge soreles: "Atchenn an o foro Jerusalem, un djan gar krik, jaake raha har bitchras miro dad an o bolepen gomme gar peskro Ducho ap tumende, jaake har penom les tumenge. 5 O Johanni tchiwas tumen an o pani, te well diklo, kai mukan tumaro phuro djipen. O Dewel tchiwell o Debleskro Ducho ap tumende. Un o tsiro well sik, kai kowa wella." 6 Kolla, kai khetne wan, putchan lestar: "Rai, kreh tu an kau tsiro o them Israel pale baro un sorelo?" 7 Koi penas o Jesus: "Ko tsiro, kai o dad kowa krella, hi leskro koowa. Tumer hunte djinenn kowa gar. 8 Ap tumende well o Debleskro Ducho un dell tumen i bari soor. Palle rakrenn tumer mandar an o foro Jerusalem, un an o tselo them Judea, un an o them Samaria, un ap i tseli phub." 9 Har job kowa penas, was job glan lengre jaka an o bolepen hadedo, un i wolka las les pre. 10 Har jon leske palla dikan, har job an o bolepen djas, his dui mursha an bijale ripja pash lende tardo. 11 Kolla penan: "Murshale dran o them Galilea, hoske han tumer koi tardo, un dikenn an o bolepen? Kau Jesus, kai djas tumendar krik an o bolepen, kowa well jaake dran o bolepen pale har dikan tumer les an o bolepen te djal." 12 Palle djan jon o djeteskri berga tele un pale an o foro Jerusalem. Koi berga his gar dur kau forestar krik. 13 An o foro Jerusalem djan le an ko kheer, an koi pralstuni isema, kai jon khetne atchan: O Petro, o Johanni, o Jakobo, o Andreas, o Filipo, un o Thomas, o Bartolomeo, un o Mateo, un o Jakobo, koleskro dad o Alfeo hi, un o Simon, kai hi kol menshendar, kai kharenna Zelotarja, un o Judas, o Jakobeskro tchawo. 14 Kalen lauteren his jek dji un jek djipen un mangan o Debles an. Pash lende his ninna djuwja, un i Maria, o Jesuseskri dai, un o Jesuseskre phrala. 15 An kolla diwessa wan bud patsle khetne, sheel-te-biish menshe. Mashkral lende stas o Petro pre un penas: 16 Mire phrala, kowa, hoi an o Debleskro lab pral o Judas tchindlo hi, hunte was jaake. Glan raha tsiro penas o Debleskro Ducho o Davideske kowa, hoi wella pral o Judaseste. O Judas sikras o drom kolende, kai tapran o Jesuses. 17 Job his jek mendar. O Jesus rodas men khetne win, te was mer leskre bitchepangre. 18 O Judas ginas peske i kotar phub kol lowentsa, hoi job las, har job ap o Jesuseste phukras. Job peras o shereha glan tele ap koi phub, hoi job peske ginas, un leskre tsele buke wan dran leskro per wi. Un job meras. 19 I tsele menshe an o foro Jerusalem shunan kowa. Doleske penenn jon ap ko kotar phub, kai o Judas meras: Hakeldamach. Kowa kharella ap lengro rakepen ratli phub. 20 An o Debleskre gilja hi tchindlo: Leskro kheer hunte djal paash, un kek mensho djiwella koi dre. Un leskri budi hunte krell i wawar. 21 Doleske hunte rodas i wawar murshes win. Kowa hunte well i mursh, kai o tselo tsiro mentsa khetne his, har o rai Jesus mank mende his, 22 ko tsirestar, kai thowas les o Johanni an o pani bis ap ko diwes, kai was lo mendar an o bolepen lino. Kau mursh hunte penell mentsa khetne i menshenge, kai o Jesus i mulendar pre stas. 23 Un jon rodan dui murshen win: o Matias un o Josef, koles dan le ninna Barsabas un Justo gole. 24 Palle mangan jon o Debles un penan: "Rai, tu prindjreh i tsele menshengre djia. Sike mende, kones tu kol dujendar win rodal, 25 te penell job i menshenge o latcho lab o Jesus Kristestar un krell koi budi, hoi o Judas mukas. Kowa mukas men un djas peske." 26 Un jon witsran i kashta, un jek kasht sikras ap o Matias. Un job was o Jesuseskro bitchepaskro jaake har i wawar deesh-te-jek Jesuseskre bitchepangre.
