2. Korintarja 11

1Mukenn man jek kopo jaake te rakrap, har te woms dinelo! Shunenn, hoi kamau tumenge te penell! 2Jaake har o Dewel kamell, kamau me ninna o tselo djijestar, te djan tumer gar o Jesus Kristestar krik. Tumer han mange har i tchai, kai dom jek mursheste, te well li leskri pirni. Ko jek mursh hi o Jesus Kristo. Kamau te anap leske i djudji tarni djuwel ap ko diwes, kai romedinerell lo lat. 3Me darau, te was wawar koowa an tumaro shero, un tumer djiwenn buder gar djudjes un kokres o Jesus Kristeske. Me darau, te djas tumenge har i Evake, har o gosewo sap chochas lat, un joi mukas o tchatcho drom. 4Hi jaake: Te well jek pash tumende un sikrell tumen i wawar drom, har ko drom, hoi mer tumende sikram, palle nashenn tumer leske palla. Te rakrell lo pral i wawar Jesus un i wawar Debleskro Ducho, har kowa, hoi an tumende was, palle shunenn tumer mishto ap ko chocheno mursheste. 5Me djinau, me molau ninna jaake bud har kol bare rakepangre pash tumende, kai penenn, te hi le bitchedo o Jesus Kristestar. 6Ninna te nai rakrau gar jaake mishto har kol wawar, djinau ninna jaake bud har jon. Kowa nai dikan tumer hako kopo, kai rakrom, un an hako koowa, hoi krom. 7Krom man me baro, har lom kek lowe tumendar, har penom tumenge o Debleskro latcho lab? Lom me doleske i doosh ap mande? Na-a, me krom tumen baro. 8Kote, kai wawar patsle khetne wenna, lom lowe lendar un djiwom dran lengri possita, te nai budrom pash tumende. 9Har me pash tumende homs, un mange his gar doha djipaske, mangom kekestar tumendar tchomone. I patsle phrala, kai wan dran o them Macedonia, anan mange jaake bud, te nai djiwom pash tumende. Jaake perom kekeske tumendar ap i possita. Un jaake kamau kowa ninna te krell an ko tsiro, hoi wella. 10An kau koowa sharenn man i menshe. Un pash o Jesus Kristeskro tchatchepen, hoi an mande hi, penau tumenge: Kek mensho an ko tselo them Achaja lell kau sharepen mandar krik! 11Hoske penau me kowa jaake? Hi man kek kamlepen tumenge? O Dewel djinella, kai kamau tumen o djijestar. 12Te lau tchi tumendar an ko tsiro hoi wella, palle doleske, te wap gar har kolla, kai lenn tumendar lowe. Kamau gar, te nai sharenn le pen un penenn: Jon hi jaake har mer. 13Tchatchepaha, jon wan gar o Jesus Kristestar bitchedo. Jon hi chochene, un krenn, har te bitchrals len o Jesus Kristo. 14Pral kolende hunte krenn tumer kek bare jaka. Ninna o beng krell jaake, har te wals job o Debleskro bolepaskro. 15Doleske hunte kras mer kek bare jaka, te krenn ninna leskre budepangre har te wans jon o Debleskre budepangre. Jon len pengri phagi o Deblestar. 16Me penau pale: Kamau gar, te penell jek, me hom dinelo. Un ninna te patsenn tumer, te hom dinelo, palle mangau tumen: Lenn man pre har i dineles, te sharap man me nai ninna i tikno kotar! 17Me te sharau man kanna, palle wenn mire laba gar maro rajestar, o Jesusestar. Na-a, me rakrau kanna jaake, har te woms me dinelo. 18Bud menshe hi koi, kai sharenn pen pral kowa, hoi jon krenna. Doleske kamau me kowa kanna ninna te krell. 19Tumer patsenn, te han gosewo, un nashenn hako dineleske palla! 20Te hadell jek pes pral tumende, krenn tumer, hoi job penell. Te kamell job tumare lowe te lell, un kamell tumen ap peste te pandell, un ninna job te dukrell tumen, un dell tumen an o mui, mukenn tumer kowa tumentsa te krell. 21Me ladjau man te penap: Kowa nai anoms me gar pral o dji! Kanna rakrau tchatchepaha har i dinelo: Te patsell jek, te nai krell lo pes baro, palle nai krau man me ninna baro. 22Jon hi Hebrearja. Me hom ninna jek. Jon hi bibolde. Me hom ninna jek. Jon wenna pal o Abraham. Me ninna. 23Jon penenn, te hi le o Jesus Kristeskre budepangre. Kanna rakrau har i dinelo: Me hom budeder har jon leskro budepaskro. Me budrom budeder. Me wom budeder stildo. Me lom budeder dawa. Man his budeder o merepen glan i jaka har jon. 24I biboldendar lom me pantch kope triin-deesh-te-enja (39) dawa i tchupnijaha. 25Triin kope lom dawa i kashteha. Jek kopo witsran le barentsa ap mande, te denn le man mulo. Triin kope djas o panjeskro ulepaskro tele, ap hoi me homs, un jek diwes un jek rati homs ap i kasht tchiddo an o baro pani. 26Ap miro drom an bud wawar forja un themma his bud kope o merepen glan mire jaka. Me nai tassoms an i diwje panja, un kol tchorepangre nai dans man mulo. Un i bibolde, un ninna kolla, kai kek bibolde hi, kolla lan man palla. An o mulo them un an o baro pani, kai homs, his o merepen glan mire jaka, un ninna, har homs mank kol phralende, kai hi kek tchatche phrala. 27Me marom man tele un man his bud budi. Bud kope sowom gar. Man his trush un bok. Bud kope chom tchi. Mange his shila un man his tchi an-ripaske. 28Me nai penoms gomme budeder: Hako diwes well newo koowa ap mande. Un miro dji dukella, te djinau gar, har kowa kote hi, kai i patsle khetne wenna. 29Te hi jek gar sorelo, hom me witar gar sorelo. Te perell jek o Debleskro dromestar tele, hi man bari duk an o dji. 30Me te sharap man, palle kamau te sharap man koleha, te hom gar sorelo. 31O Dewel, ko dad o Jesusestar, maro rajestar, djinella, kai penau o tchatchepen. Les sharas mer hako tsiro. 32An ko tsiro, har me an o foro Damaskus homs, his kote i moskero, koles tchiwas o baro rai Aretas an peskri budi. Ko moskero tchiwas klisten glan ko foro pash kol bare wudja, te taprenn le man. 33Trul o foro his i bari barengri baar. Un i patsle tchiwan man an i korba un mukan man dran i wochni, hoi an koi barengri baar dren hi, tele ap i phub. Jaake nai tapran jon man gar.

will be added

X\